Spiunazhi kinez, këmbëkryq në Amerikë

Spiunazhi kinez, këmbëkryq në Amerikë

Grege Bergersen ishte një veteran i marinës, të cilit i pëlqente të luante bixhoz me raste, por që qëllimin kryesor kishte të fitonte ca para shtesë pas përfundimit të karrierës si analist në Departamentin e Mbrojtjes.

Në moshën 51-vjeçare, me një grua dhe fëmijë për të mbajtur, pyeste veten se si mund të zinte një nga ato vende pune aq të ëndërruara nga njerëz si ai: një post në një prej atyre qindra kompanive të lidhura pas industrisë së mbrojtjes që gëlojnë në kryeqytetin amerikan dhe që lulëzojnë falë kontratave të majme me qeverinë.

Bergerseni mendoi se e kishte gjetur atë që kërkonte në çastin kur u prezantua me Tai Shen Kuo, një zotëri me origjinë nga Tajvani, i cili jetonte prej 30 vjetësh në Shtetet e Bashkuara të Amerikës. Kuo, një sipërmarrës që sillte orendi shtëpiake nga Kina, e njihte aq mirë tregun amerikan sa të kishte siguruar emërimin në një bord shtetëror këshillimi për tregtinë ndërkombëtare. Ai i tha Bergersenit se po ngrinte më këmbë kompaninë e vet të konsulencës në fushën e mbrojtjes.

Tani, Bergersen, Kuo dhe një bashkëpunëtor i tretë, po presin vendimin e një gjykate federale nën akuzën e shumë rasteve të provuara, ku të tre kanë transferuar informacion ilegal në Kinë.

Rastet në fjalë kanë shtuar në qarqet e sigurisë dhe të inteligjencës amerikane dyshimin se nga Pekini po vijnë kërcënime reale. Nga ana tjetër, janë shumë të tjerë të përfshirë në raste si ai i Bergersenit, të cilët prokurorët i etiketojnë si operacione të mirëfillta spiunazhi. Por duhet thënë se janë më pak të qartë: disa shihen më shumë si dhunime të ligjeve të eksporteve dhe se informacioni nuk shkon në zyrat e shërbimeve të fshehta kineze, por ka qëllim t‘u sigurojë përfitime kompanive private.

Sipas dokumenteve të gjyqit, Kuo dhe kolegu i tij, ngritën një kurth në dëm të Bergersenit të atij lloji që në zhargonin e shërbimeve të fshehta njihet si "flamur i rremë". I bënë të besonte analistit të sistemeve të armëve se informacionet shkonin në Tajvan, një aleat i Amerikës, dhe jo në Kinë.

Megjithatë, regjistrimet e shumta të FBI-së tregojnë se Bergerseni e dinte mirë që qe përfshirë në një krim mjaft serioz.

Brenda një makine të marrë me qira, më 10 korrik të vitit 2007, Bergerseni i lutej Kuosë që të mos i tregonte askujt se i kishte marrë nga ai informacionet mbi një shitje të ardhshme armësh në Tajvan. "Nuk ka asnjë dyshim se do të më pushojnë për këtë", kishte thënë. "Madje, as për pushim nuk bëhet fjalë, do më fusin në burg".

Regjistrimet tregojnë se Bergerseni e kishte marrë parasysh këtë rrezik për shkak të premtimeve të Kuosë për një vend pune në kompaninë e vet, ku do të paguhej 4-5 qind mijë dollarë në vit. Ndërkaq i kishte bërë dhurata të vogla dhe e kishte shpënë në Las Vegas, ku mbuloi të gjitha shpenzimet e tepruara (që të gjitha veprimet të ndjekura nga agjentët e FBI-së).

Përtej rastit të Bergersenit, gjatë vitit të shkuar, prokurorët kanë çuar nëpër gjykata rreth një duzinë rastesh të ngjashme, ku evidentohen përpjekje këmbëngulëse nga ana e Kinës për të shtënë në dorë informacione ushtarake amerikane, mbi Tajvanin, mbi teknologjinë detare, atë të vizionit natën dhe pajisjeve që i bëjnë raketat të padukshme për radarët.

Megjithatë, shumë nga ekspertët nuk e thonë me emër çështjen e spiunazhit nga Kina. Ndërkaq të tjerë mundohen ta përkufizojnë me fjalë të bukura: industri shtetërore kineze dhe kompani të kontraktuara nga qeveria që mbështeten te diaspora kineze për të grumbulluar informacione të rezervuara me apo pa dijeninë e tyre.

Një zyrtar i lartë amerikan, i përfshirë në një prej rasteve të spiunazhit nga Kina, tha se "kinezët kanë krijuar një projekt për dërgimin e spiunëve të vegjël me shpresë grumbullimin e sa më shumë copëzave informacioni që në fund do të shërbejnë për të krijuar një mozaik të qartë".

David Szadi, i cili si asistenti i drejtorit të FBI-së drejtonte gjithashtu edhe një divizion kundërspiunazhi deri në çastin e daljes në pension në vitin 2006, tha se "kinezët kanë krijuar platforma të shumëfishta për grumbullimin e informacionit", duke shfrytëzuar studentët, të deleguarit nëpër konferenca, të afërmit e gjithçka të mundshme për hir të grumbullimit të informacionit.

Szadi shpjegoi se hetuesve amerikanë u është lënë të besohet se grumbullimi i informacionit është i organizuar shkel e shko dhe se i është lënë në dorë rastësisë, por "kinezët janë shumë të përqendruar tek ajo që kërkojnë".

Zyrtarët thonë se edhe vende të tjera, ku veçohen Irani dhe Rusia, janë shumë aktivë në fushën e spiunazhit në ShBA. Por Xhoel Brener, zyrtari më i lartë i kundërzbulimit amerikan, tha se veprimtaria e Kinës është shumë më e fortë.

Ai sqaroi gjithashtu se jo të gjitha rastet e transferimit të informacionit drejt Kinës janë pjesë e veprimtarisë së spiunazhit kinez: "Disa instanca janë tërësisht komerciale dhe kemi të bëjmë vetëm me babëzi për të fituar sa më shumë para".

Të dhënat e sakta për mënyrën se si është zhvilluar grumbullimi dhe transferimi i informacionit në rastin e Bergersenit nuk mund të publikohen në mënyrë të detajuar. Ajo që dihet, sipas një dokumenti të FBI-së, truri i të gjithë operacionit ishte një zyrtar kinez me zyra në Hong Kong dhe në Guangzhou, qendra industriale që deri pak kohë më parë njihej si Kantoni. Njeriu në fjalë, i identifikuar vetëm si "zyrtari PRC A", përshkruhet si një zyrtar i lartë i shërbimeve të fshehta kineze, i cili kishte qenë figurë qendrore edhe në dy raste të mëparshme spiunazhi.

Sipas oficerëve amerikanë që janë në brendësi të çështjes, "zyrtari PRC A" kishte dorë edhe në koordinimin e aktivitetit të inxhinierit kinez Çi Mak, i dënuar marsin e shkuar me 24 vjet burgim për dërgimin në Kinë të sekreteve të marinës ushtarake amerikane.

Brener dëshmoi se inxhinieri Mak ishte "agjent i fjetur", i cili diti të gjente shtegun e duhur për të hyrë në industrinë ushtarake. "Kinezët dinë të presin më mirë se kushdo tjetër".
Shqip

Keta i gjen kudo. Urte e bute pa u ndjer po zen vend gjithnje e me shume ne çdo cep te botes.