Reforma e fundit në ARMO, 30 gra: Gati të vetëvritemi

Admin Anëtarësuar : 06 Dec 2007 Mesazhe : 1793

Reforma e fundit në ARMO, 30 gra: Gati të vetëvritemi

Ish-punonjëset kërcënojnë: Do të hidhemi nga... lartësitë
Punonjësit e Kombinatit të Përpunimit të Thellë të Naftës (KPTHN) në Ballsh, të cilët janë hedhur në protesta për shkak të reformës që po zbatohet në ARMO, kanë kërcënuar dje me vetëvrasje kolektive. Mbi 30 gra të prekura nga reforma në kompaninë e privatizuar tashmë kanë hipur në kolonën e repartit të Koksit brenda kombinatit dhe kanë qëndruar aty deri pas mesdite, duke kërcënuar se do të hidheshin nga lartësia. Policia e ka pasur mjaft të vështirë të ndërhyjë, ndërsa ka thënë se për disa prej tyre do të nisë procedimin penal. Mbi 100 punonjës të Kombinatit të Përpunimit të Thellë të Naftës në Ballsh kanë organizuar dje një protestë për të kundërshtuar ristrukturimin e kompanisë ARMO. Ata kanë qëndruar për disa orë përpara drejtorisë së kombinatit, ndërsa 30 gra i janë shkëputur grupit dhe kanë hipur në kolonën e repartit të Koksit, në një lartësi prej më shumë se 20 metrash. Burime të sindikatës së naftëtarëve thanë dje se gratë vunë në rrezik jetën e tyre, duke kërkuar përshpejtimin e procesit të rishikimit të listave të shkurtimeve në këtë kombinat. Punëtorët e prekur nga reforma në ARMO shpresojnë se konsorciumi amerikano-zviceran që ka fituar tenderin për privatizimin e kompanisë do t‘i rikthejë në punë. Ata kanë dëgjuar se krerët e rinj të kompanisë do të anulojnë reformën e aplikuar, por deri më sot nuk është hedhur asnjë hap në këtë drejtim, çka ka bërë që të përshkallëzohet protesta. Burimet nga KPTHN-ja e Ballshit thanë se një përfaqësi e protestuesve është takuar dje paradite me drejtorin e kombinatit, Gramoz Nazëraj, nga i cili nuk kanë marrë përgjigjen që prisnin. Pas këtij takimi, 30 gratë kanë vendosur të përdorin formën ekstreme të protestës, duke vënë në vështirësi forcat e policisë. Në momentin që forcat e policisë kanë tentuar të zbresin gratë nga kolona, ato kanë kërcënuar se do të hidheshin, ndërsa njëra ka lyer trupin me naftë dhe ka thënë se do t‘i vinte flakën vetes. Mësohet gjithashtu se punonjësja Qelibare Qerimi ka humbur ndjenjat për shkak të tronditjes dhe qëndrimit për një kohë të gjatë në diell. Në këto kushte policia është tërhequr, duke ruajtur distancën me gratë protestuese për të shmangur ndonjë incident të rëndë, por sipas krerëve të Komisariatit të Ballshit, mësohet se shumë shpejt policia do të nisë një procedim penal për këto punonjëse, të cilat kanë penguar procesin e punës në KPTHN. Gjithçka sipas policisë ka të bëjë me faktin se këto punonjëse vërtet janë përfshirë në listat e reformës, por nuk figurojnë të pushuara nga puna dhe për këtë vazhdojnë të kenë leje hyrjeje në kombinat. Protesta ekstreme e 30 grave ka marrë fund rreth orës 18:00, pas negociatave me krerët e ndërmarrjes dhe policinë. Ndërkohë mësohet se ato janë shoqëruar në komisariat për t‘u marrë në pyetje. Protestat e para në KPTHN nisën në fund të muajit, kur u publikuan listat e para me emrat e personave që prekeshin nga reforma. Deri dje, forma më e ashpër e protestës së këtyre naftëtarëve ka qenë bllokimi i rrugës nacionale Fier-Tepelenë.
Shqip