Liria ekonomike, Shqipëria më keq se vjet, e 136-ta në botë

Admin Anëtarësuar : 06 Dec 2007 Mesazhe : 1793

Liria ekonomike, Shqipëria më keq se vjet, e 136-ta në botë

Nga Fitim Zekthi

Liria për të bërë biznes në Shqipëri është përkeqësuar krahasuar me një vit më parë dhe ka zbritur në vendin e 136-të në botë mes 178 vendeve. Raporti “Doing bussines” i Bankës Botërore e ka renditur vendin tonë pas dhjetëra vendeve të Afrikës dhe Azisë, ku shumë syresh dallohen për paqëndrueshmëri të thellë politike dhe sociale. Shqipëria është klasifikuar edhe pas Bosnjës dhe Serbisë në Ballkan, duke zënë vendin e fundit dhe padiskutim të fundit në Europë. Vende të tilla, si: Zambia, Gambia, Burkina Faso apo Uganda, Lesoto dhe Malavi janë para Shqipërisë në raportin e lirisë së të bërit biznes. Shqipëria është mes Iranit dhe Sirisë, një vend më keq se vitin e kaluar.
Raporti thekson se, shumë tregues të lirisë ekonomike janë përkeqësuar ndjeshëm, ku ndër më të thekshmit është regjistrimi i pronës, i cili ka rënë nga i 77-ti që ishte vitin e kaluar në të 82-in për këtë vit, pra pesë vende më poshtë. Dhënia e licencave është një tjetër tregues që është rënduar krahasuar me vitin e shkuar dhe treguesi i saj ka rënë nga 162 në 168, çka tregon se, pavarësisht reformës në këtë sektor dhe pavarësisht lehtësirave të shpërfaqura nga administrata shqiptare dhënia e licencave është shumë më e vështirë se vitin e shkuar. Marrja e kredive nga biznesi është po ashtu një tregues më i keq se në vitin e shkuar prej biznesit dhe saktësisht ajo është vështirësuar nga vendi i 45-të që ka qenë ka shkuar në të 48-in, duke i mpakur kësisoj biznesit mundësinë më autentike për t’u përtërirë dhe për të dinamizuar veten. Raporti thotë se, çelja e një biznesi në Shqipëri kërkon kohën më të gjatë në rajon dhe kostoja e çeljes së një biznesi përsëri është më e larta në rajon. Kështu, në Shqipëri duhen 36 ditë për të çelur një biznes, ndërkohë që në vendet e rajonit duhen 26 ditë. Edhe kostoja për të çelur një biznes në Shqipëri është në raportin 2 me 1 me vendet e rajonit, pra dy herë më e madhe. I vetmi tregues i cili është përmirësuar në krahasim me vitin e shkuar është pagimi i taksave nga ana e biznesit. Pra, kemi vetëm një zhvillim sa i takon lirisë ekonomike dhe kjo i takon më së shumti sjelljes së biznesit. Raporti i “Doing bussines” rrëzon të gjitha arritjet në letër apo arritjet e deklaruara nga ana e administratës shqiptare, sipas të cilave të cilave, Shqipëria është një vend ku janë reformuar dhënia e lejeve, dhënia e licencave, regjistrimi i pronave, nënshkrimi i kontratave etj. Raporti i mësipërm e rendit Shqipërinë në një grup vendesh me standard mjaft të ulët ekonomik dhe politik. Në të vërtetë, vetëm pak ditë më parë kryetari i Dhomës amerikane të Tregtisë tha se, që prej një viti qeveria shqiptare është vënë përballë biznesit dhe se kjo situatë duhet të marrë fund.