Koçi: Besoj se zhgënjimi me Nanon qe i pari dhe i fundit

nga **ILIRI** prej Wed Feb 06, 2008 9:34 am

Koçi: Besoj se zhgënjimi me Nanon qe i pari dhe i fundit për mua

“Besoj se zhgënjimi me Nanon qe i pari dhe i fundit për mua”, ka qenë reagimi i deputetit Petro Koçi, iniciatori i Lëvizjes për Politikë Institucionale brenda PS. Në një reagim të dhënë ekskluzivisht për gazetën SOT për zhvillimet e fundit në PS si dhe për marrëdhëniet e tij me ish kreun e PS Fatos Nano. Në reagimin e tij ai përcaktoi qartë se kush është qëndrimi i tij politik ndaj Fatos Nanon duke vlerësuar bashkëpunimin e fundit që pati me të në lëvizjen për rikthimin e legjimitetit në PS. “Besoj se zhgënjimi me Nanon qe i pari dhe i fundit për mua”,- thotë Petro Koçi.“Hera e pare në jetën time që shpresova se Nano nuk do të cedonte. Ne 2002 e dija se ai do e braktiste katarsisin. Them e fundit ,sepse nuk do te ketë here tjetër me Fatos Nanon. Anulimi i takimit të Fierit ishte oferta që Nano i bëri Ramës,duke shitur Lëvizjen dhe kërkuar një marrëveshje personale në kurriz të mbështetësve të saj. Tani, kur bëjmë një analizë më objektive, mund të themi se Nano shiti edhe postin e Kryetarit të PSSH te Edi Rama në 2005. Në fakt ,duke ja lënë kompetencat e kryetarit Gramoz Ruçit, Nano ja shiti vetë Ramës Partinë Socialiste. E gjithë kjo në këmbim të kandidaturës për president. Nano nuk llogariti që çifti Rama -Berisha nuk kishte më interes për një figurë si Fatos Nano nëpër këmbë .Ata luajtën shkëlqyer përballë një lojë shumë amatore të Nanos në zgjedhjet presidenciale”, tha deputeti Petro Koçi. Përsa i përket paktit Rama-Berisha, deputeti Petro Koçi u shpreh se, “situata politike është komplikuar për shkak të marrëdhënieve tepër të dyshimta mes PD dhe PS. Pas paktit Rama-Berisha për sheshet e ndërtimit në Tiranë, është kaluar në një pakt politik të këtij çifti, pakt jo transparent që përfshin drejtësinë dhe sistemin zgjedhor. Në PS nuk ka asnjë vendim institucional për marrëveshjen Rama-Berisha. Edhe partitë aleate janë jashtë lojës. Shqipëria ka dalë e humbur nga marrëveshjet e fshehta mes pashallarëve të politikës. Këto lloj marrëveshjesh burojnë kryesisht nga korrupsioni i dyanshëm dhe nga interesat personale në kurriz të interesit publik. Çifti Rama -Berisha është një çift i rrezikshëm”.deklarimi i djeshëm i deputetit Petro Koçi vjen në një moment që dashuria Rama-Berisha ka shtuar produktet e saj. Produkte që fillojnë nga lejet e ndërtimit për grupin që qëndron afër tyre dhe me ligjet që po hartojnë ditët e fundit. Dashurinë e këtyre të fundit e vërteton edhe deklaratat e djeshme e Berishës ku bëri të qartë se me opozitën ai i ka mbyllur marrëveshjet. Ndërkohë që përsa i përket lëvizjes antirama, mesa duket kjo e fundit është në krizë të thellë nga loja e keqe politike e ish kreut të PS Fatos Nano.
Si filloi dhe ku degradoi lëvizja antirama
Lëvizja për Politikë Institucionale u krijua si rezultat i shkeljeve statutore të ndërmarra nga kryetari i PS Edi Rama, i cili me procesin e manipulimeve të statutit të PS si dhe me një fushatë zgjedhore të manipuluar arriti të nënshtrojë PS dhe të mbushë forumet me njerëz të cilët nuk kishin asnjë lidhje me këtë parti. Kështu shumë eksponentë të PS u përzunë nga kjo parti duke u zëvendësuar nga një grupim njerëzish që i shërbenin me deotshmëri Eid Ramës. Në këtë situatë deputeti Petro Koçi inicioi lëvizjen në fjalë duke e shtrirë organizimin e saj në shumë rrethe të vendit. Me humbjen e postit të presidentit në krye të kësaj lëvizje u fut Fatos Nano. E filloi me idenë e rrëzimit të Ramës duke imituar stilin e fushatës për katarsis të vitit 2001dhe e përfundoi duke shitur kokën e Petro Koçit te Edi Rama, me braktisjen takimin të Fierit. Megjithëse Rama ju kundërpërgjigj se nuk ka kompromis me të, Fatos Nano e braktisi lëvizjen në ditën e takimit me përkrahësit fierakë të lëvizjes antirama. Nga ajo ditë Nano vazhdoi turin e tij të pushimeve nëpër kazinotë evropiane dhe në ishujt ekzotikë ndërkohë që lëvizja e tij kundër Ramës u tret si sheqeri në ujë. Socialistët e Tiranës, Shkodrës, Durrësit, Elbasanit, Korçës të cilët e përkrahën në lëvizjen e tij tashmë ndihen të zhgënjyer nga humbja e imazhit të liderit të tyre që kishte vendosur të spastronte partinë nga pushtimi i radikalit Rama.
gazeta Sot