Spiunët e sigurimit, kuvendi hap dosjet

anetetaret me aktiv Anëtarësuar : 04 Jan 2008 Mesazhe : 140

Spiunët e sigurimit, kuvendi hap dosjet.

Kuvendi ka futur në programin e punës tre javore projektligjet për evidentimin e bashkëpunëtorëve të Sigurimit

Fejzi Braushi

Kuvendi pritet t’i japë fund odisesë së gjatë të debatit mbi dosjet e ish-bashkëpunëtorëve të Sigurimit të Shtetit. Pas afro 2 vjetësh nga depozitimi në Kuvend, Konferenca e Kryetarëve të Grupeve Parlamentare ka futur në programin tre javor të punës, diskutimin në komisionet parlamentare edhe të tre projektligjeve për pastërtinë e figurës së zyrtarëve. Sipas edhe publikimit në faqen zyrtare të Kuvendit, brenda dy javëve të ardhshme pritet që Komisioni i Ligjeve të marrë në shqyrtim projektligjin “Për pastërtinë e figurave të zyrtarëve të lartë të administratës dhe të të zgjedhurve”, paraqitur nga grupi parlamentar i PD-së, projektligjin “Për verifikimin e të qenit bashkëpunëtor i Shërbimeve Sekrete Shqiptare para datës 31.12.1992, të funksionarëve të lartë publikë” paraqitur nga grupi parlamentar i PS-së, si dhe projektligjin tjetër “Për kontrollin e figurës së personit zyrtar të zgjedhur apo emëruar në organet e rëndësishme të shtetit”, si nismë e deputetit Nard Ndoka. Të tre nismat e mësipërme kanë për qëllim pastrimin e administratës shtetërore dhe kryesisht, të Kuvendit të Shqipërisë nga personat të cilët kanë dhënë kontribut të drejtpërdrejtë në veprimtarinë e ish-Sigurimit famëkeq të Shtetit. Por megjithëse kanë të njëjtin qëllim, të tre nismat ligjore kanë dallime thelbësore për kategoritë, kohën dhe mënyrën se si do të bëhet kontrolli dhe evidentimi i ish-sigurimsave.
Demokratët
Kështu, demokratët në nismën e tyre nuk kërkojnë të heqin deputetët spiunë të kohës së komunizmit, por vetëm t’i informojnë ata. Projektligji i tyre shtrin efektet për çdo zyrtar që më datë 11 dhjetor 1990 kishte mbushur moshën 18 vjeç dhe që ushtron ndikim në momentin e hyrjes në fuqi të ligjit. Përjashtim bëjnë vetëm deputetët e zgjedhur drejtpërdrejt nga populli dhe kryetarët e komunave dhe bashkive. Për këtë rreth funksionesh, Kuvendi njofton vetëm implikimin e tyre. Sipas projektligjit, kandidatët për deputetë, apo kandidatë për kryetarë komune, apo bashkie, i nënshtrohen verifikimit të figurës, vetëm pasi të jenë shpallur fitues, thuhet në relacionin shoqërues të këtij projektligji. Sipas këtij drafti, nuk mund të emërohet apo caktohet përfundimisht pa u verifikuar asnjë zyrtar i ri. Sipas projektligjit, verifikimi i pastërtisë së figurës kryhet nga një komision i përbërë nga 5 anëtarë të zgjedhur nga Kuvendi.
Socialistët
Nisma e socialistëve përcakton se funksionarët publikë që do të verifikohen do të jenë Presidenti i Republikës, Kryeministri, deputetët, ministrat, zv.ministrat, anëtarët e Gjykatës Kushtetuese, anëtarët e Gjykatës së Lartë dhe të gjithë titullarët e organeve të tjera kushtetuese, ose të organeve kolegjiale, të përcaktuara si të tilla nga Kushtetuta. Verifikimi i zyrtarëve të lartë shtetërorë do të bëhet nga një komision shtetëror i përbërë nga 5 anëtarë, që do të zgjasë 6 muaj dhe do të varet e përgjigjet për punën e kryer para Kuvendit të Shqipërisë. Kryetari i Komisionit të Verifikimit propozohet të zgjidhet nga Presidenti, ndërsa katër anëtarët e tjerë të tij, të jenë propozime të dy kampeve pozitë-opozitë. Për verifikimin e funksionarëve të lartë të shtetit, sugjerohet që të përdoret i gjithë dokumentacioni shtetëror që ndodhet në Arshivat e Shërbimit Informativ të Shtetit, Ministrisë së Brendshme dhe Drejtorisë së Përgjithshme të Arkivave. Gjithashtu, sipas kësaj nisme parashikohet që të merren parasysh dhe rezultatet e verifikimeve të kryera nga komisioni “Bezhani” në vitin 1995. Publikimi i emrave të bashkëpunëtorëve të Sigurimit të Shtetit do të bëhet në fund të punës së komisionit, ndërsa nuk do të bëhet publik asnjë nga ish-bashkëpunëtorët e Sigurimit të Shtetit, të cilët paraqiten vetë në komision dhe deklarojnë se do të japin dorëheqjen nga detyra apo funksioni që mbajnë aktualisht. Ndërkohë që drafti i demokristianëve kërkon të penalizojë të gjithë ata persona kanë qenë bashkëpunëtorë të Sigurimit të Shtetit dhe që duan të zgjidhen deputetë, apo kryetarë bashkie. Gjithashtu, ai nuk lejon që ish-bashkëpunëtorët e Sigurimit dhe që aktualisht janë zyrtarë të lartë të shtetit, të vijojnë të mbajnë poste të larta drejtuese.
