"The Bucket List", filmi që po thyen tabu në Hollivud

"The Bucket List", filmi që po thyen tabu në Hollivud"
Nicholson & Freeman, një listë me dëshira për "adoleshentët" 70-vjeçarë!

Të qeshësh me "zonjën" vdekje, kur ajo vjen dhe të thotë se
pak muaj kanë mbetur nga jeta jote? E vështirë, por nuk
është e pamundur. Ndodh jashtëzakonisht rrallë, por
është një fakt në "The Bucket List", filmi që
bashkon në ekranin e madh tre "ujqër" të vjetër të
kinemasë amerikane: dy prej tyre në rolet e
protagonistëve, aktorët Morgan Freeman dhe Jack
Nicholson. Ndërsa i treti në karrigen e regjisorit Rob
Reiner, i njohur me filmat "Stand by me" dhe "When
Harry met Sally". Ishte pikërisht ai që vendosi ta
shndërronte historinë në film, pasi kishte përfunduar
së lexuari faqen e dhjetë të skenarit, ku njëri prej
personazheve, i pyetur se çfarë është duke bërë në
një dhomë spitali, përgjigjet: "Po luftoj për jetën.
Po ju?"
Ajo që Rajner kishte lexuar në faqet e para, ishte një
prezantim i drejtpërdrejtë i dy personazheve dhe fatit të
tyre. Eduard Kol është pronar i madh klinikash, ndërsa
Karter Cambers është një mekanik makinash. Të dy
gjenden në një dhomë spitali, mjaft të sëmurë. Kanë
fare pak muaj jetë dhe mendojnë që t‘i jetojnë në
maksimum. Ndaj përgatisin një listë dëshirash mbi
gjërat që nuk kanë mundur, apo guxuar t‘i bëjnë në
jetë. Por, në fakt, "tre ujqërit" e vjetër e
shndërruan skenarin fillestar nga një histori
melodramatike, në një komedi me emocion dhe të qeshura.
"Është një recetë e saktë, shkruan shtypi, merren dy
nga aktorët më në zë të kinemasë, që janë ende
gjallë, vihen në role që u përkasin pikërisht atyre,
raportojnë për kuptimin e jetës e të vdekjes, mes
bilanceve ekzistenciale dhe reflektimeve filozofike dhe
gjithçka lihet të ecë vetë. Rezultati maksimal nga një
sforcim minimal! Dhe filmi realizon atë që premton: të
qeshura të forta, ndonjëherë të hidhura, ndjenja të
mira dhe ndonjë parantezë prekëse".

Të thyesh një tabu Hollivudi


Të thyesh një tabu hollivudiane nuk është e lehtë.
Një industri që i përgjigjet publikut masiv të
kinemasë, që shënon një moshë mjaft të re, vështirë
se mund të investojë në histori që bën fjalë për
sëmundjen dhe vdekjen. Megjithatë, dora dhe syri i
regjisorit Rob Reiner duket se e ka bindur studion "Warner
Bross" që të japë një buxhet prej 45 milionë dollarësh
për të realizuar filmin. "Ti shkon në një studio dhe
thua: ‘Kam këtë filmin që flet për dy burra të
sëmurë me kancer. Më jepni 45 milionë dollarë‘. Ata
nuk do të nguten për të t‘i dhënë aq shpejt sa mund
të mendosh", është shprehur regjisori gjatë një
interviste në shtëpinë e tij në Brentwood.
Por barriera e parë ishte thyer, meqë në kinemanë
amerikane vit pas viti po prodhohen edhe filma që flasin
për sëmundjen, vdekjen apo moshën e tretë. "The
Bucket List", ose "Nuk është kurrë vonë", në fakt
e lë në sfond vdekjen dhe sëmundjen, ose më saktë i
përdor ato për të nxjerrë një histori, ku dy miq
ndihmojnë njëri-tjetrin në një moment të vështirë
të jetës.
Thyerja e tabusë duket se ka rezultuar e suksesshme edhe
për publikun, pasi filmi grumbulloi rreth 174 milionë
dollarë amerikanë, nga të cilët 93 milionë vetëm në
SHBA dhe Kanada.

