Zyrat e boshatisura të PD-së

Admin Anëtarësuar : 06 Dec 2007 Mesazhe : 1793

20/04/2008 Zgjidhja

Zyrat e deputetëve “zëvendësojnë” ato partiake

Zyrat e deputetëve në çdo zonë elektorale ku ata kanë fituar duket se janë e vetmja lidhje mes PD-së dhe elektoratit. Pothuajse të gjithë deputetët e PD-së në kryeqytet kanë çelur nga një zyrë në zonën e tyre dhe një herë në javë organizojnë pritjen me popullin. Zakonisht, dita kur dikush mund të takojë një deputet në zyrën e tij është e premtja, por koha është e kufizuar, 2-3 orë. Zyrat janë të hapura çdo ditë dhe personat e interesuar, nëse nuk kanë mundësi tjetër për të komunikuar me deputetin që duhet të përfaqësojë interesat e tyre në Kuvend, mjafton të shënojnë emrin në personin e punësuar nga deputeti, që është sekretari apo sekretarja e tij. Në një bllok, personi që viziton zyrën elektorale të deputetit shkruan emrin dhe problemin që ka, ndërsa i duhet të presë ditën e premte për të zhvilluar takimin. Zyrat janë kompletuar dhe paguhen nga vetë deputetët, po kështu edhe personi i punësuar në to. Kryesisht këto zyra ndodhen në të njëjtat vende që në zgjedhjet e fundit parlamentare (2005) kanë shërbyer si shtabe elektorale, çka është më e thjeshtë për t’u gjetur nga të interesuarit. Gjithsesi, edhe në këto zyra vizitat janë të pakta, me përjashtim të ditës së premte, kur dihet se deputeti i zonës mund të gjendet në zyrën e tij. Më e thjeshtë është për të takuar një deputet që s’ka post ministror, kjo për faktin se ai ka më pak angazhime dhe ka një kohë më të bollshme. Por edhe për deputetët, ndonëse i përkasin mazhorancës qeverisëse, nuk është e lehtë përballja me elektoratin. Kundrejt kërkesave të banorëve të zonës, të mandaturit duket se janë të pafuqishëm për t’i zgjidhur dhe jo në pak raste ato ngrenë supet ose pohojnë shkurt: “Do shikoj se ç’mund të bëj”. Nuk përjashtohen edhe rastet kur për të dalë nga situata që krijohet nga zgjedhësit e tyre ata silurojnë edhe ministra apo drejtues të institucioneve, duke shprehur në këtë mënyrë edhe pakënaqësitë e tyre ndaj asaj që po ndodh. Hallet dhe problemet që parashtrohen në takime të tilla me deputetin e zonës janë nga më të ndryshmet, por kryesisht ato kanë të bëjnë me punësimin. Pjesa më e madhe e zgjedhësve kërkojnë një vend pune, të tjerët kërkojnë një punë më të mirë, por ka edhe të tjerë që kërkojnë prej të zgjedhurit të tyre, të bëjë çmos për të zgjidhur problemet e komunitetit, si në infrastrukturë, ujë të pijshëm etj. Ndonëse problemet që parashtrohen në shumicën e rasteve nuk janë kompetencë e deputetëve, këto të fundit janë të vetmit që mund të takohen më lehtë.

Prej kohësh në selinë qendrore të partisë nuk shkelin drejtuesit kryesorë

Zyrë funksionuese konsiderohet ajo e organizimit, e cila duket se shpërndan vetëm tesera

Partia Demokratike duket se është kthyer në një parti elektorale. Prej gati tre vjetësh, zyrat e drejtuesve kryesorë të kësaj partie qëndrojnë të mbyllura dhe ato rrallë vizitohen nga poseduesit e tyre. Të vetmet raste kur në PD mund të takosh një funksionar janë ditët kur zhvillohen mbledhjet rutinë të kryesisë, ose kur në të rrallë zhvillohet mbledhja e Këshillit Kombëtar. Të dy nënkryetarët e partisë kanë kohë që nuk çelin zyrat e tyre. E njëjta situatë është edhe për sekretarët, ndërsa zyrat ç’kyçen vetëm kur ato pastrohen. Madje, edhe sheshi përpara selisë së PD-së është i boshatisur dhe shumë rrallë mund të gjesh makinën e ndonjë funksionari partie të parkuar. Dikur rojat nuk lejonin që të parkoje makinën përballë me selinë, atje parkohej automjeti i kryetarit të PD-së, por tani vendi është bosh dhe askush nuk merr mundimin për të penguar drejtuesit e automjeteve për të lënë makinat e tyre.

