"Kosovo Kid", gati për të shkëlqyer

Elvir Muriqi do të ngjitet përsëri sot në ring, pas 7 muajsh inaktivitet. Boksieri shqiptar nuk do të ketë më përballë kampionin botëror Antonio Tarver, i cili deri tani ka refuzuar një ndeshje kthimi, pasi e mundi me pikë në qershor, por Uillis Loket, një tjetër amerikan me eksperiencë në peshat gjysmë të rënda, "Kosovo Kid", këtë radhë do të kthehet në një nga palestrat e Bronksit, aty ku filloi të boksonte për herë të parë si profesionist, por tashmë me idenë e qartë për të synuar një tjetër ndeshje me kampionët ndërkombëtarë. Vetë Muriqi ka treguar etapat e karrierës së tij, deri në ndeshjen e sotme, ku do të tentojë t‘i kthehet shkëlqimit të një viti më parë.

"Duhet ta pranoj se në fillimin e karrierës unë mërzitesha. Nuk kisha një karrierë të gjatë si amator dhe trajnerët e mi më ndryshonin vazhdimisht stilin e luftimit, duke më servirur kundërshtarë të dobët, nga të cilët nuk mësoja asgjë. Unë dëshiroja të përmirësohesha, por pashë se si karriera ime nuk po shkonte asgjëkundi", tregon ai. Çuditërisht, famën më të madhe ai e ka fituar pas një humbjeje, pikërisht atë të vitit të kaluar me kampionin Antonio Tarver, ku u mund vetëm me pikë, duke arritur t‘i shkëpusë njërit prej gjyqtarëve një vendim për barazim. Kjo e bëri të besonte përsëri te vetvetja. "Mora shumë telefonata nga miq, familjarë dhe njerëz me të cilët kisha vite që nuk flisja por që ishin të bindur se kisha fituar atë ndeshje dhe se ishin krenarë për mua. Edhe mua m‘u duk sikur e kisha fituar dhe u tërbova kur dëgjova gjyqtarin e parë që dha barazim. U mërzita kur dëgjova vendimet e dy të tjerëve që e shpallën Tarverin fitues. Por kur lufton me një yll të ringut dhe arrin një rezultat kaq të ngushtë, e di që ke bërë më të mirën", tregon Muriqi për emocionet e ndeshjes. Në fakt, Tarver nuk e pranoi as vendimin për barazim, ndërsa detyroi stafin e Muriqit të largohej nga ringu para se të fillonte intervistat. "Më besoni, nëse nuk do të kishte njerëz të tjerë rrotull, do të ishte ai që do të largohej nga ringu. Por unë e dija që askush nuk po e merrte me seriozitet deklaratën e tij ndaj nuk u shqetësova. Unë vetëm i thashë: ‘Bëhu burrë. Kur humbe me Roi, ai të dha shansin e revanshit. Kjo ishte një ndeshje me rezultat të ngushtë ndaj vepro me mua ashtu siç bëri ai me ty‘. Vetëm pas kësaj, ai më respektoi", tregon boksieri kosovar. Por në fakt, ai nuk është ndeshur me asnjë kundërshtar që nga muaji qershor, për shkak se nuk gjendej një boksier që të pranonte sfidën. "E vetmja gjë që dëshiroj është të kthehem t‘u tregoj të gjithëve se i përkas rangut të boksierëve më të mirë të peshave gjysmë të rënda. Pavarësisht humbjes, asnjë nga boksierët e rëndësishëm nuk pranonin të ndesheshin, pasi nuk e kishin të sigurtë fitoren me mua. Edhe kampioni Zsolt Erdei, anuloi një takim të mundshëm me mua në Gjermani. Më duhej të pritja 7 muaj për një ndeshje, por nuk ka problem, e rëndësishme është që u ktheva, për të filluar përsëri rrugën drejt majave", deklaroi "Kosovo Kid".



Sfida

"Jam gati të ndeshem me këdo, Çad Douson, Glen Xhonson, Klinton Uds, Roi, Tito, Hopkins, të gjithë kampionët e vendeve të para të klasifikimit. Në një mbrëmje të mirë, i mund të gjithë. Nëse mendojnë se i sfidoj për para, jam gati të nënshkruaj një parakontratë ku fituesi i merr të gjitha fitimet e ndeshjes"