10 më të pasurit e Shqipërisë

10 më të pasurit e Shqipërisë

ARDIT BIDO (ARDITBIDO@JOURNALIST.COM)
Janë 10 më të pasuruarit e vitit që lamë pas, sipërmarrës të suksesshëm, që kanë arritur t`i kthejnë bizneset e tyre me fitime të pamendueshme për qytetarët e zakonshëm, e tashmë po vazhdojnë të fuqizojnë atë ç`kanë krijuar. Ndonëse kjo nuk është periudha më e mirë për çmimin e naftës, tregtarët e karburanteve edhe këtë vit zënë pjesën më të madhe të më të pasuruarve të Shqipërisë. Madje, në krye të klasifikimit të më të pasurve të vendit tonë, qëndron pronari i “Kast Petrol”, Shefit Kastrati. Në këtë listë kemi përfshirë vetëm kompanitë që kanë pronarë shqiptarë dhe që janë private. Kjo, pasi firma “Kast Petrol” radhitet e 9-a ndër kompanitë më të mëdha, më poshtë se 8 kompani shtetërore ose me interesa të huaja. Listimi i kompanive më të suksesshme është bërë nga Drejtoria e Përgjithshme e Tatim-Taksave, ndërsa të dhënat mbi këto kompani janë siguruar nga Dhoma e Tregtisë Tiranë, si dhe nga Dhoma Amerikane të Tregtisë, ku këto kompani bëjnë pjesë.





Vitin e kaluar, kompania e tij ndodhej e dyta në radhitje, por sivjet ka marrë stafetën e kompanisë me më shumë të ardhura në vendin tonë. E quajnë Shefit Kastrati dhe është pronari dhe drejtuesi i “Kast Petrol”, që sivjet ndodhet në krye të klasifikimit.

Shefit Kastrati

Kompania: “Kast Petrol”

Adresa: Shkozet, Durrës

Punonjës: 250

Xhiroja vjetore: 9 miliardë lekë

Rendi: 9

Aktiviteti: Tregti karburanti

“Kompania është krijuar në vitin 1995 si shoqëri aksionere, por “Kastrati” sh.p.k, që është edhe kompania e parë e krijuar prej nesh u themelua në vitin 1992”, – tregon ai për gazetën “standard”. Suksesi nuk ishte i lehtë, por ai erdhi. Pas përpjekjesh, “Kast Petrol” u bë kompania më e madhe e tregtimit të karburanteve në Shqipëri dhe një ndër më të suksesshmet (në mos më e suksesshmja) sipërmarrje shqiptare. “Çelësi i suksesit janë bashkëpunëtorët”, – rrëfen Shefit Kastrati – “Nëse ke bashkëpunëtorë të mirë, atëherë sipërmarrja shkon mbarë, në të kundërt është e destinuar për të dështuar”. Tregtimi i karburanteve është sipërmarrja më e suksesshme shqiptare. Katër kompani që merren me këtë tregti ndodhen në krye të klasifikimit, duke e kthyer këtë biznes në më fitimprurësin. Ndoshta rritja e çmimit të naftës në 130 për qind brenda 3 viteve, apo “kapja” e tregut nga firmat në fjalë, i kanë kthyer sipërmarrësit në më të pasurit e Shqipërisë e vetë kompanitë në më fitimprurëset. Ndër këto kompani “Kast Petrol” ka arritur të hyjë më së miri në treg, duke u bërë një simbol për atë që përtej oqeanit do të quhej “ëndrra amerikane”. “Ne jemi nga Kruma e Hasit dhe e kemi nisur këtë biznes si shumë të tjerë”, – tregon z. Kastrati. Por, pas gjithë këtyre viteve, “Kast Petrol” e ka paguar mundin e pronarit të saj. “Në kompani janë të punësuar mbi 250 punonjës, ndërsa kemi mbi 30 pika karburantesh në pronësinë e kompanisë, krahas atyre që i furnizojmë me karburant”, – tregon ai. Por, edhe pse në vend të parë të klasifikimit, Shefit Kastrati tregon se periudha më e vështirë është pikërisht periudha që po kalojmë. “Rritja e çmimit të naftës na ka vendosur në pozicion të vështirë. Për sa i përket biznesit, kjo është periudha më e “errët” për tregtimin e naftës”. “Kast Petrol” e ka selinë e saj në Shkozet, e prej aty bëhen transaksionet në të gjithë Shqipërinë dhe jashtë vendit. Pikat e furnizimit me karburant të “Kast Petrol” janë të shpërndara në kudo, duke u përhapur në të gjithë vendin. Kompania është ndër të parat që është marrë me tregtimin e karburantit, e në këtë mënyrë nuk e ka humbur ende tregun e vet. Ndërsa miliarderi Shefit Kastrati shprehet i plotësuar me punën e tij në administrimin e “Kast Petrol”.