Situata

Nëse shkon për të takuar një nga drejtuesit e PD-së, e vetmja zyrë ku të drejton roja i godinës është një zyrë në katin e parë, mbi derën e së cilës shkruhet “Organizimi”. Më kot lodhesh për të pyetur nëse në selinë qendrore të Partisë Demokratike mund të gjendet ndonjë funksionar, pasi vetë roja të thotë: “Nuk ka njeri, mos u lodh kot”. Kjo është shprehja që përsëritet në çdo orë të ditës, ndërsa shoqërohet me fjalinë “po deshe mund të pyesësh njëherë në organizim”. Në zyrën e vogël të katit të parë duket se e vetmja procedurë që kryhet është kërkesa për të marrë një teserë partie. Në të rrallë në këtë zyrë mund të gjesh sekretarin përkatës, që përbën edhe funksionarin më të lartë që është edhe i vetmi nga strukturat drejtuese të partisë që mund ta gjesh të hyjë dhe të dalë në seli.

Ndoshta kjo është periudha më e qetë edhe për tre punonjësit që prej vitesh ruajnë selinë e PD-së. Ata presin vetëm ndërrimin e turneve, ndërsa vizitorët janë të rrallë. Tashmë është mësuar se në selinë e PD-së nuk mund të gjesh njeri dhe për të takuar një deputet, një ministër apo një tjetër drejtues të lartë të kësaj partie, duhet të shkosh të qëndrosh përpara derës së Kuvendit, ministrisë apo institucionit ku ai është punësuar apo e drejton. E njëjta panoramë është edhe në zyrat e degës së PD-së në Tiranë. Prej kohësh drejtuesit e saj janë emëruar në poste ministrore, ndërsa zyrat e dikurshme të tyre në selinë e PD-së qëndrojnë të mbyllura. Të dy drejtuesit kryesorë të degës më të madhe të partisë kanë kohë që nuk shkelin në zyrat e tyre të dikurshme, ndërsa në të rrallë atje mund të gjesh një person që nuk di se ç’përgjigje t’u japë njerëzve që kërkojnë një takim apo duan të zgjidhin një problem. Në një regjistër, fletët e të cilit janë zverdhur, mund të shquash emrat e personave që kërkojnë takim, ndërsa në një tjetër, edhe më të vjetër, mund të gjesh emrat e anëtarëve të vjetër dhe të rinj të partisë.

Kafet e boshatisura

Mungesa e zyrtarëve në selinë e PD-së ndjehet edhe në dy-tri lokalet e vogla rreth kësaj selie. Në pjesën më të madhe ato janë bosh dhe tek-tuk ulet dikush thjesht për të kujtuar se dikur, më shumë se tre vjet më parë, pinte kafen apo çajin e përditshëm. Klientët që vazhdojnë të rrufisin kafenë janë kryesisht shoferët e deputetëve, por edhe militantët që më tepër sesa shpresojnë të takojnë një zyrtar në PD, takojnë pronarët e lokaleve ku harxhonin pa masë kohën kur partia ishte në opozitë. “Shumë rrallë vijnë për të pirë ndonjë kafe apo çaj ndonjë nga funksionarët e partisë. Madje, edhe kur vijnë, nuk qëndrojnë gjatë”, shprehet një prej pronarëve të lokaleve pranë PD-së, i cili dikur kishte si klientë shumë nga ministrat apo drejtuesit aktualë të shtetit.

Forumet

Mungojnë mbledhjet e shpeshta

Që prej fitores së Partisë Demokratike në zgjedhjet parlamentare të 2005-s mungojnë takimet e shpeshta apo masive, qoftë edhe me drejtuesit e degëve apo nëndegëve. Kryesia e PD-së u mblodh pak ditë më parë në një mbledhje të shpejtë, të paparalajmëruar, për të diskutuar mbi reformën zgjedhore, ndërsa prej një kohe të gjatë ky forum partie nuk mblidhej. E njëjta gjë ndodh edhe me Këshillin Kombëtar të PD-së, i cili për herë të fundit është mbledhur në shtator të 2007, ku zgjodhi nënkryetarin e PD-së, Astrit Patozi, në vend të Bamir Topit, pas zgjedhjes së tij në postin e Presidentit të Republikës. Kjo ishte e vetmja pikë e diskutuar në këtë mbledhje të fundit të Këshillit Kombëtar, i cili nuk dihet se kur do të mblidhet më. E vetmja strukturë e cila duket se funksionon në mënyrë të përjavshme është grupi parlamentar, i cili mblidhet një herë në javë, ditën e hënë, dhe mbledhjet zhvillohen në godinën e Kryesisë së Kuvendit. Formati i këtyre mbledhjeve është i njëjtë me ato që zhvilloheshin kur PD-ja ishte në opozitë. Ato nisin me fjalimin e mbajtur nga kryetari i PD-së, Sali Berisha, njëkohësisht Kryeministër dhe më pas punimet zhvillohen me dyer të mbyllura. Këto janë të vetmet momente kur deputetët mund të përçojnë para Kryeministrit apo ministrave të PD-së kërkesat e elektoratit të tyre, vërejtjet, kritikat, si dhe të kërkojnë më shumë vëmendje për zgjedhësit e zonave të tyre.

