Fjalori i filozofisë, botim i parë në gjuhën shqipe

“Fjalori i filozofisë”, botim i parë në gjuhën shqipe

“Fjalori i filozofisë” është botim i parë në gjuhën shqipe i cili vjen para lexuesve shkruar nga akademiku Ekrem Myrtezai. Ai përbën, pa dyshim, një kontribut të vyer në fushën e leksikografisë filozofike shqiptare dhe plotëson një boshllëk të dukshëm të kulturës sonë në përgjithësi, dhe të terminologjisë filozofike shqipe në veçanti. Në këtë fjalor janë paraqitur e shpjeguar afro 2000 koncepte apo nocione, shprehje e pohime (kryesisht në gjuhën latine) nga fushat e ndryshme të filozofisë (logjika, gnoseologjia, ontologjia, etika, estetika, antropologjia, aksiologjia, historia e filozofisë, etj.), si dhe nga fushat e tjera, që kanë një afri më të madhe me filozofinë, siç janë psikologjia, sociologjia, politikologjia, jurisprudenca, teologjia, teoria e letërsisë, besimet fetare, etj. Çdo koncept apo nocion, çdo shprehje apo pohim është shpjeguar në mënyrë të atillë, që lexuesi të krijojë një përfytyrim sa më të qartë dhe të fitojë njohuri sa më të sakta për domethënien dhe historinë e konceptit në fjalë. Çdo koncept filozofik, psikologjik, teologjik, sociologjik, etj., në gjuhën shqipe është shoqëruar (në kllapa) me termin gjegjës në gjuhët angleze, frënge, gjermane, etj. Ky fjalor do të jetë një ndihmesë për të gjithë ata që merren me punë teorike, kulturore, shkencore, politike, shoqërore si dhe për arsimtarët e studentët kryesisht për ata që merren me filozofi, psikologji, pedagogji e shkenca humanitare në përgjithësi.