Projektligji i PD
Subjekt të verifikimit të përgjithshëm, sipas këtij ligji, janë të gjithë zyrtarët dhe funksionarët publikë, të zgjedhur apo të caktuar, të cilët më datë 11 dhjetor 1990 janë 18 vjeç e lart dhe pas hyrjes në fuqi të këtij ligji ushtrojnë, apo do të kryejnë një nga detyrat ose funksionet, apo janë në marrëdhënie pune në institucionet në vijim: deputetë, Presidenti i Republikës, të zgjedhurit nga Kuvendi dhe të dekretuarit nga Presidenti i Republikës si dhe gjyqtarët e Gjykatës së Lartë dhe Gjykatës Kushtetuese, anëtarë të Këshillit të Ministrave, zëvendësministra, sekretarë të përgjithshëm të institucioneve qendrore në varësi të Kryeministrit, apo ministrit, funksionarë politikë, drejtorë të përgjithshëm dhe drejtorë të drejtorive të dikastereve, zyrtarë të lartë të Presidencës, administratës së Kuvendit, të Gjykatës Kushtetuese, të Gjykatës së Lartë, të SHISH-it, Guvernatorë, zëvendësguvernatorë dhe Drejtorët e Bankës së Shqipërisë, prefektë, kryetarët e Këshillave të Qarkut, si dhe kryetarët e Bashkive dhe Komunave, gjyqtarë dhe prokurorë pranë Gjykatave të Apelit, drejtuesit e përfaqësive diplomatike, si dhe drejtues të Policisë.
Pastërtia e figurës morale të zyrtarëve të mësipërm është e papajtueshme edhe për individët që kanë qenë anëtarë apo kandidatë të Byrosë Politike të Partisë së Punës, anëtarë qeverie, anëtarë të Këshillit Presidencial, Kryetar i Gjykatës së Lartë, Prokuror i Përgjithshëm, si dhe oficer madhor, përpara zgjedhjeve të 31 marsit 1991.
Projektligji i PS-së
Objekt i këtij ligji është hapja e Arshivave të Shërbimeve Sekrete Shqiptare, të para datës 31.12.1992, për të gjithë ata funksionarë të lartë shtetërorë, të parashikuar nga ky ligj, që vazhdojnë të mbajnë këtë funksion, deri në momentin e hyrjes në fuqi të ligjit dhe ka për qëllim vetëm publikimin e tyre.
Funksionarët publikë që do të verifikohen janë: Presidenti i Republikës, Kryeministri, deputetët, ministrat, zv/ministrat, anëtarët e Gjykatës Kushtetuese, anëtarët e Gjykatës së Lartë dhe të gjithë titullarët e organeve të tjera kushtetuese ose të organeve kolegjiale, të përcaktuara si të tilla nga Kushtetuta.
Për kryerjen e procesit të verifikimit dhe të bërjes publike të emrave të funksionarëve të lartë që kanë qenë bashkëpunëtorë të ish-Sigurimit të Shtetit, krijohet një komision shtetëror i përbërë prej 5 anëtarësh. Ky komision do të varet dhe do të përgjigjet për punën e kryer para Kuvendit të Shqipërisë, një anëtar, i cili do të jetë edhe Kryetari i këtij komisioni, emërohet nga Presidenti dhe katër anëtarët e tjerë emërohen nga Kuvendi i Shqipërisë, përkatësisht, 2 sipas propozimit të partive opozitare dhe 2 sipas propozimit të partive të pozitës.
Publikimi i emrave që gjenden bashkëpunëtorë bëhet në fund të procesit të verifikimit. Ndalohet publikimi i emrit të personit që gjendet ish-bashkëpunëtor, nëse ai/ajo paraqitet vetë para komisionit dhe deklaron se do të japë dorëheqjen nga funksioni që mban, përpara se të bëhet publikimi i emrave. Nëse tërheqja e deklaruar nuk ndodh, atëherë komisioni bën publik emrin.
Projektligji i PDK-së
Ish-spiunët do të kenë mundësinë të kandidojnë për deputetë dhe në njësitë e qeverisjes vendore.
Ish-spiunët dhe bashkëpunëtorët, ndalohen të zgjidhen në postet drejtuese të Shtetit Shqiptar.
Kontrollit do t’i nënshtrohen Presidenti, deputetët e Kuvendit, Kryeministri, nëpunës të nivelit të lartë dhe të mesëm.
Kontrollit do t’i nënshtrohen dhe gjyqtarët dhe prokurorët e të gjitha niveleve, zyrtarët që zgjidhen e emërohen nga Presidenti, Kryeministri, ministri dhe Kuvendi.
Për verifikimin e kontrollin e figurës së personit zyrtar ngrihet një komision i posaçëm pranë SHISH.
Ky komision do të përbëhet nga Inspektori i Përgjithshëm i Deklarimit të Pasurive.
Në përbërje do të jenë dhe katër anëtarë të emëruar nga Presidenti, me propozim të pozitës dhe opozitës, me një mandat 5-vjeçar.