Organizimi çalon edhe në bazën e partisë

Nëndegët e Partisë Demokratike jashtë funksionimit

Duket se situata e krijuar në selinë qendrore të partisë, ku tërësisht zyrat e funksionarëve të partisë janë të mbyllura në ditët më të shumta, pasqyrohet edhe në strukturat në bazën e partisë. Në bazë të statutit, PD-ja është e organizuar në degë dhe nëndegë (këto janë të shtrira në rrethet e mëdha), por panorama është e njëjtë: tashmë janë harruar fytyrat e drejtuesve, madje në ndonjë rast edhe emrat e tyre. Në qytetin e Tiranës, PD-ja ka të ngritura 11 nëndegët e saj që përkojnë me 11 zonat elektorale të qytetit apo 11 minibashkitë e kryeqytetit. Secila nëndegë në organizim ka kryetarin, nënkryetarët, sekretarin e saj, si dhe kryesinë, por asnjëra prej tyre nuk funksionon që prej më shumë se tre vjetësh. Pothuajse të gjitha zyrat ku janë vendosur nëndegët e PD-së janë të mbyllura dhe ato mund të dallohen se janë zyra partiake vetëm nga tabelat e vendosura mbi to. Që prej zgjedhjeve të 2005-s, nëndegët e PD-së në Tiranë nuk mblidhen, ndërsa duket se barra e organizimit apo e lidhjes mes drejtuesve lokalë partiakë dhe zgjedhësve mbahet vetëm nga deputetët, apo drejtuesit e minibashkive ku ka fituar PD-ja. Pjesa më e madhe e kryetarëve të nëndegëve janë të punësuar në administratën shtetërore ose janë të zgjedhur vendorë. Kaq ka mjaftuar që ata të harrojnë zyrat e partisë. E njëjta gjë ndodh edhe me nënkryetarët apo sekretarët, ndërsa anëtarët e kryesive të nëndegëve, një pjesë e të cilëve janë të papunë, nuk kanë asnjë arsye pse të vazhdojnë të merren ose të bëjnë jetë partiake. Madje, edhe ata drejtues lokale partie që sot janë këshilltarë në këshillat e minibashkive, nuk shfaqen ose i vizitojnë shumë rrallë selitë e partisë. Në këtë mënyrë, strukturat kryesore të PD-së në organizimin e saj duket se janë jashtë çdo funksioni. “Prej kohësh nuk zhvillohen mbledhjet e strukturave. Nuk ka kërkesë llogarie dhe për më tepër zyra e nëndegës hapet jo më shumë se dy herë në muaj. Edhe në ato pak raste kur zhvillohen takime rutinë nuk kemi ç’të diskutojmë, pasi problemet janë të shumta”, shprehet një prej anëtarëve të kryesisë së nëndegës nr. 3 të PD-së në Tiranë. E njëjta panoramë shtrihet në të gjitha nëndegët, në të 11 njësitë e kryeqytetit, ku militantët e partisë kanë harruar edhe emrat e atyre që drejtojnë këto struktura.

Njerëzit që dikur mbushnin sheshet janë lënë mënjanë dhe ndihen të braktisur

PD, militantët të zhgënjyerit dhe të harruarit

Militantët e PD-së, njerëzit që dikur mbushnin sheshet dhe kurrë nuk e kishin braktisur këtë parti, edhe në ditët më të vështira të historisë së saj, duket se janë edhe më të zhgënjyerit, që kur kjo parti fitoi zgjedhjet më 2005. Shumë prej tyre nuk i shikon më në sheshin përballë Partisë Demokratike, madje ato mungojnë edhe në takimet festive që organizohen nga kjo parti në rastet e përvjetorëve.