Rezart Taçi

Kompania: “Taçi Oil”

Adresa: Sky Tower, Tiranë

Punonjës: mbi 100

Xhiroja vjetore: e pallogaritur

Rendi: 10

Aktiviteti: Tregti karburanti

“Taçi Oil” mbetet një ndër kompanitë më të mëdha në vend, e këtë vit, ka arritur të kalojë në vend të dytë të klasifikimit të kompanive më të suksesshme, e duke bërë pronarin e saj, Rezart Taçin, të dytin më të pasuruar. Aktualisht, kjo sipërmarrje është kompania e dhjetë më e madhe në Shqipëri dhe e dyta ndër kompanitë me pronarë shqiptarë. Aktiviteti i kompanisë ka nisur herët, duke e kthyer atë në ndër më të fuqishmet në tregun e tregtimit të karburanteve. Tregtia e karburanteve shtrihet në të gjithë Ballkanin dhe jo vetëm në Shqipëri. Vendet prodhuese të naftës dhe ato të tranzitimit të saj, normalisht janë në qendër të vëmendjes të “Taçi Oil”. Italia, Rusia, Greqia dhe Rumania janë vetëm një pjesë e shteteve me të cilat kompania bashkëpunon.

Vilma Nushi

Kompania: “Marketing Distribution”

Adresa: Tiranë (Rr. Ded Gjo Luli 3/1)

Punonjës: 70

Xhiroja vjetore: mbi 10 mln euro

Rendi: 11

Aktiviteti: Tregti

Sipas të gjitha studimeve, dy veset e shqiptarëve janë duhani dhe telefonia celulare. Kështu, nuk kishte si të ndodhte ndryshe, kompania që tregton këto produkte ndodhet ndër të parët në vend dhe pronarja e saj ndër më të pasurit e Shqipërisë. Vitin e kaluar ishte në krye të klasifikimit, por këtë vit, Vilma Nushi, ndodhet në vend të tretë, për pasurimin gjatë vitit 2007 dhe muajve të parë të vitit 2008. Ajo është pronarja e kompanisë “Marketing Distribution” dhe e vetmja femër në klasifikim. “Kemi punuar shumë për këtë kompani e ndaj ka arritur të jetë ndër më të suksesshmet”, – tha ajo. “Marketing Distribution” është themeluar në vitin 1997 dhe shumë shpejt filloi tregtimin edhe të kartave SIM, kur telefonia celulare filloi të përhapej në Shqipëri, si edhe të duhanit.

Klaudio Goci

Kompania: “Eko A2”

Adresa: Sky Tower, Tiranë

Rendi: 21

Aktiviteti: Tregtim i karburanteve

“Eko A2” është një kompani tjetër e tregtimit të karburanteve që vjen në krye të klasifikimit në kompanitë më të fuqishme ekonomike shqiptare. Administratori i saj, z. Klaudio Goci, është njeriu i katërt më i pasur shqiptar, në një treg ku çdo gjë është e luhatshme. Në këtë mënyrë, në katër më të pasurit shqiptar, tre prej tyre janë sipërmarrës që merren me tregtimin e karburanteve. Klaudio Goci është një ndër miliarderët e pakët shqiptarë, që ka arritur të ndërtojë një kompani prej asgjësë.