Admin Anëtarësuar : 06 Dec 2007 Mesazhe : 1560

Hapja e dosjeve, liron mijëra vende pune, që nga Calamania, te ambasadorë, ministra, deputetë
Nga Robert PAPA - Sipas medias së majtë, se ata e dinë më mirë axhendën e parlamentit topall, do kalojë ligji për hapjen e dosjeve të spiunëve. Pra, po del parashikimi ynë se, pa dënuar krimet komunistë nuk hyjmë dot në NATO. Problemi mbetet se në qeveri edhe parlament kemi një shumicë spiunësh, e disa kanë mundur të kalojnë,pra dikush i ka fshehur dosjet e tyre para vitit 1997 dhe ai, ose ata që kanë djegur ose fshehur dosjet, duhen dënuar.Nëse hapen dosjet, duhet të shporren ata ministra të cilët Berisha i ka akuzuar publikisht si spiunë,ose ata deputetë të cilët u larguan nga puna si spiunë në vitin 1995-1997. Nuk po nxjerr emra por që nga kryesia në parlament e deri te mbi gjysmat e diplomatëve duhet të largohen. Pra spiunët të shporren dhe ish-komunistët të kërkojnë falje publikisht. Bush i urren komunistët, Nato i përbuz. Po vjen çasti që edhe ne të dënojmë krimet komuniste dhe të shporrim spiunët e shkollës së Beogradit dhe Moskës së lodhur. Pra tash lamtumirë financier, çifteli e daulle, naftëtar e poet, aspirin e penicilinë, koran myzeqeje dhe raketë apo olta,ekonomist dhe masovik...Ej sa shumë. Oh sa keq me qen spiun! Por Ngjela ka than: “Po të kisha ken spiun sot do isha ministër."

anetetaret me aktiv Anëtarësuar : 13 Dec 2007 Mesazhe : 96

Besoj se eshte nje tjeter manover per te larguar vemendjen e opinionit dhe medias ne veçanti nga çeshtja Gerdeci. Dosjet as jan hap, dhe as do te hapen as sot as neser, as mot as kurre, per aresyen e thjeshte se sot pushtetin e kane ish spiunet neser do ta kene bijte e tyre. Vetem nese ne Shqiperi do te kete ndonjehere rrevulucion qe do te buroje nga populli atehere ndoshta mund te shpresohet sado vone qe te jete qe nje dite populli do te njihet me autoret e krimeve te 60 viteve diktature komuniste.

anetetaret me aktiv Anëtarësuar : 08 Dec 2007 Mesazhe : 755

Plotesisht dakort. Per fat te keq euforizmi i PAPES me ngjan me ato duartrokitjet e mjera te ish te perndjekurve politike ne lozhen e parlamentit nderkoh qe Berisha ne diskutonte seancen plenare per rrezoluten qe denonte krimet e diktatures. Sa kohe ende nuk eshte bere hapi i pare dhe me elemantar ai i ngritjes se nje permendoreje ku te jene shkruar te gjithe emrat e viktimave te diktatures hapja e dosjeve tingellon mjaft mosbesues dhe mbetet gjithnje nje levizje qe eshte perdoruer ne nje moment te caktuar dhe per nje qellim te caktuar.

