Francë, lindi dje Unioni Mesdhetar

Francë, lindi dje Unioni Mesdhetar
U mblodhën dje në Paris liderët e 43 vendeve. Pjesë e Unionit, edhe Shqipëria

Ka filluar nën diell, në "Grand Palais" në Paris, dita e madhe e lindjes së Unionit Mesdhetar, që zyrtarisht nisi ekzistencën dje pasdite me "bekimin" e Presidentit francez, Nikolas Sarkozi dhe të 42 shefave të shteteve dhe qeverive të mbledhura me këtë rast. Në një kryeqytet të blinduar, punimet e ditës më të shumëpritur të këtij fillim semestri të presidencës franceze të Bashkimit Evropian janë hapur me një mbledhje të ministrave të Jashtëm të Bashkimit Evropian dhe vendeve në jug të Mesdheut, mbledhje kjo e kryesuar nga ministri i Jashtëm francez, Bernard Kushner. Ishin 18 mijë policët e dislokuar përreth godinës historike, të vendosur në mes të bregut të djathtë të Senës dhe "Champs-Elysees"-së, si dhe në pikat e tjera delikate të Parisit, veçanërisht në pallatet më prestigjioze ku janë vendosur liderët. Ky numër i madh trupash të rendit kishte si detyrë të garantonte sigurinë e qindra personave që bënin pjesë në delegacionet e vendeve të ndryshme. Mobilizimi zgjati plot 48 orë pasi shefat e shtetit, që mbërritën dje në kryeqytetin francez, preferuan të qëndronin edhe sot në Paris për të ndjekur paradën ushtarake tradicionale me rastin e 14 korrikut, ditës kombëtare të Francës. Samiti i djeshëm i dha jetë Unionit Mesdhetar, që përbëhet nga 43 shtete: 27 vendet anëtare të Bashkimit Evropian, plus Algjerinë, Egjiptin, Izraelin, Jordaninë, Libanin, Marokun, Mauritaninë, Sirinë, Tunizinë, Turqinë, Shqipërinë, Kroacinë, Bosnjë-Hercegovinën, Malin e Zi, Monakon, si edhe Autoritetin palestinez. I vetmi që mungonte në takimin e djeshëm ishte lideri libian, Muammar Gedafi, që e kundërshton këtë iniciativë. Ndërkohë, në çastet e fundit kishte lajmëruar se do të mungonte edhe Mbreti i Marokut, Mohamedi VI, që gjithsesi u përfaqësua nga vëllai i tij, princi Moulaj Rashid. Unioni Mesdhetar është një ëndërr që po realizohet. Kjo ishte fjalia që shqiptoi ministri i Jashtëm francez, Bernard Kushner, para hapjes së samitit në kryeqytetin francez. "Është një ëndërr që po realizohet, një projekt kolektiv i zhvillimit ekonomik, i paqes, i të drejtave dhe solidaritetit", shpjegoi ai. "Ndryshimet klimaterike, degradimi i ambientit, aksesi tek uji i pijshëm dhe energjia, emigracioni, dialogu mes civilizimeve, si dhe të drejtat e njeriut: Mesdheu është në qendër të të gjitha këtyre çështjeve", ka nënvizuar Kushner, duke shpjeguar se, "të mos bësh asgjë është një rrezik". "Tensionet në rritje dhe pabarazitë që po thellohen gjithnjë e më shumë janë tepër të rrezikshme në këtë epokë të paqëndrueshme", ka vazhduar ai. Por, pavarësisht gjithë kësaj, kjo aktualja është "era e shpresës", tha Kushner. Për progresin e Unionit Mesdhetar, sipas tij, duhen gjetur ide dhe rrugëdalje. "Të gjitha rrugët duhet të eksplorohen", ka shtuar, duke shprehur besimin mbi të gjitha te shoqëria civile dhe sipërmarrjet private. Shefi i politikës së jashtme franceze, në përfundim, lajmëroi se Franca dhe Egjipti do të ishin dy vendet e para që do të marrin bashkë-kryesimin e Unionit Mesdhetar, por nuk dha më shumë detaje për sekretariatin e përhershëm që pretendohet nga Maroku, Tunizia dhe Malta.

Vendet anëtare

Shqipëria, Algjeria, Austria, Belgjika, Bosnjë-Hercegovina, Britania, Bullgaria, Qiproja, Republika Çeke, Kroacia, Danimarka, Egjipti, Estonia, Finlanda, Gjermania, Greqia, Hungaria, Irlanda, Izraeli, Jordania, Letonia, Libani, Libia, Lituania, Luksemburgu, Malta, Mauritania, Monakoja, Mali i Zi, Maroku, Holanda, Autoriteti Palestinez, Polonia, Portugalia, Rumania, Sllovakia, Sllovenia, Spanja, Suedia, Siria, Tunizia dhe Turqia.
Shqip

Mungoka Serbia.