Ylli Braka

Kompania: “Klodi”

Adresa: Rr. e Kavajës, Tiranë

Rendi: 25

Aktiviteti: Tregti

Ylli Braka është njeriu i pestë më i pasur shqiptar dhe sipërmarrësi i vetëm shqiptar që po kryen tregti vetëm me një shtet, i cili ka kapërcyer një vend në klasifikimin e më të pasurve. Kompania “Klodi” është tashmë një shoqëri anonime dhe Ylli Braka është aksionari kryesor i saj, e në këtë mënyrë përfituesi më i madh i dividentit prej miliarda lekësh, që shoqëria ndan çdo vit. “Klodi sh.a.” ka xhiro vjetore prej përafërsisht 20 milionë eurosh, sipas të dhënave zyrtare. “Klodi sh.a.” kryen transaksionet e saj ekonomike, të administruara nga z. Braka vetëm me Greqinë, sipas faqes zyrtare të Dhomës së Tregtisë dhe Industrisë së kryeqytetit shqiptar.

Ardian Peko

Kompania: “Ukrometal”

Adresa: Vorë, Tiranë

Rendi: 28

Aktiviteti: Tregti metalesh

Ndonëse e ka selinë në një fshat të Shqipërisë, kompania “Ukrometal” është kompania e pestë më e madhe me pronarë shqiptarë dhe e 28-a ndër të gjitha kompanitë që veprojnë në Shqipëri. Vendi ynë njihet për pasuritë e mëdha në hekur, nikel dhe në metale të tjera, si për nga pasuria nëntokësore edhe nga tregtia e metaleve. Këtë gjë më së miri mund ta vërtetojë Ardian Peko, njeriu i gjashtë më i pasur shqiptar. Anijet e kompanisë importojnë produkte metali nga Deti i Zi drejt porteve shqiptare. “Filozofia jonë është që të japim më të mirën për klientët tanë. Ne ofrojmë produkte me cilësi të lartë që do të pranoheshin nga ndërtuesit profesionist në çdo vend”, – është motoja e kompanisë.

Xhevat Rira

Kompania: “Rira Oil”

Adresa: Rr. Ali Demi, Tiranë

Faqja zyrtare: www.riraoil.com

Rendi: 29

Aktiviteti: Tregti karburanti

Më i varfri i të pasurve, që merret me tregti nafte është Xhevat Rira. Xhiroja vjetore e kompanisë së tij është disa milionë euro, duke kaluar së tepërmi shifrën 10 milionë euro. Kompania e administruar nga z. Rira, mban mbiemrin e tij dhe quhet “Rira Oil”. Kompania është e treta më e madhe në fushën e naftës në vendin tonë dhe kryen veprimet ekonomike, kryesisht me Rusinë. Sipas faqes zyrtare të kompanisë, ajo zotëron rreth 20-25% të tregut dhe synon zgjerimin e prezencës së saj pranë konsumatorëve në të gjithë territorin e Shqipërisë si dhe në vendet fqinje. Investimi më i rëndësishëm i z. Xhevat Rira është ndërtimi i depozitave të karburantit në zonën e Porto Romanos në Durrës.