anetetaret me aktiv Anëtarësuar : 16 Apr 2008 Mesazhe : 195

Proces-verbal

I mbajtur sot me daten 11/x/1971 ne drejtorine e puneve te brendeshme Tirane, nga komisioni i perbere nga punetori operativ Vehbi Agolli, shefi i seksionit te V -te Bajram Doçi dhe shefi seksionit te pergjithshem Mustafa Kondo, i formuar konform rregullores se kartotekave Nr. 2271 date 18 /11/1968 per studimin, vleresimin dhe asgjesimin e dosjeve personale te agjentures.-
Nga studimi i bere dosjes personale te b.p me pseudonim "Tigri" doli qe nuk ka vlere ruajtje te metejshme sipas motivit qe shenohet me poshte, por te asgjesohet sepse;
Qemal Ali Sakajevo, i date-lindjes 1942 i kategorise informator, me pseudonim "Tigri" i terhequr ne bashkepunim me daten 14/11 nga Dega e P. Brendeshme Lushnje ne drejtim objekti Nr vitin 1966, me burse shteti vjen ne Tirane per te vazhduar Institutin e Larte Bujqesor, te cili e mbaroi vitin e kaluar dhe eshte emeruar me pune korrespondent i gazetes "Rinia"^prane K.Q.Rinise. Gjate kohes ne Institut ka dhene te dhena me vlere operative per organete tona, sidomos ne drejtim te Muharem Ferit, emigrant kosovar, me banim ne Durres; ka qene shume i rregullt ne takime, i disiplinuar, ka kryer mire detyrat e ngarkuara nga ana jone.
Por duke mare parasysh se ai aktualisht punon prane K.Q.Rinise, ka te kaluar te mire politike dhe eshte rekomanduar per tu pranuar ne parti, komisioni vendosi heqjen e tija nga rrjeti yne agjentural si i panevojshem dhe njekohesisht asgjesimin e dosjes personale me Nr. 3017-
Komisioni

Punetori Operativ Shefi i seksioni te V-te Shefi Seksionit Pergjithshem
(Vehbi Agolli ) ( Bajram Doçi) (Mustafa Kondo)

Anëtarësuar : 07 Jan 2008 Mesazhe : 48

Kjo do te thote qe shumica e dosjeve jane zhdukur qe ne kohen e Dulles pa marre parasysh se sa jane zhdukur gjate ketyre 17 vjeteve. Keshtuqe kjo puna e hapjes se dosjeve eshte nje vrime ne uje.

anetetaret me aktiv Anëtarësuar : 08 Dec 2007 Mesazhe : 126

Me nje fjale po te ishe komunist ta zhduknin dosjen.

anetetaret me aktiv Anëtarësuar : 16 Apr 2008 Mesazhe : 195

Ta zhduknin dosjen po jo proces-verbalin.Si komunist te hapnin nje dosje tjeter.

Anëtarësuar : 07 Apr 2008 Mesazhe : 8

Si komunist nuk ishe me spiun ordiner por kualifikoheshe tek spiunet e regjur.

Anëtarësuar : 18 Jan 2008 Mesazhe : 36

Sipas ketij procesverbali kuptohet qe te gjith ata qe kane bere kariere ne kohen e Dulles, duhej qe me perpara te jepnin prova besnikerie ndaj partise, si puna e ketij mikut ketu lart, e pastaj te gradoheshin komunist.
Sot shqiperine e drejtojne ish komunistet dhe shume prej tyre nuk kane qene komuniste te thjeshte por me detyra.
Merreni vete me mend se kush i ka ne duar fatet e ketij populli.
Asgje nuk ka ndryshuar, dhe asgje nuk do te ndryshoje sa kohe ata te jene ne krye. Mire thote "shqiptar e bir shqiptari"; Kishim nje diktator, tani kemi nje klan diktatoresh.

anetetaret me aktiv Anëtarësuar : 08 Dec 2007 Mesazhe : 84

Kesaj i thone; No Coment

anetetaret me aktiv Anëtarësuar : 08 Dec 2007 Mesazhe : 275

E megjithate nuk do te kemi hapje te dosjeve sepse dosjet jane zhdukur. Aty ketu do te publikohet ndonje dokumet i tille pa ndonje vlere te veçante si dokumenti me lart sa per te kenaqur opinionin dhe kaq.

anetetaret me aktiv Anëtarësuar : 10 Jan 2008 Mesazhe : 150

Osht e qarte. Natyrisht qe spiunet nuk do hapin dosjet e spiunve, por ça ka met do ta rujn per ti bo shantazh njoni tjetrit.

anetetaret me aktiv Anëtarësuar : 29 Dec 2007 Mesazhe : 59

Sot seanca parlamentare ishte shume e neveritshme. Te vjen te vjellesh kur sheh te korruptuarit e djeshem te akuzojne te korruptuarit e sotem. çfat te zi qe paska patur shqiptari.

