Hosteni

Shkruar nga Qamil Xhani
Doktori "600 mijë dollarë"

Një doktor humbi veshkën e pacientit gjatë operacionit. Duke komplimentuar infermieren për lukun që kishte vënë në operacion, doktori kish harruar se veshka mund t'ia fuste vrapit dhe pa pikë përgjegjësie dhe të mos i bëhet vonë për pacientin. I njëjti doktor, që duket se ka parë shumë filma fantastiko-shkencorë, tha se kohët e fundit kanë filluar t'i ndodhin gjëra të çuditshme. Sa herë dilte nga operacioni, gjente në xhepat e bluzës 50 mijë lekë të rinj. Ndërsa njerëz të panjohur vinin dhe i bënin presion me tufa lekësh në dorë para shtëpisë. Ndërsa kulmi, sipas doktorit, ishte kur zbuloi se në llogarinë bankare kishte 600 mijë dollarë. Por këtë e justifikoi duke mbledhur të gjithë rrogën prej 40 mijë lekësh që ka marrë gjatë 300 viteve të fundit që po punon. Kolegët e tij e ngushëlluan duke thënë se edhe ata kanë kohë që vuajnë nga simptoma të tilla.

Duron-duron, 2 milionë

Ministri i Kulturës, Ylli Pango, e ka ndarë mendjen dhe ka vendosur një bast me veten. "O do vinë në Shqipëri dy milionë turistë ose unë jap dorëheqjen". Kryeministri Berisha për momentin nuk e ka komentuar këtë deklaratë. Por në korridoret e qeverisë ka filluar vendosja e skedinave, 1 x 2, ku fitorja e Pangos ka koeficientin më të lartë. Me ta dëgjuar lajmin Pango, dhe faktin që Berisha mund ta marrë seriozisht bastin, turistë nga gjithë bota kanë filluar të dynden drejt plazheve shqiptare, vetëm që qeveria "Berisha" të mos ketë dorëheqje. Por më seriozisht këtë deklaratë e kanë marrë deputetët e opozitës. Erion Braçe është parë ditët e fundit në Kakavijë, i maskuar si refugjat, duke numëruar turistët në traun e doganës. Ndërsa Andis Harasani dhe Arben Isaraj flitet se janë vendosur në Durrës, me nga një cigare në gojë dhe të veshur si xhamajkanë, kanë zënë pikat strategjike të portit. Vet Pango nuk ka lënë kushëri, shok shkolle apo komshi që ka jashtë shtetit pa i thirrur që të bëjnë mbi pesë hyrje-dalje nga pikat doganore dhe nga kufijtë. Në mes të "gjahut të turistëve", avokat Ngjela ngriti një çështje jo pa rëndësi për ngjarjen në fjalë, që për momentin nuk i është përgjigjur as vet Pango: "Po sikur në plazhet shqiptare të vijnë 1. 999.999 turistë, a do ta japë dorëheqjen Ministri?".

Xhepat e deputetëve

Lëvizja "Mjaft!" bëri lëvizjen e radhës, formoi një skuadër, "Unë Votoj", për të parë pasuritë e deputetëve të Parlamentit. Nga ana e tyre deputetët prej vitesh kanë formuar një skuadër me emrin "Unë bëj lekë", për të bërë garë me njëri-tjetrin. Rezultati ishte shumë ulëritës. Të gjithë deputetët kishin llogari "modeste bankare", që varionin nga milioni te miliardi. Kish dhe ca fakira që s'ia kanë vjelë frutet pushtetit, por skuadra "Unë bëjë lekë" do japë ndihma me tenderime për këtë kategori.

Braçe: "To be or not to be" opozitar

Pas tre vitesh në opozitë, Erion Braçen ka filluar ta brejë ndërgjegjja. Në një intervistë Braçe reflektonte mbi rolin e PS-së, me shprehjen "Të jesh apo të mos jesh opozitar". Dilema hamletiane e Braçes godiste dhe kryetarin e partisë, Edi Rama. Në mbledhjen e Durrësit, Rama i ra si larg e larg dhe tha se ditët e fundit kish parë filmin "Lista e Shindlerit", varianti me kandidatë për deputet, ku Braçe nuk figuronte askund. Më pas thonë se Braçe bëri një dush të ftohtë në pishina.

Mediu-Berishës: O në qeveri, o të hapa kokën me gurë!

Republikanët kanë ngulur këmbë dje para Kryeministrisë se qeveria nuk mund të quhet qeveri pa pasur në gjirin e saj një ministër të PR-së. Kërkesa e republikanëve u bë pak a shumë në një formë dialogut në filmit "Lulëkuqe mbi mure", ku personazhi i thotë partizanit, "O ma jep pushkën, o ta hapa kokën me gur". Duke pasur parasysh suksesin që pati me republikanët në Mbrojtje, Berisha po mendohet gjatë se cili është sektori më pak i dëmshëm ku mund të punojë një republikan. Mendoi si fillim për Ministrinë e Mjedisit, por erozioni i Xhuvelit është më i rrezikshëm për qeverinë. Ideja është që të shpiket një dikaster që të mos ketë asnjë ndikim në jetën e qytetarëve. Por Pal Dajçi tha se kudo që të jenë republikanë kanë efekte shpërthyese.

