FATMIRA HJADARI: Dosja Haklaj në dorën time

FATMIRA HJADARI: Dosja Haklaj në dorën time
Leonard Bakillari
Do të gjykojë vëllanë e vrasësit të burrit. Shorti për procesin më të fundit të hapur kundër Hamdi Hakljat i ra bashkëshortes së deputetit të ndjerë, Azem Hajdarit

TIRANË - Gjyqtarja Fatmira Hajdari, bashkëshortja e deputetit të ndjerë Azem Hajdari, pritet të marrë në dorë dosjen hetimore me të pandehur Hamdi Haklajn, vëllai i Fatmir Haklajt, të akuzuarit kryesor për ekzekutimin e babait të tre fëmijëve të saj. I vetmi djalë i mbijetuar i Muharrem Haklajt, Hamdiu, është i akuzuar së fundmi edhe për vrasjen e Halil Hoxhës. Krahas një tjetër çështjeje që gjykohet në Gjykatën e Tiranës, 70-vjeçari Haklaj akuzohet edhe për një tjetër vrasje të ndodhur në Tropojë në vitin 1998. Sipas akuzës, bëhet me dije se këtë radhë djali i vetëm i mbetur gjallë nga Haklajt akuzohet për vrasjen e Halil Hoxhës, një nga pjesëtarët e fisit Hoxha, me të cilin Haklajt vazhdojnë të kenë hasmëri të përbetuar. Kjo dosje u depozitua në Gjykatën e Tiranës pak ditë më parë dhe pas hedhjes së shortit elektronik, u përzgjodh Kreshik Omari, si gjyqtari që do të gjykojë këtë çështje. Burime pranë Gjykatës së Tiranës thanë se Omari është tërhequr nga gjykimi, duke i hapur rrugë kështu rihedhjes së shortit, i cili këtë radhë përzgjodhi gjyqtaren Fatmira Hajdari, bashkëshortja e të ndjerit Azem Hajdari, i cili është vrarë më 12 shtator 1998. Si për ironi të fatit, gjyqtarja Hajdari tashmë duhet të gjykojë vëllanë e Fatmir Haklajt, i cilësuar si një nga ekzekutorët direkt të një prej figurave kryesore të Partisë Demokratike, Azem Hajdari. Pavarësisht “konfliktit të interesave” që mund të ketë në gjykimin e kësaj çështjeje, për shkak të rrethanave, gjyqtarja shprehet se është ajo që do të vendosë nëse do të gjykojë këtë çështje. E kontaktuar nga “Korrieri”, gjyqtarja Fatmira Hajdari tha se ende nuk i ka mbërritur në zyrë dosja hetimore. Pasi të njihet me dosjen, do të vendosë rreth vijueshmërisë së këtij procesi. “Do të jem unë, që do të vendos nëse do e gjykoj apo jo këtë çështje”, - tha për “Korrierin” gjyqtarja Fatmira Hajdari. Ndërkohë që për djalin e madh të Haklajve, Hamdiun, ky është procesi i dytë gjyqësor për vrasje. Sipas akuzës së qytetit verior, 70-vjeçari i cili ndodhet në Gotenborg të Suedisë është marrë në përgjegjësi penale për vrasjen e Halil Sali Hoxhës, ngjarje kjo e ndodhur në shkurt të vitit 1998 në Tropojë. Dosja për vrasjen e Hoxhës u rihap pas nëntë vitesh, pasi hetimet e saj ishin pezulluar për mungesë provash dhe autorësh. Për më shumë se një vit, Prokuroria e Bajram Currit kreu hetime në mungesë të Haklajt, i cili prej më tepër se një vit ndodhet në Suedi, ku pak kohë më parë siguroi edhe azilin politik. Burime të hetimit pohojnë se dosja në ngarkim të 70-vjeçarit përmban dëshmi, prova shkresore dhe shkencore, si dhe akte të ndryshme ekspertimi, të cilat vërtetojnë se autori i vrasjes së Halil Hoxhës është Hamdi Haklaj, djali i madh dhe i vetëm i mbetur gjallë nga familja Haklaj.
korrieri

A i lejohet Fatmira Hajdarit te gjykoje çeshtjen e nje personi me te cilin i ka probleme te kesaj natyre?

Sipas proçedutres penale ajo eshte e detyruar te jape doreheqjen nga kjo çeshtje.

