KLD shkarkon 14 kryegjyqtarë,

Admin Anëtarësuar : 06 Dec 2007 Mesazhe : 1804

KLD shkarkon 14 kryegjyqtarë, tani mandati katër vjet

Nga Bledar Lumani

Katër vjet për drejtuesit e gjykatave. Këshilli i Lartë i Drejtësisë ka vendosur gjatë një mbledhjeje ditën e djeshme që të kufizojë në katër vjet mandatin e krerëve të gjykatave. Si pasojë e këtij ndryshimi janë shkarkuar 14 kryegjyqtarë, 10 të gjykatave të Shkallës së Parë dhe 4 të Apelit, të cilët tashmë e kanë plotësuar mandatin e tyre 4-vjeçar në krye të gjykatave përkatëse.

Kufizimi i mandatit

Në mbledhjen e ditës së djeshme, zhvilluar në Këshillin e Lartë të Drejtësisë, pika kryesore në të cilën janë përqendruar diskutimet ishte pikërisht kufizimi i mandatit të drejtuesve të gjykatave. Kështu, në kuadër të ligjit “Për funksionet drejtuese në gjykata” u miratua që periudha e qëndrimit në detyrë të drejtuesve të gjykatës të kufizohet në kohë. Këshilli i Lartë i Drejtësisë vendosi që mandati i krerëve të gjykatave duhet të jetë katër vjet. Pas miratimit të këtij ndryshimi, KLD-ja konstatoi se 14 drejtuesve të gjykatave në vend u kishte përfunduar ky mandat katërvjeçar. Për këtë arsye u vendos shkarkimi i tyre, ndërkohë që deri në momentin që do të zgjidhen drejtuesit e rinj, ata do të vazhdojnë të qëndrojnë në krye të gjykatave. Përveç kësaj, ata kanë edhe të drejtën që të rikandidojnë përsëri, duke qenë se ligji nuk e përjashton konkurrimin e gjyqtarëve që kanë qenë në poste drejtuese. Si pasojë e mbarimit të mandatit për 14 gjyqtarë, ku 10 prej tyre u përkasin gjykatave të rrethit dhe 4 gjykatave të Apelit, Këshilli i Lartë i Drejtësisë vendosi të shpallë fillimin e procedurës për konkurim. KLD i komunikoi trupës gjyqësore të secilës prej gjykatave të mësipërme të paraqesin kandidaturat për pozicionet drejtuese në këtë gjykata.

Gjyqtarët e shkarkuar

Me kufizimin e mandatit të drejtuesve të gjykatave, plot 14 prej tyre janë shkarkuar ditën djeshme nga Këshilli i Lartë i Drejtësisë. Kështu, gjykatësit e pezulluar janë kreu i gjykatës së Beratit, Fatime Velçani; kreu i gjykatës së Dibrës, Kastriot Selita; kreu i gjykatës së Gjirokastrës, Artan Laze; kreu i gjykatës së Kavajës, Durim Kadiu; kreu i gjykatës së Krujës, Ardiana Berberi. Gjithashtu, janë shkarkuar edhe kreu i gjykatës së Kukësit, Granit Qypi; kreu i gjykatës së Kurbinit, Gramoz Levanaj; kreu i gjykatës së Lezhës, Jak Ndoka; kreu i gjykatës së Matit, Ali Koleci; kreu i gjykatës së Pogradecit, Liradin Lila. Përveç tyre, janë shkarkuar edhe 4 gjyqtarë të Apelit, kreu i Apelit të Gjykatës së Gjirokastrës, Tomor Skreli; kreu i Gjykatës së Apelit të Korçës, Stavri Kallço; kreu i Gjykatës së Apelit Ushtarak, Musa Halili dhe kreu i Gjykatës së Apelit për Krime të Rënda, Vangjel Kallço. Ata do të qëndrojnë në krye të këtyre gjykatave deri në momentin që do të zgjidhen pasardhësit e tyre, ndërkohë që kanë sërish mundësi që të rikandidojnë për postin që ata mbajnë.

