Sytë e Hollivudit tek Masiela Lusha

Sytë e Hollivudit tek Masiela Lusha
Aktorja e cila ka ngjitur shumë shpejt shkallët e Hollivudit, shqiptarja Masiela Lusha, është shfaqur për publikun amerikan në premierën e filmit më të fundit të fitueses së çmimit Oskar, amerikanes Jodie Foster dhe yllit të filmit 300, Gerard Butler. Masiela Lusha ishte e ftuar speciale në premierën e filmit “Nim’s Island”, ndërkohë që të gjitha kamerat dhe aparatet fotografike ishin përqendruar te shqiptarja, e cila prej disa vitesh interpreton në serialin e suksesshëm, George Lopes Show.
Gjigandi i filmit, “Fox”, vendosi që në premierën botërore të filmit “Nim’s Island”, në Los Anxheles, të ishte e pranishme edhe Masiela, megjithëse ajo nuk interpreton në këtë film. Kjo pasi ajo ka qenë e angazhuar me një tjetër projekt. Masiela ka përfunduar xhirimet për një produksion shqiptar, e pikërisht për filmin më të fundit të regjisorit Fatmir Koçi, “Koha e Kometës”, film që pritet të dalë së shpejti në kinema.
Në këtë film Masiela Lusha luan rolin e Anjezës, ndërkohë që skenari është bazuar në librin e Ismail Kadaresë, “Viti i Mbrapshte”. Publiku amerikan ishte mësuar ta shikonte Masi-elën brune, ndaj dhe prania e saj në premierën e filmit “Nim’s Island” i ka habitur të gjithë, sepse ajo është shfaqur bionde, ashtu sikurse e shihni edhe në fotografi. Shkak për ndryshimin e ngjyrës së flokëve ka qenë pikërisht roli i saj në filmin “Koha e Kometës” të Fatmir Koçit.
Masiela Lusha ka lindur në Tiranë, por familja e saj emigroi në Shtetet e Bashkuara të Amerikës kur ajo ishte ende e vogël. Ajo ka luajtur në një sërë filmash televiziv, por gjithashtu e ka prekur prej kohësh ekranin e kinemasë me një sërë realizimesh të suksesshme. Një tjetër projekt i suksesshëm i Masiela Lushës do të jetë pjesëmarrja në filmin horror, “Blood, the Last Vampire”. Në këtë film ajo luan rolin e Sharon, ndërkohe që premiera botërore do të jetë këtë vit në Japoni.
Burimi: Gazeta Shqiptare