Të përndjekurit revoltohen me Topin: “Presidenti po dekoron persekutorët e të përndjekurve”

Të përndjekurit revoltohen me Topin: “Presidenti po dekoron persekutorët e të përndjekurve”

Nga Armand Maho

Simon Miraka, drejtor i Institutit të Integrimit të të Përndjekurëve Politikë, tha dje në emër të disa përfaqësuesve të të përndjekurve, se presidenti, Bamir Topi, po shpërfill një kërkesë të tyre për të dekoruar revoltën e Spaçit, por po dekoron njerëz që kanë persekutuar të përndjekurit politikë.
“Jemi këtu para jush, një përfaqësi e dëshmitarëve të mbijetuar nga revolta e Spaçit, një nga ngjarjet që mund të shënohet me krenari si rezistencë antikomuniste dhe dëshmi e shpirtit demokratik, properëndimor shqiptar, 35 vjet më parë….
Ne jemi këtu për të denoncuar heshtjen dhe mospërfilljen e Presidentit të Republikës ndaj një kërkese tonën të datës 25.02.2008 për të dekoruar këtë revoltë me Medaljen e Shqiponjës, bazuar mbi të gjithë legjislacionin përkatës për “Dekoratat në Republikën e Shqipërisë.”
Ky dekorim do të ishte jo vetëm një nder për figurën e presidentit dhe misionin e institucionit në fjalë, por dhe një obligim moral që drejtuesit dhe shoqëria e një shteti demokratik kanë ndaj pishtarëve të fjalës së lirë. Ndaj atyre, të cilët sakrifikuan rininë, familjen dhe jetën e tyre me vetëmohim në mbrojtje të parimeve dhe vlerave të lirisë e pluralizmit, që gëzojmë ne sot. Ky do të ishte respekti dhe vlerësimi më modest ndaj kësaj shtrese të përvuajtur, ku në vendet e tjera, të gjitha nivelet e shoqërisë dhe institucionet përulen me nderim”, - tha Miraka.
Sipas tij, heshtja fyese e presidentit nuk ka mjaftuar, por ai ka dekoruar njerëzit që janë persekutorët e të burgosurve në Spaç.
“Sikur të mos mjaftonte kjo heshtje fyese ndaj kërkesës sonë, Presidenti i Republikës, z. Bamir Topi, ka dekoruar pak kohë më parë dy zotërinjtë , Njazi Jaho dhe Xhevat Hana, me titullin e lartë “Nderi i Karrierës”.
Sipas dëshmive rrëqethëse që ish-të burgosur dhanë në përvjetorin e revoltës së Spaçit, këta dy emra u përmendën si persekutorë të egër fizikë dhe të psiqikës së të burgosurve të ndërgjegjes në burgun famëkeq të Spaçit.
Na lejoni t'ju pyesim zoti president:
Në emër të lirisë, ju dekoroni dhunuesit e saj?
Mbi ç'parime të së drejtës dhe të shtetit demokratik ju legjitimoni dekorimin e paprecedent të persekutorëve tanë që i dhanë jetë diktaturës më të egër në Evropë?”, - deklaroi Miraka.


Të përndjekurit përfshihen në debatin për Gjykatën e Lartë


Në deklaratën e të përndjekurve nuk mund të lihej mënjanë edhe çështja e emërimeve në Gjykatën e Lartë, që ka ngërthyer mazhorancën dhe presidentin në krizë. Një nga kritikat që po bëhet nga mazhoranca ndaj emrave të përfshirë në listën e propozuar nga presidenti është se ndonjë prej tyre mund të jetë persekutor gjatë regjimit komunist.
“Gjithashtu, do të dëshironim të apelonim pranë institucioneve të drejtësisë shqiptare që të jenë me të drejtë më historinë dhe vuajtjen e atyre që luftuan në diktaturë për liri e të mos promovojnë në poste drejtuese të gjyqësorit dhe të prokurorisë persekutorët e zellshëm të regjimit më të egër komunist që ka njohur Evropa”, - thuhet në deklaratën e bërë nga të përndjekurit.

Eh kto tpersekutumit. Asiher se muren vesh se qeverin hala e kan ndor ato qi e kishin ka 50 vjet. Or tmjeru, as e keni, as e keni pas, as nuk keni per ta pas pishtetin ene tdrejtat, sikur ene bota tpermyset se jeni da e perça nkaterqin copash. Kur ua japin i cop buk mir jo keq, deri dje ene ate sua kan dhon.