Nicholson dhe Freeman, një çift i përsosur


Nëse roli i Karterit ishte vendosur që në fillim se do
të kishte trupin dhe shpirtin e Morgan Freeman, duhej një
tjetër aktor i madh në krah të tij, që të shtonte pak
lezet në historinë e filmit. Dikush që do të mundte
t‘i dhuronte të sëmurit Eduard dëshirën për të shtyrë
takimin përfundimtar dhe për të kryer udhëtimin e
fundit, nën shenjën e gjërave që nuk ishin bërë deri
në atë moment. Ishte një koincidencë e bukur, që
ndërsa Morgan Freeman drejtonte gishtin për nga Jack
Nicholson edhe regjisori Rob Reiner e kishte në mendje
aktorin 70-vjeçar. Kështu u krijua çifti që arriti
t‘i jepte filmit tonet e duhura me aftësi, ironi dhe
ndjenjë, pa rënë në sentimentalizëm. "Nuk ishte
e vështirë të hyje në sintoni me Xhekun", ka deklaruar
Freeman. "I njoh kohët e tij, i kam parë të gjithë
filmat e tij që nga ‘Easy rider‘ e më pas.
Interpretimi me të ishte sikur të kërceje me të
njëjtin ritëm". Në fakt, loja e aktorëve është vlerësuar
mjaft nga publiku dhe nga kritika, të cilët kanë parë si
shkrihen bashkë talenti dhe komiciteti i Morgan dhe Jack.
"Ata janë kasti i të gjithë filmit, konstaton kritika, dhe historia është një mënyrë për të krijuar
situata ku aktorët japin maksimumin e tyre, duke u
përpjekur të japin emocion dhe të shkaktojnë të
qeshura te publiku. E kështu, për të parën herë
aktorët interpretojnë së bashku, por si dy të moshuar
siç dhe janë në të vërtetë".

Pacientë në radhë të parë

Pasi kishte pranuar rolin, Jack Nicholson përfundoi me të
vërtetë në një spital për një ndërhyrje të
thjeshtë në fyt dhe ka pasur mundësinë që të
shfrytëzojë atmosferën e spitalit për t‘u futur sa më
mirë në personazhin e tij. "Kam kaluar disa kohë
nëpër spitale, ndonëse kjo ishte e para herë që shkoja
si pacient", është rrëfyer Nicholson. "Kam punuar
edhe në komplekse spitalore dhe mund të them se jam një
ekspert në këtë pikë". Ashtu si në filmin e
Milos Forman, edhe në "Bucket list" është personazhi
i Nicholson që i zbulon shokut të dhomës një tjetër
jetë jashtë mureve të spitalit. Fillimisht Nicholson e
kishte kthyer mbrapsht skenarin, duke thënë se nuk donte
të bënte një film kaq të lehtë. Por, pas ripunimit që
i bëri skenaristi Zackham, doli një skript mjaft i
arrirë dhe Nicholson vendosi të mos e refuzonte.

Disa fakte kureshtare rreth filmit


Jack Nicholson dhe Morgan Freeman qethën kokat për këtë film.
Justin Zackham e shkroi skenarin për dy javë.
Si regjisori Rob Reiner ashtu edhe Morgan Freeman, pa folur
me njëri-tjetrin kishin menduar se rolin e Eduard Kol mund
ta luante Jack Nicholson. Përvoja personale që Jack
Nicholson ka pasur në spital ishte një prioritet që shtoi
disa detaje më shumë gjatë xhirimeve të filmit. Justin
Zackham shkroi rolin e Karterit, duke e pasur në mendje
për t‘ia dhënë aktorit Morgan Freeman.
Alfonso Freeman, që luan në film djalin e Karter, është
edhe djali i vërtetë i Morgan Freeman.

Skeda e filmit
Titulli: "The Bucket List" ("Nuk është kurrë
tepër vonë")
Regjia: Rob Reiner

Skenari: Justin Zackman

Gjinia: Aventurë, komedi, dramë
Aktorët: Jack Nicholson, Morgan Freeman, Sean Hayes
Kohëzgjatja: 97 minuta
Sinopsi : Miliarderi Eduard Kol dhe mekaniku i thjeshtë
Karter Çambers jetojnë në dy botë krejt të ndryshme.
Por kryqëzimet e jetëve të tyre ndërthuren kur ndajnë
të njëjtën dhomë spitali, ku zbulojnë se kanë dy
gjëra të përbashkëta: një dëshirë për të kaluar
kohën që u ka mbetur duke bërë gjithçka që kanë
dashur të bëjnë dhe një nevojë të paditur më parë
për të pranuar atë që janë. Së bashku, nisin një
udhëtim për ta shijuar jetën dhe duke iu gëzuar një
miqësie të re…