anetetaret me aktiv Anëtarësuar : 13 Dec 2007 Mesazhe : 96

Biberaj: S'ka vullnet per hapjen e dosjeve

Bisedoi: Fatjona Mejdini
E Merkure, 21 Maj 2008

Zv.presidenti i Asamblese Parlamentare te Keshillit te Evropes, njekohesisht deputeti i PD-se, Aleksander Biberaj, thekson se parlamenti shqiptar nuk ka vullnet per te hapur dosjet e spiuneve te ish-Sigurimit te Shtetit, qe sot mund te gezojne vende te lakmuara ne politike dhe administrate. Ne nje interviste per "Koha Jone", Biberaj thekson se fakti qe hapja e dosjeve po ndesh kaq rezistence, te ben te mendosh se ish-bashkepunetoret kane qene te shumte ne numer, por edhe te shtrire ne gjeografine politike. Ne kete menyre, ai nuk mohon qe ish-bashkepuntoret e Sigurimit te Shtetit sot te jene edhe brenda te djathtes shqiptare. Biberaj thekson se PD duhet te nxitoje ne kete nisme, sepse ajo u ka borxh ish- te perndjekurve politike faktin qe nje pjese e atyre qe i kane persekutuar keta njerez prej vitesh, sot gezojne poste te larta dhe privilegje shtese.

Pse mendoni se po vonohet shqyrtimi i tre projektligjeve qe parashikojne edhe hapjen e dosjeve per funksionaret e larte?

Ne tetor te vitit 2006 Kuvendi i Shqiperise ka miratuar rezoluten "Per denimin e krimeve te kryera nga regjimi komunist ne Shqiperi", rezolute qe ne paragrafin 11 te saj parashikon edhe hapjen e dosjeve te ish-bashkepunetoreve te Sigurimit te Shtetit per funksionaret e larte. Po ashtu ne tetor 2006 jane paraqitur ne Kuvend edhe tre projektligje, "Per pastertine e figurave te zyrtareve te larte", respektivisht nga PD, PS dhe PDK. Fatkeqesisht, qe nga ajo kohe dhe deri tani, pervec deklaratave te bera nga politikane te ndryshem, akoma nuk eshte marre kush me kete pune dhe realisht nuk bere asgje per hapjen e ketyre dosjeve. Ka pasur nje zhvillim pozitiv lidhur me kompensimin material te ish-te persekutuarve politike, pasi eshte miratuar nga Kuvendi ligji per demshperblimin e tyre. Ligj qe sipas medias ka pasur edhe ai veshtiresite e veta ne zbatim, si pasoje e dokumenteve te shumta qe kerkohen, por dhe e burokracise se tepert. Gjithsesi qe te vij tek pyetja juaj, do te thosha se kjo vonese kaq e gjate, me duket e pajustifikueshme, dhe une nuk shoh shkak tjeter pervec mungeses se vullnetit politik per hapjen e ketyre dosjeve. Natyrisht qe axhenda e Kuvendit ka qene dhe mbetet e ngjeshur, dhe kjo eshte detyra e Kuvendit, por besoj se nese do te kishte vullnet, do te gjendej edhe kohe. Gjithsesi mendoj qe gjerat jane te thjeshta dhe perseri ka kohe, n.q.s. do te kete vullnet per hapjen e ketyre dosjeve, te tre projektligjet kalojne menjehere ne Komisionin e Ligjeve, i nenshtrohen nje debati politik dhe publik, behen perpjekje per integrimin e ketyre tre projekt-ligjeve ne nje variant te vetem final, i cili i paraqitet seances per miratim dhe votohet. Ne rast te kundert vazhdohet me deklarata dhe me akuza te ndersjella dhe kjo histori do te vazhdoje pambarimisht edhe per shume vite dhe ndoshta dekada, deri sa ne politike te kete vetem brez qe ne Dhjetorin '90, kane qene poshte moshes 18 vjec.

A mendoni se edhe ne radhet e se djathtes aktuale ka bashkepunetore te ish-Sigurimit?

Me sa duket, ndaj kesaj semundjeje nuk paska pasur imunitet. Fakti qe hapja e dosjeve po ndesh kaq rezistence, te ben te mendosh se ish-bashkepunetoret paskan qene te shumte ne numer, por edhe te shtrire ne gjeografine politike. Gjithsesi, nuk do deshiroja as te parashikoja ndonje gje dhe as te paragjykoja askend, prandaj edhe kam qene dhe jam per hapjen e dosjeve, me qellim qe politika te mos vazhdoje akuzat e ndersjella dhe media te mos luaje me pseudonime politikanesh. Nepermjet hapjes se dosjeve, nga njera ane e verteta do te dale ne shesh dhe gjithcka do te dokumentohet, sikurse nga ana tjeter, nepermjet hapjes se tyre, kjo histori do te mbyllet nje here e mire.

Realisht a do te ishte e lehte qe politikanet ish-bashkepunetore te largohen nga skena politike si pasoje e te kaluares se tyre?

