Në gjyq kryepolici i Rrugores, paditet për dhunë

Në gjyq kryepolici i Rrugores, paditet për dhunë

Krenar Ahmeti shoqëroi prokuroren Elisabeta Bajri
Prokuroria e Tiranës kërkon pezullimin e shefit të Qarkullimit Rrugor të kryeqytetit, Krenar Ahmeti. Kërkesa e prokurorisë vjen pas kallëzimit penal që dy shtetas kanë bërë në drejtim të drejtorit të Qarkullit Rrugor të Tiranës, Krenar Ahmeti. Gjykata e Shkallës së Parë e Tiranës do të vendosë sot për masën e sigurisë, nëse do ta pezullojë deri në fund të hetimeve apo Ahmeti do të vazhdojë punën deri në një vendim të formës së prerë. Megjithatë, në gjykatë ka mbërritur kërkesa e organit të akuzës, ku dy të dëmtuar, një prej tyre është prokurore në Prokurorinë e Krimeve të Rënda dhe tjetri qytetar i Durrësit, pretendojnë se janë shoqëruar në polici pa të drejtë. I kontaktuar nga gazeta "Shqip", Krenar Ahmeti deklaroi se ka kryer vetëm detyrën dhe se do të respektojë çdo vendim të drejtësisë, pjesë e së cilës është edhe vetë.
Denoncimi i parë

Përgjatë muajve të fundit, kohë në të cilën Krenar Ahmeti është vendosur në krye të qarkullimit rrugor të Tiranës, dhjetëra banorë të Tiranës, por edhe të rretheve, kanë kryer kallëzime penale për dhunë fizike dhe psikike ndaj tij. Kallëzimet janë depozituar në Prokurorinë e Tiranës, e cila ka bashkuar të gjitha pretendimet në një dosje të vetme. Pas hetimeve paraprake nga prokurori Ervin Karanxha janë arritur të zbulohen dy raste. Sipas akuzës, duke iu referuar kërkesës së depozituar në Gjykatën e Tiranës, Ahmeti ka shoqëruar pa të drejtë shtetasin nga Durrësi, Hasan Neza, pas një konflikti në një nga rrugët e Tiranës. Neza pretendon se është shoqëruar me forcë në Komisariatin e Policisë Nr.2, duke iu shkaktuar fraktura në trup. Pretendimet e qytetarit nga Durrësi, sipas prokurorisë, vërtetohen edhe nga mjekësia ligjore, në sajë të raportit të saj. Aty thuhet se nga përdorimi i forcës së uniformave blu, shtetasi Hasan Neza ka pësuar dëmtime në trup.
Shoqërimi i prokurores

Për katër orë me radhë prokurorja e Krimeve të Rënda, Elisabeta Bajri, është shoqëruar me "dhunë" në Komisariatin e Policisë Nr.2 me urdhër të shefit të qarkullimit rrugor, Krenar Ahmeti. Në bazë të ligjit për prokurorinë thuhet se "prokurori nuk mund të ndalohet, kontrollohet ose arrestohet, pa pëlqimin e Prokurorit të Përgjithshëm". Duke iu bazuar ligjit, prokurorja ka kryer një kallëzim penal në Prokurorinë e Tiranës, ku dosja është hetuar nga "kolegu" i saj, Ervin Karanxha. Në bazë të kallëzimit dhe raportit të shoqërimit në komisariat, grupi hetimor ka shprehur bindjen se punonjësit e policisë rrugore, Krenar Ahmeti, Alfons Gjoni dhe Blenard Vathi, kanë kryer veprime arbitrare duke i mbajtur pa të drejtë disa qytetarë. Ngjarja ndodhi në bulevardin "Dëshmorët e Kombit", përballë dy "Kullave binjake". Prokurorja Elizabeta dhe bashkëshorti i saj, Agron Bajri, janë shoqëruar me forcë në Komisariatin Numër 2 të Policisë së Tiranës, ku janë mbajtur të paktën 4 orë. Por pas mesnate ata janë lënë të lirë së bashku me automjetin e bllokuar në mënyrë demonstrative. Pas ngjarjes, ata nuk kanë marrë as ndonjë masë administrative gjobë, për kundravajtjen rrugore apo penale që ishin akuzuar në vendin e ngjarjes dhe në birucat e shoqërimit.


