Përvijohet “e djathta e re”

anetaret me aktiv Anëtarësuar : 08 Dec 2007 Mesazhe : 313

Përvijohet “e djathta e re”
Kreshnik Kuçaj
Brenda mazhorancës duket se kanë nisur diskutimet për mundësinë e krijimit të një poli tjetër politik ku pjesë e tij nuk do të jetë Partia Demokratike. Sikurse bëjnë të ditur burimet brenda mazhorancës, disa nga aleatët e djathtë kanë rikthyer në “tryezën” e diskutimeve mundësinë e krijimit të një koalicioni të vegjlish në prag të zgjedhjeve të ardhshme. Por teksa në “nëntokën” e së djathtës debatet duket se vlojnë, në sipërfaqe mbërrijnë vetëm reagimet. Një përfaqësues nga PDR, i tha dje fare rastësisht “Korrierit” se në rast se nga ideja për polin e ri të së djathtës do të kalohet në veprime konkrete, atëhere kjo parti do të pozicionohet kundër kësaj, duke mos e lënë në “baltë” Partinë Demokratike. “Edhe unë kam dëgjuar të flitet për një ide të tillë, megjithëse ende në mënyrë jo të qartë”, tha dje Tritan Shehu i PDR-së i cili shtoi: “Kjo varet nga afinitetet politike kryesisht, por dhe nga elemente pragmatiste. Cilido duhet të bëjë zgjedhjen e tij për formën e bashkëpunimit politik” deklaron nënkryetari i partisë së Pollos. Ndërkohë, ai theksoi se në rast se do të nisnin diskutimet serioze për krijimin e një poli tjetër brenda kampit të djathtë, atëhere reformatorët do të ishin absolutisht kundër. Ai thotë se partia e tij i respekton aleatët e tjerë, ”por kur vjen çështja e lidhjeve politike, këtu ndërhyjnë elementë të tjerë” ndërsa deklaron se nuk do të pranojë që të bëhet pjesë e këtij poli. “Në radhë të parë është afiniteti politik ai që është determinues. Duke analizuar në këtë prizëm unë do të përjashtoja në mënyrë kategorike një koalicion të PDR-së, qoftë dhe vetëm me forca të djathta, nëse me atë grupim nuk do të jetë dhe PD. Ky është një nga elementet e pa negociushëm për ne dhe e ka bazën jo në shkaqe sipërfaqësore, por në shkaqe themeltare politike” deklaron nënkryetari i PDR-së, Tritan Shehu. Sipas tij, Partia Demokrate e Re do të krijojë lidhje të ngushtë vetëm me Partinë Demokratike në fillim, dhe pastaj me partitë e tjera. “Aleanca, koalicioni apo forma të tjera lidhjeje shumë më të ngushta tonat, do të jenë në radhë të parë vetëm me PD e më tej me të tjerët. Kjo është kërkesa jonë e qartë për koalicionet apo mënyra të tjera lidhjeje politike nesër” thekson Shehu.Në të njëjtën linjë duket se është edhe aleati tjetër Arian Starova i Partisë Bashkimi Liberal Demokrat. Ai thotë për “Korrierin” se nuk do të pranojë në asnjë mënyrë që të dalë në zgjedhje pa Partinë Demokratike. Në rast të kundërt, thotë Starova, do të dal i vetëm në zgjedhje. Në këtë mënyrë, Starova lë të kuptohet se edhe ai do të jetë kundër një poli të dytë brenda së djathtës duke krijuar tërthorazi një ide më të qartë se kush mund të jenë themeluesit e këtij poli.

Ideja e krijimit të një poli të tretë politik lindi që në momentin e nisjes së bashkëpunimit mes dy partive të mëdha PD dhe PS, ku partitë e vogla të të dyja kampeve u bashkuan në deklarata duke kundërshtuar ndryshimet kushtetuese, sidomos për çështjen e reformës zgjedhore. Kjo solli edhe lindjen e debateve brenda të dyja kampeve politike, gjë që tek e majta solli edhe krijimin e një poli tjetër politik. Shkëputja e Lëvizjes Socialiste për Integrim nga bashkëpunimi me Partinë Socialiste, dhe largimi po ashtu i PDS-së dhe PAD-së, solli krijimin e një poli të dytë brenda së majtës. Ndërkohë, në kampin e djathtë kjo ka mbetur akoma një çështje në diskutim. Qarkullon mendimi se republikanët, demokristianët e ndonjë parti tjetër e djathtë mund të shkëputej e të dilte si koalicion më vete në zgjedhjet e 2009-ës, pa Partinë Demokratike, duke krijuar kështu një pol të dytë brenda së djathtës.

Ndoka: ”Koalicioni ka probleme”Kryetari i Partisë Demokristiane ka deklaruar dje nga qyteti i Shkodrës se koalicioni i djathtë ka probleme.Gjatë fjalës së tij para anëtarësisë së PDK-së në Shkodër, Ndoka ka kritikuar mungesën e tryezave dhe konsultave me partive të koalicionit dhe Partisë Demokratike. “Ka probleme në funksionimin e vetë koalicionit; mungojnë tryezat dhe konsultat institucionale, në ndonjë rast mungon edhe besimi reciprok, por në tërësi koalicioni funksionon e ka shanset të korrigjohet dhe të përmirësohet për të siguruar një mandat tjetër qeverisës” ka deklaruar Ndoka. Duke folur për ndryshimet kushtetuese, Ndoka theksoi se kritikat dhe kundërshtitë e Partisë Demokristiane ishin të drejta pasi këto ndryshime nuk u reflektuan në ndryshimet në Kodin Zgjedhor. “Megjithatë përfitoj edhe njëherë nga rasti të shpreh publikisht shqetësimin për vonesën e ndryshimeve në Kodin Zgjedhor, në mënyrë që vërtetë Shqipëria të ndahet njëherë e mirë nga praktikat elektorale të dështuara e konfliktuale”, tha Zoti Ndoka përpara anëtarësisë shkodrane, e cila zgjodhi edhe kryetarin e saj të ri. Ndërkohë, gjatë deklaratës së djeshme Ndoka tha se tashmë problemet brenda PDK-së kanë përfunduar.