UNESCO: O Berat, ç'e pate fat

UNESCO këtë herë e bëri si burrat. Kish dëgjuar dhe për bukuritë e Beratit edhe për faktin që aty prej 2400 vitesh kishte zhvilluar "Dialog me Shqipërinë" Edi Rama dhe "Shqipëria në NATO" Sali Berisha. Nga gëzimi banorët u vunë flakën gjithë pyjeve rreth e rrotull, meqenëse UNESKO mban përgjegjësi vetëm për gurët. Flitet se pas Gjirokastrës dhe Beratit, qytetit tjetër që do ketë muhabet me UNESKO-n është Mamurrasi, Bulqiza, Kuçova dhe Fushë-Kruja meqë priti Xhorxh Bushin.

Shkruar nga T.O.
Skënderbeu dhe deputetët e Parlamentit Shqiptar

Parlamenti hapi këtë javë ekspozitën për Gjergj Kastriot Skënderbeun. Në ceremoninë përkujtimore të kësaj figure të madhe, kryetarja e Kuvendin mbajti fjalën e radhës. Duke u ndalur në bëmat e Heroi Kombëtar, Topalli e mbylli fjalimin e saj me shprehjen se, Skënderbeu përveç një luftëtar i zoti, ishte dhe një politikan model. Të befasuar nga zbulimi i figurës së Skënderbeut, deputetët kanë filluar të ndërmarrin një sërë veprimesh për t’i ngjarë atij sado pak. Kështu të gjithë janë vënë në kërkim të përkrenareve me kokë dhie, për t’i përdoruar gjatë fushatave elektorale. Një deputet i njohur i parlamentit është në kërkim të një kali të bardhë në Fushë-Krujë. Ndërsa një tjetër ka porositur shpatën më të mirë. I vetmi problem është se nuk po gjendjet një njeri që të jetë bari dhe deputetët ta pyesin “A don ti Gjin me i luftu turqit”.

Nga dialogu vijmë, drejt dialogut shkojmë

Rama në Divjakë, Berisha në Sarandë. Dy kryetarët kryesorë të partive kanë vendosur ta kalojnë fundjavën në bregdet. Rama me “Dialogun me Shqipërinë”. Berisha ka gjetur një ide krejt ndryshe nga ajo e kryetarit Rama, duke e quajtur “Dialog me qeverinë”. Me pak fjalë fushata ka nisur. Rama e kapi nga Tropoja “Dialogun” e tij me qytetarët e qytetarët. Berisha e kapi nga Jugu me shqiptarët e shqiptarët. Në fund kanë vendosur të takohen në kërthizë të Shqipërisë. Domethënë në Elbasan dhe do bëjnë një tur të përbashkët me emër, “Monolog me veten”. Madje ka dhe një variant artistik për takimin e tyre, titulli mund të jetë “Duke pritur Ilir Metën. Fatos Nano kur e mori vesh këtë punën e “Djall-ogjeve”, tha se dy kryetarët janë shumë mbrapa me këto punët e politikave progresiste. “Unë kam tre vjet që bëj “Dialog me Evropën”, komentoi ish-kryetari. Si përfundim, kur të bëhet bilanci i katër viteve të fundit, mund të themi se nuk u ndërtuan shumë rrugë. Uji me raste vinte një herë në 24 orë. Dritat qëlloi edhe erdhën ndonjëherë. Po hëna ishte e plotë dhe nuk u ndje mungesa. Ndërsa opozita do mburret se iu lëshua dhëmbë për dhëmbë qeverisë. Protestoi ashpër për të drejtat e qytetarëve. Bile-bile, protestoi shumë fortë, me bilbila, gërneta e cyla në Parlament. Por protesta që i dha dërrmën kësaj qeverie, ishte “Protesta e heshtur” me qirinj, në sheshin “Skënderbej”.

I Lëvizuri i lëvizjes Petro Koçit

I ka befasuar të gjithë Petro Koçi teksa dy ditë pasi deklaroi se do të ikte te Lëvizja Socialiste për Integrim dhe njëkohësisht rimblodhi dhe një herë Lëvizjen për Politikë Institucionale në Partinë Socialiste. Deputetët e PS-së, të hutuar pyetën se Koçi sikur e kish mbyllur me Ramën dhe kish nisur të militonte me Metën. Kureshtarët e PS-së iu drejtuan Yllit Dylgjerit për të marrë më shumë informacion. Ky i fundit u përgjigj se Koçi dy muaj pasi të shkonte te Meta fillonte ndonjë tjetër lëvizje brenda Lëvizjes Socialiste për Integrim.

Hit parade in dialog

Edi Rama: Dialog me Shqipërinë

Sali Berisha: Dialog me Qeverinë

Fatos Nano: Dialog me Evropën

Ilir Meta: Dialog për Kushtetutën

Ben Blushi: Dialog me Shoqatat Myslimane

Fatmir Mediu: Dialog me Shtabin e Përgjithshëm të Forcave të Armatosura

Nikollë Lesi: Dialog me Nard Ndokën

Jozefina Topalli: Dialog me Skënderbeun

Ylli Pango: Dialog me CNN

Spartak Ngjela: Dialog me anglosanksonët

Mimi Kodheli: Dialog me Luzhiana Abazin