Ahmeti

Shefi i qarkullimit në Tiranë deklaron se Agron Bajri e ka fyer


"Nuk shoqërova prokuroren, por bashkëshortin e saj"


Duket se "telashet" me drejtësinë, shefit të qarkullimit rrugor të Tiranës, Krenar Ahmeti, nuk i bëjnë përshtypje. Kallëzimet penale të dy shtetasve për veprime arbitrare i ka quajtur të pabaza. Deklaron për gazetën "Shqip" se do të mirëpresë çdo vendim të gjykatës dhe do ta zbatojë me përpikëri. Në lidhje me denoncimin e shtetasit nga Durrësi, Hasan Neza, thotë se personi në fjalë e ka kërcënuar me jetë dhe është detyruar ta shoqërojë në polici. "Personi në fjalë më ka kërcënuar me jetë. Ndaj tij kam depozituar kallëzim para oficerëve të policisë gjyqësore, ku hetimi po verifikohet nga prokuroria", tha Ahmeti, duke saktësuar se nuk ka kryer asnjë veprim arbitrar. Në lidhje me rastin e prokurores, Ahmeti deklaron se ajo nuk ka qenë objekt i shoqërimit, por ka qenë bashkëshorti i saj, i cili e ka fyer. "Kam qenë i detyruar të shoqëroj bashkëshortin e prokurores, pasi jam fyer prej tij. Jam detyruar të kryej një kallëzim penal para oficerëve të policisë gjyqësore", tha shefi i qarkullimit rrugor, për të cilin gjykata do të vendosë sot nëse do e mbajë apo jo. Ai tha se në prokurori nuk ka dhënë shpjegime, por është i detyruar të respektojë organet e drejtësisë, pjesë e së cilës është edhe vetë. s.çobo




Të pandehur

Krenar Ahmeti

Alfons Gjoni

Blenard Vathi


Denoncuesit:

Hasan Neza

Elisabeta Bajri




Karta e prokurorit

Mbrojtja nga procesi penal
Prokurori nuk mund të ndalohet, kontrollohet ose arrestohet, pa pëlqimin e Prokurorit të Përgjithshëm, përveç rasteve kur kapet në kryerje e sipër të një krimi, ose menjëherë pas kryerjes së tij. Në këto raste, organi përgjegjës njofton menjëherë Prokurorin e Përgjithshëm.


SHKB-ja, hetim krerëve të qarkullimit rrugor


Shërbimi i Kontrollit të Brendshëm në Ministrinë e Brendshme ka nisur një hetim ndaj Krenar Ahmetit, Alfons Gjonit dhe Blenard Vathit, të akuzuar për veprime arbitrare në shoqërimin e dy shtetasve në Komisariatin e Policisë Nr.2. Burime të konfirmuara pohojnë se inspektorët e SHKB-së kanë marrë raportet e shoqërimit, ku pritet që në ditët e ardhshme të jepen edhe të dhënat e para. Dyshohet se drejtuesi i qarkullimit ka shkelur ligjet me shoqërimin e disa shtetasve.

Eshte fakt qe policia e shtetit ne Shqiperi i dhunon hapur te drejtat e qytetareve. Kete rradhe ju paska hasur sharra ne gozhde sepse kane prekur tek nje person me detyre te rendesishme, po per qytetaret e thjeshte si i behet hallit?