Zhgënjimi

Dikur mbushnin sheshet dhe sallat. Dikur ishin në rreshtat e para të protestave, ndërsa sot janë në hije. Të konsideruar si pjesa më vitale e partisë, militantët duket se nuk kanë marrë atë që mendonin në 8 vitet kur PD-ja ishte në opozitë. Shumë prej tyre u pushuan nga puna pas zgjedhjeve të vitit 1997 dhe vite me parë shpresonin se do të gjenin të njëjtin vend pune apo një tjetër punë kur PD-ja të merrte pushtetin. Por për pjesën më të madhe të tyre nuk ndodhi kështu. Ata sot ndihen të harruar dhe zhgënjyer nga partia që e mbështetën për një kohë të gjatë, ndoshta që nga themelimi. Në ditët e para të fitores së zgjedhjeve të PD-së në 2005-n, shumë prej tyre mendonin se gjetja e një vendi pune nuk do të ishte e vështirë, madje rastet kur ata caktonin punën që do bënin nuk ishin të pakta. Ndërsa sot, një pjesë e konsiderueshme e tyre nuk mund të thonë asgjë, përveçse të shprehin pakënaqësitë dhe mllefin e tyre për ata që ndodh. Nuk e kanë të lehtë të lëshojnë kritika në drejtim të personave që dikur i ftonin në sheshe, ndërsa në fund thonë: “Zgjedhjet do të vijnë sërish”. Vazhdojnë të jenë klientët që frekuentojnë më shpesh lokalet rreth PD-së, por nuk janë më aktivë si më parë. Nëse ulesh dhe bisedon thonë se janë të papunë, ndërsa fajësojnë klanet dhe grupet e shfaqura në PD. Mllefi i tyre është edhe më i madh kur shohin në ekrane televizori apo që kalon aty pranë ndonjë zyrtar, sado i vogël, i cili as nuk i përshëndet. Një pjesë e tyre kërkojnë punë për të mbajtur familjet, të tjerë janë të zhgënjyer sepse shpresonin në ndonjë punë më të mirë. Por shumë prej tyre zhgënjehen edhe më shumë kur dëgjojnë apo marrin vesh se një i afërm i tyre është pushuar nga puna. Në raste të tilla nuk flitet më për kritika, ndërsa sharjet lëshohen nga më të rëndat. “Kujtohen kur vjen fushata, por këtë herë do të jetë vonë. Le t’i bëjnë fushatat me ata që mbajnë apo kanë marrë në punë”, shprehet një prej militantëve demokratë, teksa rrufit një kafe vetëm pak metra larg selisë së PD-së.

Imazhi i PD

Faqja internetit jashtë funksionit

Prej gati 10 ditësh faqja zyrtare e internetit të Partisë Demokratike është jashtë funksionimit. Në këtë faqe jepen të dhënat mbi anëtarët e kryesisë, Këshillit Kombëtar, grupit parlamentar, rezultatet zgjedhore të 2005-s dhe ato të zgjedhjeve vendore të 2007-s, statutit etj. Kryesisht, faqja e internetit të PD-së pasqyron aktivitetet e Kryeministrit dhe kryetarit të PD-së, si dhe takimet më të rëndësishme të drejtuesve të kësaj partie. Mosfunksionimi i kësaj faqeje ditët e fundit, sipas zyrtarëve të PD-së, lidhet me faktin se ajo do të ndryshojë dhe do të dalë me një format dhe imazh tjetër.

Deklarimet

Të mos harrohen militantët

“Militantët janë pjesa më vitale dhe ata nuk duhen harruar”. Janë këto deklarimet e dhëna herë pas herë nga drejtuesit e Partisë Demokratike, sa herë ata zhvillojnë takime në salla të hapura apo të mbyllura, në raste festash apo në takime me strukturat e partisë. I njëjti udhëzim është dhënë edhe nga drejtuesit e grupeve të punës që po merren me riorganizimin e PD-së, në kuadër të aplikimit “Një anëtar, një votë”, për zgjedhjen e një pjese të strukturave drejtuese të partisë. Deputetë të PD-së në çdo takim të tyre, qoftë në grupin parlamentar, ashtu edhe në takime informale, ngrenë si shqetësim mungesën e punësimit të militantëve. Madje, nuk janë të pakta rastet kur në mbledhjet me dyer të mbyllura të grupit parlamentar lëshohen kritika të ashpra ndaj ministrave apo drejtuesve të institucioneve. Pak ditë më parë, gjatë një takimi me zgjedhësit e zonës së tij, deputeti Besnik Mustafaj do t’u kërkonte kolegëve të tij deputetë të Tiranës që të takohen me elektoratin, që të insistojnë në zgjidhjen e problemeve dhe halleve të tyre. Madje, ai kërkoi që në kuadër të decentralizimit të kompetencave të pushtetit vendor, deputetët duhet të merrnin rolin që u takon dhe të kërkonin prej

Metropol