Libri dhe politikanët

Shkruar nga T.O.
Libri dhe politikanët
Kur në Parlament diskutohej buxheti, si rrallëherë debati nga shifra u përqendrua te librat. Pasi kishin bërë një xhiro nga Piramida, deputetët po diskutonin se kush e kishte lexuar botimin e ri të "Veprës Letrare" të Kadaresë. Ndre Legisi, deputeti i LSI-së, u hodh i pari dhe tha se i kishte lexuar të tre vëllimet. Madje, fillimisht vëllimin III, pastaj dy të tjerët. Ndërsa deputeti i PD-së, Pal Dajçi, u shpreh se fatkeqësisht për shkak të angazhimeve kish lexuar vetëm vëllimin e III. Ndriçim Babasi dhe një pjesë e deputetëve të opozitës e justifikoi përgjumjen në seancë pikërisht me arsyen se kishte ndenjur deri vonë për të lexuar "Veprën III" të Kadaresë, që sipas tyre ishte një kryevepër. Por mes debatit kritikë për Kadarenë u dëgjua zëri i Pëllumb Xhufit. "Ju jini të gjithë budallenj", tha Xhufi. "Kadare ka vetëm II "Vepra Letrare" që janë botuar, e treta nuk ka dalë akoma. Pasi dëgjuan këto fjalë, deputetët artdashës filluan të merrem me shifrat e buxhetit duke e cilësuar ekonominë si një fushë ku nuk ua ha qeni shkopin.
Rama nga Boni: Se bone mirë Bomir
Lajmi i shkarkimit të prokurorit të Përgjithshëm, Theodhori Sollaku, e la kryetarin e Partisë Socialiste, Edi Rama, në ajër. Në fakt, jo se u çudit nga lajmi, por realisht ishte në avion duke udhëtuar drejt Gjermanisë. Nga pozicioni ku e shihte veten, Rama lëshoi rrufetë e kritikave ndaj Presidentit Bamir Topi, kryeministrit Berisha dhe ish-kryetarit të tij, Fatos Nano. Me pak fjalë, ia skuqi mirë patriotit të tij tirons. "Nuk e bone mirë Bomir, të paktën të kishte pyt i herë", tha Rama. Pastaj i mori me radhë të gjitha televizionet dhe dha prononcimet e rastit në pothuaj gjithë edicionet informative. Berisha që ndodhej në zyrë dhe shihte reagimet, u habit që në çdo stacion dëgjonte Ramën që fliste në telefon. Sipas burimeve nga Boni i Gjermanisë, Berisha mësohet si i çoi një sms Ramës. "Akoma në shtyllë ti Dedë?!".
Nga një dhjetor në tjetrin
E majta nuk do më zgjedhje të parakohshme, ama protestat do t'i bëjë. Erion Braçe ka ftuar gjithë socialistë të bëjnë provat e zërit për mitingje, pasi në muajin dhjetor do të nisin mitingjet masive kundër qeverisë. Gjithashtu, pranë PS-së është hedhur ideja për hapjen e një palestre për stërvitjen e protestueseve në përplasje me policinë. Nëse nuk do ketë militantë partiakë, atëherë është parashikuar që të merren mitingash nga shoqëria civile, për shkak të nivelet të lartë që kanë në bërjen e protestave. Ndërkohë, po në dhjetor, Partia Demokratike do të nisë ceremoninë e festimit për të kujtuar Dhjetorin 1991. Në sheshin "Skënderbej" të dy grupet do të takohen për të shkëmbyer përshëndetjet e rastit. Bashkia po merr masat për të pastruar zonën nga tullat, gurët dhe çdo mjet që duhet për të protestuar në mënyrë paqësore.