Si nuk u bon njerez kto policet shqiptar. Nuk e di, po ktu ku jetoj nuk kam pa deri tani polic te rrugores me sy. Jam gjobit nja dy a tre here per ndonji shkelje te vogel. Me eshte ven letra e gjobes ne xhamin e makines, pastaj me ka ardhe fatura me poste. Edhe ne kontrollet rutine as nuk me ka ndodh personalisht, as nuk kam pa qe policia rrugore te perdore dhune ndaj qytetareve. Ai te shpjegon shkeljen qe ke bo, dhe te len gjoben ne dore pa bo asnji fjale. As pse, as qysh, as tek. Ke bo kte shkelje qe denohet me kaq euro gjob ne baze te kti neni, dhe kaq.Ke ankesa drejtoji gjykates. Vetem po pate pi, nuk te lejojne per sigurine e jetes me ec me makin, plus gjoba. Keto lloj budallalleqesh, jo me ndalu njerez, jo me dhunu njerez, jo me u rraf me grushta me qytetaret, jo me ngrit tonin me qytetaret.. Kto i nigjoj vetem ne Shqiperi. As ka per tu bo noiher ai ven. Me ato debila qe ka, si zor me e besu..

Policet ne shqipri jane 3 kamjona per 7 bataljona.

Po ky trapi ka dasht me shit pordh. (mfalni per shprehjen). Fjala se un nuk pys se kush je. kryepolici nuk njef ligjin. Ashtu ka per shku ai ven, rrot e mtejt.

“Kokëfortësia” çon në gjykatë kryepolicin
Elona Elezi
TIRANË – Paraditen e sotme do të vendoset në gjykatë nëse shefi i Policisë Rrugore të kryeqytetit do të jetë ende Krenar Ahmeti, i etiketuar në fillim të marrjes së detyrës së tij si “superpolici” me disa diploma universitare dhe pesë gjuhë të huaja, apo ai do të pezullohet nga detyra. Akuza për “veprime arbitrare”, e ardhur nga dy kallëzime penale, duket se do të çojnë shefin e qarkullimit rrugor të Tiranës, Krenar Ahmetin, drejt dyerve të Gjykatës së Shkallës së Parë në kryeqytet. Ka qenë prokuroria, ajo që ka kërkuar pezullimin deri në dhënien e një mase sigurie për veprën penale që ka konsumuar kreu i Rrugores. Problemet për Ahmetin duket se nisën publikisht, kur disa javë më parë, një prokurore e Krimeve të Rënda u ndalua së bashku bashkëshortin e saj në bulevardin “Dëshmorët e Kombit”, përpara ish-Piramidës, nga një polic i qarkullimit rrugor, i cili u akuzua se kishte fyer dhe kishte ofenduar rëndë përfaqësuesen e organit të akuzës. Kjo e fundit madje u shoqërua edhe në qelitë e komisariatit, pasi kishte fyer policin. E ndërsa zyrtarisht dihet se njëri prej deponimeve mësohet të jetë bërë nga prokurorja, ende nuk bëhet publik emri i rastit të dytë, që i ka vënë mbi supe shefit të qarkullimit akuzën për veprime arbitrare. Orët e para të ditës së sotme, kryerrugori, i cili u bë i famshëm për masat e rrepta të marra në kuadër të sensibilizimit për uljen e aksidenteve rrugore, do të paraqitet në prani të avokatit të tij mbrojtës për t’u përballur zyrtarisht me drejtësinë shqiptare dhe me akuzat që i erdhën pikërisht nga posti i rëndësishëm që iu besua prej afro një vitit. Dhe do të jetë pikërisht kjo masë sigurie, e cila do të sjellë edhe ndonjë penalizmi të mundshëm ndaj Ahmetit, deri në heqjen e tij nga kreu i qarkullimit rrugor. Herë pas here Komisariati i Policisë Rrugore është vënë në shënjestër të kontrolleve të bëra nga Shërbimi i Kontrollit të Brendshëm për abuzime, që dyshohej se janë kryer aty, ose për akuza që kanë ardhur nga qytetarët. Para se të merrte detyrën Krenar Ahmeti, në krye të policisë së kryeqytetit ishte Shkëlzen Aliaj, i cili u hetuar nga SHKB-ja.
Korrieri