Edhe Ju zoti Uidhers na dolët i përzierë me aferat e Berishës dhe shpërthimin e Gërdecit?!

Edhe Ju zoti Uidhers na dolët i përzierë me aferat e Berishës dhe shpërthimin e Gërdecit?


Nga Arjan PRODANI - Zoti Uidhers! Kur dëgjova akuzat tuaja, për korrupsionin që kishte plasur në gjirin e mjekëve, infermierëve dhe sanitarëve në një moment tepër tragjik për ne shqiptarët, sinqerisht që u surprizova. Sapo kishte ndodhur Gërdeci i famshëm, sapo dëgjuam për trafikun e armëve të qeveritarëve shqiptarë, sapo kishim pësuar një traumë me 26 të vrarë, qindra të plagosur dhe
të pastrehë, si dhe dhjetëra biznese të shkatërruar. Ndërsa ju i nderuar zotëri,
gjenit kohën të na tregonit se korrupsioni ishte midis mjekëve dhe infermierëve dhe se, nuk duhet të merreshim më me historinë e Gërdecit.Jo më kot, ju drejtova në atë moment juve, me një shkrim ku ju sqaroja se korrupsioni në Shqipëri fillonte me kupolën mafioze të Sali Berishës dhe jo me sanitaret dhe pastrueset e spitaleve, duke ju sqaruar se është kjo kupolë mafioze e cila ka injektuar këtë fenomen negativ në shoqërinë postkomuniste tranzicionale shqiptare. Jo më kot i nderuari zoti Uidhers, ju thashë se demi kapet për brirësh e jo nga thembrat dhe se brirët e korrupsionit në Shqipëri fillojnë me Sali Berishën, i cili i ka shtrirë tentakulat e tij në të gjithë ekonominë shqiptare. Por nuk qe e thënë që ju të reagonit as ndaj Gërdecit dhe as ndaj trafikut të armëve.
Sinqerisht i nderuari Uidhers, keni qenë surprizë me qëndrimin tuaj ndaj këtij realiteti skandaloz që po ndodhte në Shqipëri, për më shumë, kur ju flisnit për 200 lekëshit e infermierëve dhe harronit milionat e dollarëve që grabiste nga pasuritë e shqiptarëve klika mafioze e Sali Berishës. Sinqerisht, që asnjëherë nuk më shkonte mendja, se edhe Ju i nderuar ambasador do të kishit dijeni dhe për më tepër, do të ishit një nga protagonistët e fshehjes së provave së bashku me qeveritarët e korruptuar shqiptarë. Paska qenë e thënë, që dëshmia e të nderuarit majorit Harris, të nxjerrë në pah të vërtetën e heshtjes suaj mbi tragjedinë e Gërdecit, mbi trafikun e armëve dhe për më tepër e thelluat këtë heshtje edhe në pazaret e fëlliqura për masakrimin e Kushtetutës, nga dyshja Rama-Berisha. Ju i bletë heshtjen kryetarit batakçi dhe të korruptuar të opozitës, Edi Rama (sipas akuzave të Sali Berishës), për tragjedinë e Gërdecit dhe të trafikut të armëve dhe ja shpërblyet me një lavdërim, duke e cilësuar si “burrë shteti” dhe duke e kompensuar me heshtjen tuaj, kur këta të dy masakruan Kushtetutën e Shqipërisë.
Këtej nga Shqipëria, zoti Uidhers, ekziston një shprehje shumë e mençur e këtij populli aspak budalla, se “ Njëra dorë lan tjetrën, të dyja lajnë fytyrën”, ku dora juaj lau mëkatet e Berishës e të Ramës dhe duart e tyre, u munduan të lajnë mëkatin tuaj përpara shqiptarëve, shtetit tuaj dhe qytetarëve amerikanë, që ju keni marrë mision t’i përfaqësoni në vendin tim. Gazeta “SOT”, gjatë këtyre tre muajve ka denoncuar çdo ditë aferën e Gërdecit, të trafikut të armëve, si dhe shumë aferave të tjera korruptive të qeverisë “Berisha”. Kemi marrë si shpërblim dhunën e pazakontë qeveritare, nëpërmjet rrahjes së gazetarëve, dhunës fiskale, dhunës psikike, që pushteti obskur i Saliut ka ushtruar mbi ne. Ju jemi adresuar edhe Juve, si përfaqësues i shtetit kampion të demokracisë, duke menduar se do ta ngrinit zërin sadopak, në mbrojtje të një medie që denonconte një aferë skandaloze me pasojë vrasjen e 26 njerëzve të pafajshëm, të një medie që denonconte trafikun e armëve, prej një njeriu i cili implikonte shtetin tuaj, të një medie e cila mori në kurriz të gjithë represionin shtetëror dhe vandal të këtij grupimi kriminal, që sot ka fatkeqësisht çelësat e shtetit shqiptar. Në fakt, ju heshtët dhe heshtja juaj tashmë është sqaruar. Ashtu siç edhe heshtët për Gërdecin, për trafikun e armëve, për municionet kineze që thyenin rëndë rregullat e shtetit tuaj, për masakrimin e Kushtetutës së Shqipërisë, duke kërkuar që heshtja juaj, të pasohej edhe nga politikanët shqiptarë për të mos nxjerrë implikimin tuaj në këtë aferë skandaloze. Ju përfaqësoni përpara shqiptarëve jo zotin Uidhers, një shtetas amerikan të rëndomtë. Ju përfaqësoni Shtetet e Bashkuara të Amerikës, të cilat ju kanë besuar në dorën tuaj dinjitetin e atij shteti, që për shqiptarët do të thotë shumë. Ju zotëri, implikuat rëndë shtetin tuaj, me implikimin tuaj në këtë aferë. Ju zotëri, jeni bërë palë me një grupim kriminal, i cili vrau pa pikë mëshire dhe rimorsi njëzetë e gjashtë fëmijë, gra, të rinj e të reja. Ju morët në mbrojtje shfrytëzimin skandaloz të të miturve në një fabrikë vdekje. Minimalisht zoti ambasador, kërkojini falje nëse janë të vërteta ato që deponoi majori Harris. Mund t’ju lehtësoni sadopak dhimbjen atyre fatkeqëve, i nderuari ambasador. Sinqerisht, më gëzuat shumë kur në takimin me kryeprokuroren e Republikës, deklaruat se “nuk do të shpëtojë asnjë njeri pa u hetuar nga kjo ngjarje e rëndë, kushdo që të ishin këta me imunitet apo pa imunitet”. Në fakt, me ato që më dëgjuan veshët dhe më panë sytë me letrën e kongresmenit Waksman, ju zoti ambasador e keni kompromentuar shumë imazhin tuaj përpara shqiptarëve, përpara fatkeqëve të Gërdecit, përpara atyre që po rrinë sot nëpër greva urie, përpara atyre që nuk kanë një strehë ku të fusin kokën, pasi jua mori shpërthimi “hiroshimë” i biznesit që ju e morët në mbrojtje. Më vjen keq për ju zoti ambasador, u bëtë palë me anën e gabuar.
SOT