Do te ndodhte ajo qe ka ndodhur edhe ne vende te tjera ish-komuniste, pasi ne demokraci vepron ligji dhe ligjin e ben shteti ligjor. Gjithcka do te ishte ne funksion te ligjit qe do te miratoje Kuvendi, por kuptohet qe per ish-bashkepunetoret e Sigurimit te Shtetit nuk do te kishte me vend ne politike. Mendoj se pastrimi i politikes shqiptare nga ish-bashkepunetoret e Sigurimit te Shtetit eshte pjese e misionit te PD-se, sikurse kete pastrim PD ia ka borxh shtreses se ish-te persektuarve politike. Imagjinoni sot nje ish-te persekutuar politik, ne ditet e fundit te jetes se tij, qe shkon ne nje zyre shteti per te plotesuar dokumentacionin e burgut per demshperblim, dhe nuk mbaron pune, pasi aty mund te gjeje ate person qe ne emer te "luftes se klasave" dhe te "diktatures se proletariatit", e ka kalbur kete qytetar ne burg, vetem e vetem se ky qytetar i lodhur nga jeta dhe nga varferia e asaj kohe, u ankua nje dite ne radhen e bukes se "kjo buke eshte e keqe dhe nuk hahet dot".

anetetaret me aktiv Anëtarësuar : 13 Dec 2007 Mesazhe : 152

Madhi: PD te hape dosjet e sigurimit
Fatjona Mejdini
E Shtune, 24 Maj 2008

Hapjen e dosjeve e kerkojne dhe republikanet, te cilet nuk kane ngurruar te shprehen se duhet te jete PD nismetarja e berjes se ligjit per perjashtimin e politikaneve spiune nga politika. Keshtu, kjo parti e koalicionit qeverises shprehu diten e djeshme edhe qendrimin e saj pro hapjes se dosjeve per evidentimin e ish-sigurimsave te shtetit qe vazhdojne sot te kene poste drejtuese ne politike dhe ne administrate. Ne nje prononcim per mediat, kreu i Grupit parlamentar te Partise Republikane, Arian Madhi, deklaroi se PR ishte e bindur qe hapja e dosjeve duhej te kryhej sa me shpejt te ishte e mundur. Sipas tij, republikanet do te marrin pjese aktivisht ne kete proces dhe ata jane te hapur per transparence, duke paralajmeruar ne kete menyre dhe voten pro te tyre per kete proces, teper te kerkuar dhe nga organizmat nderkombetare dhe konkretisht KE. "Ne republikanet jemi deklaruar plotesisht per te bere nje proces transparence ne kete drejtim, ne perputhje me te gjithe rekomandimet e nderkombetareve", deklaroi dje kreu i Grupit parlamentar te PR-se. Sipas Madhit, jane paraqitur ne Kuvend drafte ligjore, nepermjet te cilave kerkohet hapja e dosjeve per ish bashkepunetoret e sigurimit te shtetit. Tre te tilla, perkatesisht te PD, PS dhe PDK kane kohe qe "flene" ne Kuvend, pavaresisht se ne cdo kalendar trejavor ato jane futur ne axhenden e Kuvendit per diskutim. "Ne momentin ku do te behet programimi dhe diskutimi per to, ne patjeter qe do te japim kontributin tone", thekson Madhi ne lidhje me nje ceshtje shume te debatueshme, sic eshte ajo e hapjes se dosjeve. Por, PR shprehet se, duke qene se PD eshte partia me e madhe ne mazhorances, duhet te jete ajo iniciatore e nje ligji te tille. Pak dite me pare edhe demokristianet, aleate te demokrateve ne qeverisje, kerkuan hapjen e menjehershme te dosjeve per bashkepunetoret e ish-sigurimit te shtetit. Nepermjet nje konference per shtyp, kreu i Grupit parlamentar te PDK-se, Ndue Shpani, deklaroi se Kuvendi nuk mund ta shtynte me shume kete ceshtje, por duhet te niste sa me pare diskutimin e drafteve ku parashikohet edhe hapja e dosjeve. Perfaqesuesit i deputeteve demokristiane shprehu shqetesimin e tij per faktin se, ndonese PDK prej me shume se nje viti kishte depozituar ne Kuvend nje draft per hapjen e dosjeve, perseri ende asnje hap nuk ishte ndermarre ne kete drejtim. Po keshtu, kreu i Grupit parlamentar te Partise Demokristiane, nuk ngurroi te theksonte se ne Kuvend ndodhen deputete, te cilet kane qene pjese e ish-sigurimit dhe per pasoje hapja e dosjeve nuk eshte e favorshme per ta. Madje, Shpani deklaroi se deputetet me dosje kane qene me aktivet edhe ne luften kunder PDK-se. Pak kohe me pare, ministri demokristian i Shendetesise, Nard Ndoka tha se ish-sigurimsat gjenden edhe ne radhet e ministrave. Kuvendi pritet qe ne javet e ardhshme te marr ne shqyrtim edhe draftet e partive per hapjen e dosjeve.

