Kthim kampionësh në Sanremo

Kthim kampionësh në SanremoNis nesër edicioni i 58-të i Festivalit të muzikës italiane
Këtë vit nuk ka asnjë shqiptar, megjithatë nuk mund të jesh indifferent ndaj kësaj ngjarjeje. Sepse "Sanremo është Sanremo". Nesër në skenën gjigante të Aristonit nis udhën edicioni i 58-të i Festivalit të Muzikës Italiane. Një nga ngjarjet artistike më të ndjekura, jo vetëm në Itali. Një garë e fortë parashikohet këtë vit. Mes konkurrentëve numërohen emra këngëtarësh, që kanë bërë epokë në muzikën italiane. Mes kampionëve (kështu janë cilësuar këngëtarët big) mund të përmendim emrat e këngëtarëve Eugenio Bennato, Loredana Berte, Toto Cutugno, Mieta, Michelle Zarillo, Amedeo Minghi, Gianluca Grignani, Paolo Meneguzzi, Anna Tatangelo, etj. Tashmë është e njohur formula e festivalit. Kjo skenë shërben jo thjesht për të marrë një çmim, por për të rilidhur kontaktet me publikun dhe për të hedhur në treg albumet e fundit. Nuk është e rastit, që emra të tërhequr pak nga skena, zgjedhin pikërisht "Sanremon" për t'u rishfaqur.

Edicioni i 58-të i festivalit të Këngës Italiane, do të drejtohetnga moderatori i njohur, në këtë rast edhe drejtori artistik i aktivitetit, Pippo Baudo. Do të shoqërohet nga Piero Chiambretti, duke formuar një dyshe mashkullore, që përbën një rast të rrallë. Gjatë pesë ditëve të festivalit do të ketë të ftuar jo vetëm nga Italia, por edhe emra të mëdhenj ndërkombëtarë. Por mbi të gjitha pretendohet muzikë cilësore, që t'i përgjigjet shijeve të të gjithë spektatorëve e telespektatorëve. Duke sjellë stile të ndryshme të muzikë italiane. Nuk do të mungojë postfestivali, që këtë vit vjen i rinovuar. Festivali nis nesër, për tu mbyllur në datën 1 mars. Gjatë dy netëve të para do të garojnë 20 "kampionë" apo këngëtarë big dhe 14 të rinj. Këtë herë për kampionët nuk parashikohen eleminime. Secili prej tyre do ta këndojë këngën tre herë përgjatë pesë netëve. Gjatë dy netëve të para, jurisë demoskopike (shkallës së duartrokitjeve) do t'i nënshtrohen vetëm të rinjtë, prej të cilëve në natën e katërt do të hyjnë vetëm 8. Prej natës së dytë në të tretë do të ketë një "pushim". Do të diskutohet mbi prurjet e këtij viti dhe ecurinë e garës, me të ftuar e protagonistë të festivalit. Gjatë natës së tretë do të performojnë 20 kampionët në një version tjetër të këngës, në krahë të artistëve italianë, ose të huaj. Gjatë kësaj mbrëmjeje, publiku do të mund të votojë përmes televotës. Gjatë natës së katërt do të interpretojnë 8 të rinjtë, ku do të shpallet edhe fituesi. Çmimi i parë do të jetë një rezultante e jurisë demoskopike, televotimit dhe vlerësimit të jurisë profesioniste. E njëjta procedurë do të ndiqet edhe për 20 kampionët që do të performojnë natën finale. Do të ketë edhe një çmim të dytë e të tretë.