Shkeljet, shkarkohet gjykatësi i Apelit të Vlorës, Hanxhari

Këshilli i Lartë i Drejtësisë është ndalur dhe në shqyrtimin e kërkesës së ministrit të Drejtësisë, Enkelejd Alibeaj, për shkarkimin e gjykatësit në Apelin e Vlorës, Vasil Hanxhari. Kjo, duke qenë se pas një kontrolli të inspektorëve të Ministrisë së Drejtësisë, Hanxharit i janë konstatuar disa shkelje gjatë ushtrimit të detyrës. Pasi ka shqyrtuar kërkesën e ministrit, Këshilli i Lartë i Drejtësisë e ka shkarkuar atë nga detyra me motivacionin e “shkeljeve në detyrë”. Një mbledhje më parë KLD shkarkoi edhe kreun e Gjykatës së Apelit të Vlorës, Gjenovefa Gaba, së cilës iu konstatuan shkelje të rënda gjatë ushtrimit të detyrës së saj. Gaba ishte mandatuar edhe për në Gjykatën e Lartë nga ish-presidenti Moisiu, por që mbeti e pavotuar në Kuvend. Tashmë, në vend të saj pritet që presidenti Topi të propozojë një emër tjetër.

Presidenti Topi: Kufizimi i mandatit, i domosdoshëm

Presidenti i Republikës, Bamir Topi, e ka cilësur kufizimin e mandatit të drejtuesve të gjykatave si një hap të domosdoshëm për drejtësinë. “Është një moment shumë i rëndësishëm në filozofinë e re dhe në strategjinë e Këshillit të Lartë të Drejtësisë, e cila sot konsiderohet me një frymë të re në këtë sens. Edhe në sistemin gjyqësor pozicionet e kryetarëve dhe të zv.kryetarëve të gjykatave duhet të dalin nga ajo situatë, e cila për hir të së vërtetës në mjaft raste ka krijuar kushte për klientelizëm, nepotizëm, për një mungesë të dialektikës së zhvillimit edhe në këto pozicione shumë të rëndësishme”, - u shpreh në fjalën e tij Topi. “Ajo që ndodh në çdo fushë të jetës, ku ndihet nevoja e qarkullimit, ndihet nevoja e ridinamizimit të këtyre pozicioneve, ndihet nevoja e konkurrencës, e cila është jetike në demokraci. Pikërisht për këtë arsye bëhet dhe ky kufizim i mandatit të drejtuesve të gjykatave”, - tha presidenti. Ndërkaq, Topi ka vlerësuar edhe inspektimet e fundit që kanë nisur në gjykata, duke nxjerrë në pah edhe disa nga problematikat më të mprehta në këtë sistem të shumëpërfolur.

Gjyqtarët e shkarkuar

Gjykata e Rrethit Gjyqësor Berat, kryetare e së cilës është zonja Fatime Velçani;
Gjykata e Rrethit Gjyqësor Diber, kryetar i së cilës është zoti Kastriot Selita;
Gjykata e Rrethit Gjyqësor Gjirokastër, kryetar i së cilës është zoti Artan Laze;
Gjykata e Rrethit Gjyqësor Kavajë, kryetar i së cilës është zoti Durim Kadiu;
Gjykata e Rrethit Gjyqësor Krujë, kryetare e së cilës është zonja Ardiana Bera;
Gjykata e Rrethit Gjyqësor Kukës, kryetar i së cilës është zoti Granit Qypi;
Gjykata e Rrethit Gjyqësor Kurbin, kryetar i së cilës është zoti Gramoz Levanaj;
Gjykata e Rrethit Gjyqësor Lezhë, kryetar i së cilës është zoti Jak Ndoka;
Gjykata e Rrethit Gjyqësor Mat, kryetar i së cilës është zoti Ali Koleci;
Gjykata e Rrethit Gjyqësor Pogradec, kryetar i së cilës është zoti Liradin Lila;
Gjykata e Apelit Gjirokastër, kryetar i së cilës është zoti Tomor Skreli;
Gjykata e Apelit Korçë, kryetar i së cilës është zoti Stavri Kallço;
Gjykata e Apelit Ushtarak, kryetar i së cilës është zoti Musa Halili;
Gjykata e Apelit për Krime të Rënda, kryetar i së cilës është zoti Vangjel Kallço.