Biberaj: Ish-bashkepunetoret, ne dy krahet politike

Deputeti i Partise Demokratike, Aleksander Biberaj, deklaroi pak dite me pare se mendonte se ish-bashkepunetoret e sigurimit te shtetit ishin te shumte edhe ne radhet e politikes. Sipas Biberajt, ky konkluzion i dilte nga fakti qe, ndonese prej me shume se nje viti eshte kerkuar hapja e dosjeve, ende Kuvendi nuk e ka shtruar per shqyrtim kete ceshtje shume te rendesishme. Sipas Biberajt, nuk perjashtohej mundesia qe ish-sigurimsat te ishin te shumte edhe ne radhet e te djathtes aktuale, por qe duheshin perjashtuar nga politika sipas kerkeses se KE.

Starova: Te vonuar per ligjin kunder "Spiuneve"

Kryetari i Bashkimit Liberal Demokrat, Arjan Starova, deklaroi diten e djeshme se politika ishte shume e vonuar ne procesin e hapjes se dosjeve per bashkepunetoret e ish-sigurimit te shtetit. Sipas tij, politika duhet te nxitoje ne lidhje me kete ceshtje edhe per faktin se hapjen e dosjeve e ka detyrim per qytetaret.

"Ky proces duhet te ishte bere prej kohesh dhe do te ishte me e mira qe te mos humbej me kohe ne kete drejtim, sepse keto dosje, jane pjese e nje debati publik, e nje pakenaqesie dhe eshte nje detyre dhe nje shqetesim i politikes se vertete shqiptare", deklaroi Starova ne nje prononcim per mediat. Por, ai deklaroi se tashme kjo nisme ishte ne duart e Kuvendit dhe pro hapjes se tyre ishte prononcuar disa here edhe Kryetarja e Kuvendit, Jozefina Topalli. Kreu i PBLD-se theksoi se, meqenese ne Kuvend jane tre drafte te depozituara per te kete ceshtje, i takonte Partise Demokratike si partia me e madhe ne vend te niste edhe ligjin per hapjen e dosjeve te ish-bashkepunetoreve te sigurimit te shtetit. Dy vjet me pare, Kuvendi ka miratuar edhe nje rezolute per krimet e komunizmit dhe ne kete rezolute parashikohet edhe hapja e dosjeve.

anetetaret me aktiv Anëtarësuar : 12 Dec 2007 Mesazhe : 88

Mazhoranca: Nuk do ketë shtyrje të tjera, koha për ligjin e dosjeve të ish-bashkëpunëtorëve të Sigurimit

(24.05.2008)
Eksponentë të politikës së djathtë janë shprehur dje për zhbllokimin e projekt-ligjit për hapjen e dosjeve të regjimit komunist. Në kushtet kur vendi ynë synon të anëtarësohet në NATO dhe BE, hapja e dosjeve shndërrohet në një parakusht për politikën shqiptare