Fatmira Hajdari refuzon kërkesën për gjykimin e çështjes së Hamdi Haklajt


Gjyqtarja Fatmira Hajdari refuzon të gjykojë dosjen penale në ngarkim të pandehurit Hamdi Haklaj, vëllait të të ndjerit Fatmiri, ku siç dihet është ekzekutori i deputetit Azem Hajdari, dhe gjyqtarja nuk mund të vendosë drejtësi për vëllain e vrasësit të burrit. Shorti elektronin i hedhur dy ditë më parë në Gjykatën e
Shkallës së Parë, rastësisht, caktoi, Fatmira Hajdarin, si gjykatëse për gjykimin e vëllait të vrasësit të bashkëshortit të saj, ish-deputetit demokrat Azem Hajdari. E pyetur dje nga gazeta “Sot”, gjyqtarja deklaroi se ka hequr dorë dhe nuk mund të gjykonte këtë çështje.Shorti përmbante emrat e 15 gjyqtarëve penalistë, por si për çudi u zgjodh emri i gjyqtares Fatmira Hajdari. Ndërsa gjyqtarja ishte tepër e irrituar duke pohuar se çështja e Hamdi Haklajt nuk kishte të bënte më dosjen e Azem Hajdarit, pasi disa media e kishin cilësuar si të tillë. Sipas gjyqtares Fatmira Hajdari, ekziston një ligj ku unë nuk mund të gjykojë këtë çështje, pasi ligji tregon se nëse gjykohet, në këtë rast është konflikt interesash. Hamdi Haklaj, këtë radhë akuzohet për vrasjen e Halil Hoxhës në shkurt të vitit 1998. Edhe pse Hamdi Haklaj, ishte vëllai i të ndjerit Fatmir Haklaj, personi që qëlloi për vdekje më 12 shtator 1998 deputetin Hajdari, para selisë së Partisë Demokratike në Tiranë, dosja nuk mund të gjykohet, pasi ekziston një ligji. Në bazë të këtij ligji gjyqtarja ka bërë një kërkesë për refuzimin e saj.
Dosja
Dosja penale në ngarkim të Hamdi Haklajt, është dorëzuar disa ditë më parë nga Prokuroria e Tropojës për gjykim pranë Gjykatës së Tiranës. Këtë herë, organi i akuzës, e akuzon Hamdi Haklajn, për vrasjen e Halil Hoxhës në shkurt të vitit 1998, në qendër të Bajram Currit, për hakmarrje. Hamdi Haklaj, akuzohet për një sërë akuzash të rënda. Prej gati tri vitesh, ai po gjykohet në po këtë gjykatë për vrasjen e Ramë Hoxhës dhe mbesës së tij, Fatmira Hoxha, si dhe plagosjen e gjashtë personave të tjerë më 10 qershor 2004, në Qafë-Luzhë të Tropojës. Vrasja e Halil Hoxhës në vitin 1998, është akuza e radhës që ngrihet për Hamdi Haklajn. Ndërsa, po hetohet dhe për vrasje të dyfishtë në Malin e Shkëlzenit. Tashmë shorti do të hedhet sërish, për të caktuar një gjyqtar tjetër, ku do të marrë në dorë dosjen e të pandehurit Hamdi Haklaj.
Arretimi i Hamdi Haklajt në Suedi
Shqiptar Hamdi Haklaj, është arrestuar në Suedi, pasi kërkohej nga Interpol-Tirana, për veprat penale në të cilën ai akuzohet. Vënia në pranga e tij është kryer në afërsi të qytetit të Gothenburg, si rezultat i bashkëpunimit të Interpol Tiranës me Interpol Stockholmin. Shtetasi Hamdi Haklaj, lindur më 15 mars të vitit 1938, në Babinë të Tropojës, për të Gjykata e rrethit Gjyqësor Tropojë në vitin 2005 e shpalli atë fajtor për veprën penale të vrasjes, në 10 qershor të 2004-ës, kur shtetasi Haklaj ka shtënë me armë zjarri në vendin e quajtur “Qafa e Rumikut” shtetasit: Ramë Hoxha, Fatmira Hoxha dhe tentoi të vriste gjithashtu edhe shtetasit Rexhep Hoxha, Valmira Hoxha, Servete Hoxha, Zenel Hoxha, Nafie Hoxha dhe Adem Sadiku. Menjëherë, pas kryerjes së veprës penale, autori është larguar në drejtim të paditur duke u shpallur një nga personat më të kërkuar nga Policia Shqiptare. Hamdi Haklaj akuzohet gjithashtu për vrasjen e shtetasit Halil Sali Hoxha, ndodhur në shkurt 1998 në qytetin e Bajram Currit, vepër për të cilën ka dalë edhe një urdhër arresti nga Prokuroria e Rrethit Tropojë. Vetëm dy ditë pas arrestimit nga Interpoli suedez, Hamdi Haklaj përmes avokatëve të tij ka kërkuar azil politik në këtë vend. Menjëherë, sapo është arrestuar nga agjentët e zyrës së Interpol Stokholmit në Suedi, tropojani i njohur me nofkën “Padrino” ka kërkuar statusin e azilantit politik pasi në rast riatdhesimi i rrezikohet seriozisht jeta.
SOT