Grigor Joti

Kompania: “InfoSoft Systems”

Adresa: Tiranë

Punonjës: 99

Xhiroja vjetore: 1.758.513.224 lekë

Faqja zyrtare: www.infosoftgroup.com.al

Rendi: 31

Aktiviteti: Import-eksport, tregtim aparatura dhe pajisje zyre, shërbime dhe mirëmbajtje të kompjuterëve

Jetojmë në epokën e komunikimit, ku interneti është një nga mjetet kryesore të punës së kujtdo. Për më tepër kompjuteri. Z. Grigor Joti, është pronari i “InfoSoft Systems”, apo thjesht “Infosoft”, siç e njohim të gjithë. Kompania e krijuar prej tij është më e suksesshmja në fushën e informatikës në vendin tonë, duke e bërë atë një shëmbëlltyrë të Bill Gejtsit në Shqipëri. “Infosoft Systems është lider në tregun e IT-së me produktet dhe shërbimet që ofron”, - shprehen përfaqësuesit në faqen zyrtare të saj. E s’kishte si të ndodhte ndryshe. Grigor Joti ka qenë fitues i olimpiadës kombëtare të matematikës në vitin 1974, e aftësitë e shprehura që në atë kohë, e kanë kthyer z. Joti, në biznesmenin më të suksesshëm shqiptar, që ka të bëjë me informatikën.

Samir Mane

Kompania: “Euromax”

Adresa: Qendra Tregtare Univers, autostrada Tiranë-Durrës

Faqja zyrtare: www.euromax.com.al

Rendi: 34

Aktiviteti: Tregti artikujsh të ndryshëm ushqimorë, industrialë etj

“Hyrja e re” në listën e sipërmarrësve më të pasuruar të vitit mban emrin Samir Mane. Ai është pronari i dyqaneve “Euromax”, “Neptun” etj. Ndonëse biznesin në Shqipëri e ka përuruar vetëm pak vite më parë, këtë vit, ai ka arritur të kalojë në vend të nëntë të klasifikimit, të më të pasurve shqiptarë. “Sigurisht të jesh i pasur është shumë mirë, realizon ëndrra dhe dëshira. Ka një limit, ku mbi të cilin është njësoj. P.sh., nëse një njeri i kalon 1 milionë euro, mbi atë shifër puna është rutinë, pra është njësoj”, – kishte deklaruar pak kohë më parë në një intervistë për mediat vizive, Samir Mane.

Genci Dulaku

Kompania: “Edil Al-It”

Adresa: Tiranë

Rendi: 36

Aktiviteti: Ndërtim

Biznesi i ndërtimit ka gjetur një zhvillim të jashtëzakonshëm pas rënies së komunizmit. Mirëpo në shumësinë e kompanive të mëdha, vetëm një arrin në 10 më të mirat për dy vjet me radhë. “Edil Al-It” e administruar nga Genci Dulaku kryen aktivitetin e saj kryesisht në Tiranë, e një pjesë e konsiderueshme të ndërtimeve të reja të kryeqytetit që prej viteve të para të tranzicionit mbajnë nënshkrimin e “Edil Al-It” dhe të aksionarit kryesor, Genci Dulaku. Sot kjo kompani ka shtrirë aktivitetin e saj edhe në fushën e mediave, ku z. Dulaku ka pronësinë e televizionit “Vizion ” dhe bashkëpronësinë e gazetës “Albania”.



2007 2008 pozicionimi

Vilma Nushi Shefit Kastrati L 1

Shefit Kastrati Rezart Taçi L 1

Rezart Taçi Vilma Nushi P 2

Klaudio Goci Klaudio Goci -

Ardian Peko Ylli Braka L 1

Ylli Braka Ardian Peko P 1

Genci Dulaku Xhavit Rira L 1

Xhevat Rira Grigor Joti L 4

Ilir Trebicka Samir Mane L

Plarent Kristo Genci Dulaku P 3

Bejne ndonje bamiresi keta te pasurit apo kane harruar se dikur kane ngrene dhe ata buk me voj e me krip.

Po te kishin bere bamiresira keta nuk ishin pasuruar.

Atyre qe e kane me mund ju lumte.

keta pasuniket e shqiperise jane gati te pijne gjak me pipza jo me te japin bamiresi.