Hapja e dosjeve të regjimit komunist vazhdon të mbetet një tjetër kriter i standardizuar nga Këshilli i Evropës dhe NATO, por që ende vazhdon të mbetet një cështje, në dukje abstrakte dhe pa veprime konkrete, sa e lehtë për t’u sugjeruar, aq më e vështirë për t’u zbatuar praktikisht. Kjo çështje që kthehet herë-herë në jetën politike shqiptare, e tillë mbyllet, thjesht me prononcime dhe thirrje për hapjen e tyre, pasi sigurimsat kanë akumuluar strukturat e larta të administartës shtetërore dhe jetën politike në vend. Ajo që duhet vlerësuar, është fakti se kjo temë shume e diskutuar nuk zhduket nga axhenda e politikës, por që ka nevojë për aksione konkrete dhe zbardhjen e dosjeve të sigurimit, si një domosdoshmëri e standardizuar nga NATO dhe BE, drejt dy strukturave të më sukseshme, në të cilat synojmë të arrijmë, brenda një kohe të caktuar në koherencë me plotësimin e kritereve. Kësisoj, mazhoranca parlamentare e udhëhequr nga PD, është përpjekur për vite me radhë që të zbardhë të gjithë të inkriminuarit në çështje të sigurimit të shtetit, gjatë përiudhës së egër komuniste, maoiste. Dy ditë më parë, deputeti i Partisë Demokratike, Aleksandër Biberaj, bëri thirrje që PD duhet të fillojë të bëjë dekomunistizimin e shoqërisë shqiptare, në mënyrë që t’i largohemi njëherë e përgjithmonë asaj të kaluare të dhimbshme nën terrorin e egërsisë komuniste. Në të njëjtën linjë mendimi është shprehur dje Partia Republikane, ‘pro’ hapjes së dosjeve për bashkëpunëtorët e ish-Sigurimit të Shtetit. Kreu i Grupit Parlamentar të PR-së, Arjan Madhi, deklaroi se “ne republikanët jemi deklaruar plotësisht për të bërë një proces transparence në këtë drejtim, në përputhje me të gjithë rekomandimet e ndërkombëtarëve”. “Qëndrimin tonë ne e kemi bërë publik me draftet e paraqitura në Parlament”, tha Madhi. Sipas tij, këto drafte janë të përfshira eventualisht në axhendën e punës së Kuvendit dhe do të jepet kontributi në momentin që ato do të programohen. Ndërsa Kryetari i Bashkimit Liberal Demokrat, Arjan Starova, shprehu qëndrimin e kësaj force politike për hapje të dosjeve të periudhës së sistemit komunist. Starova tha se “është një proçes që duhet të ishte bërë prej kohësh dhe do të ishte më e mira që të mos humbej më kohë në këtë drejtim, sepse këto dosje, janë pjesë e një debati publik, e një pakënaqësie dhe është një detyrë dhe një shqetësim i politikës së vërtetë shqiptare”. Sipas tij, nuk duhet më të spekullohet me këto dosje. “Është mirë të hapen dhe kam besim që meqënëse kjo nismë është tashmë në duart e Parlamentit, dhe për këtë është prononcuar disa herë dhe Kryetarja Topalli, besoj që do të jetë një proces që do të nisë së shpejti”, tha Starova. Duke u ndalur tek rezoluta e miratuar nga Kuvendi i Shqipërisë për këtë çështje në vitin 2006, kreu i BLD-së shtoi se “rezoluta ka konfirmimin që duhet të hapen dosjet, por nga rezoluta deri në hapje duhet bërë një hap tjetër, duhet bërë një ligj, duhet të merret një nismë ligjore dhe besoj që PD si partia më e madhe e koalicionit të djathtë duhet ta nisë”. “Duke folur në emër të BLD, ne do të japim mbështetje të plotë për këtë”, u shpreh ndër të tjera Starova. Gjatë qeverisjes së parë të PD-së, që u referohet viteve të para të ’90-ës, pati përpjekje serioze për dekomunistizimin e shoqërisë shqiptare, pasi u miratua legjislacioni përkatës dhe filloi të zbatohej ky legjislacion. Por, ky proçes u ndërpre pas ardhjes së të majtës në pushtet në vitin ‘97 dhe me kalimin e viteve procesi gradualisht u sfumua. Dihej se majta shqiptare nuk kishte vullnet për të bërë dekomunistizimin. Zakonisht ky është mision i së djathtës, dhe me riardhjen e saj në pushtet në vitin 2005 ky proçes duhej të vazhdonte, në mënyrë që shoqëria shqiptare, edhe pse disi vone, të ndahej një herë e mirë nga ajo e kaluar e hidhur. Kjo deri tani nuk ka ndodhur, madje sot nuk ka asnjë garanci që të mos ketë kudo ish-bashkëpunëtorë të ish-Sigurimit të Shtetit. Përderisa nuk ka një legjislacion që t’i vërë barrierë ish-bashkëpunëtorëve, ata mund të jenë kudo. Vetëm ligji dhe zbatimi i tij do t’i pengonin ata për të qenë aty ku mund të jenë sot në mënyrë tepër të dyshimtë. Ndërkaq, deputeti Biberaj, vuri në dukje gjithashtu se Kuvendi i Shqipërisë ka miratuar një rezolutë për dënimin e krimeve të komunizmit në Shqipëri, rezolutë që bazohej në dy rezoluta të Këshillit të Europës, rezolutë që parashikon edhe hapjen e dosjeve për ish-bashkëpunëtorët e ish-Sigurimit të Shtetit. “Stadi i ri, në të cilin ka hyrë Shqipëria pas marrjes së ftesës për anëtarësim në NATO, si dhe rruga drejt anëtarësimit të plotë në NATO dhe BE, e bëjnë procesin e hapjes së dosjeve të domosdoshëm, sepse në NATO dhe BE nuk shkohet me njerëz të Traktatit të Varshavës apo të KNER-it, por me njerëz që janë kompatibël me modelet e NATO-s dhe BE-së”, u shpreh Biberaj dy ditë më parë për mediat. Megjithatë, çështja e hapjes së dosjeve është rikthyer përsëri në axhendën ditore politike, ashtu si edhe shumë herë të tjera të kaluara, por vullneti i klasës politike, duhet të përshpejtojë drejt zbardhjes së ish-bashkëpunëtorëve të Sigurimit të Shtetit dhe të largojë njëherë e përgjithmonë klikat e mercenarizuara të sistemit komunist enverist gjatë 45 viteve të errëta të tij.