Ambasadori amerikan, i përfshirë në skandalin e trafikut të armëve

Ambasadori amerikan, i përfshirë në skandalin e trafikut të armëve

Nga Tema

Ambasadori amerikan në Shqipëri, John Withers, ka pranuar zhdukjen e provave të trafikut të armëve nga Shqipëria drejt Afganistanit.
Kështu thuhet në një letër të kryetarit të Komisionit për Mbikëqyrjen dhe Reformat e Qeverisë pranë Kongresit amerikan, Henry Waxman, drejtuar Sekretares së Shtetit, Condoleezza Rice. Përfaqësuesi demokrat nga Kalifornia i referohet në këtë letër një interviste me një zyrtar ushtarak të ambasadës amerikane në Shqipëri, i cili rrëfen se ambasadori amerikan, John Withers dhe ministri i Mbrojtjes janë takuar një ditë para mbërritjes së reporterit të “New York Times” që po hetonte në lidhje me dërgimin e municionit kinez (që dënohet nga ligji amerikan) drejt Afganistanit. Këtij municioni i hiqeshin shenjat që tregonin se ishte mall kinez dhe ripaketohej e dërgohej sikur të ishte prodhim shqiptar. I shqetësuar për këtë skandal, Mediu kërkon një takim me ambasadorin dhe i kërkon atij që të zhdukin gjurmët që faktonin një gjë të tillë dhe ambasadori amerikan bie dakord.
Më poshtë vijon letra e plotë e kongresmenit Waxman drejtuar Rice, ku sqarohen në dhjetë faqe të gjitha detajet e këtij skandali:

Shkëlqesisë së saj
Condoleezza Rice
Sekretare e Departamentit amerikan të Shtetit

E nderuara sekretare Rice:

Komisioni i Mbikëqyrjes ka marrë informacion se ambasadori amerikan në Shqipëri ka patur një takim në orët e vona të natës me ministrin shqiptar të Mbrojtjes, gjatë cilit ambasadori ra dakord për zhdukjen e fakteve të origjinës së municionit kinez që transportohet nga Shqipëria në Afganistan prej një kontraktuesi amerikan. Komisioni ka marrë gjithashtu informacion, se zyrtarë të Departamentit të Shtetit janë përpjekur ta fshehin këtë informacion prej Komisionit.
Më 9 qershor 2008, Komisioni mori në pyetje majorin Larry Harrison, shefi i Zyrës së Bashkëpunimit të Mbrojtjes në ambasadën amerikane në Shqipëri. Sipas majorit Harrison:


- Më 19 nëntor 2007, ambasadori i SHBA në Shqipëri dhe ndihmësit e tij kryesorë u takuan me ministrin shqiptar të Mbrojtjes për të diskutuar si t’i përgjigjeshin një kërkese të gazetës “New York Times” për të vizituar në Shqipëri vendet, ku një kontraktor amerikan, AEY, Inc., hiqte municionin nga paketimi i tij kinez, para se ta niste për në Afganistan.


- Si rezultat i bisedimeve që zgjatën deri natën vonë, ministri shqiptar i Mbrojtjes urdhëroi një nga gjeneralët e tij të lartë për të fshehur gjithë gjurmët e paketimit kinez, para se vendi të inspektohej të nesërmen. Majori Harrison i tha Komisionit: “Ambasadori ra dakord, se kjo do të hiqte dyshimet për shkelje ligji.”


- Në kohën e këtij takimi, AEY ishte nën hetim për trafik të paligjshëm në lidhje me municionin kinez. Majori Harrison i tha Komisionit se ai nuk ishte dakord me vendimin për të fshehur gjurmët e paketimit kinez dhe gjatë takimit “nuk ndihej rehat”.


Për më tepër, duket se zyrtarët e ambasadës kërkuan ta fshihnin informacionin për Komisionin. Komisioni i kërkoi Departamentit të Shtetit të ofronte çdo lloj informacioni në lidhje me takimin mes zyrtarëve të ambasadës dhe ministrit shqiptar të Mbrojtjes, si edhe çdo lloj informacioni për ndërhyrje në operacionin e ripaketimit të AEY. Megjithëse majori Harrison u kërkoi me forcë zyrtarëve të ambasadës që të informonin Komisionin për takimin e 19 nëntorit 2007, në përgjigjen e tyre zyrtarët e ambasadës fshinë çdo lloj reference në lidhje me takimin.
Të premten, Departamenti i Drejtësisë lajmëroi fajësinë e AEY dhe katër zyrtarëve të kompanisë për fshehjen e origjinës kineze të municionit që transportohej nga Shqipëria në Afganistan. Megjithëse rrethanat janë të ndryshme, dëshmitë që ka siguruar Komisioni sugjerojnë se të paktën në një rast, zyrtarët e ambasadës kanë luajtur gjithashtu një rol në fshehjen e origjinës kineze të municionit. Kjo dëshmi ngre pikëpyetje rreth rolit të Departamentit të Shtetit në transportin e municionit të paligjshëm kinez dhe sinqeritetit të përgjigjeve të Departamentit për Komisionin. Për të ndihmuar Komisionin për vazhdimin e hetimeve të tij, iu kërkoj që disa nga zyrtarët e ambasadës të paraqiten para Komisionit për intervistime të transkriptuara.
Gjithashtu, kërkoj nga ju që të ofroni çdo lloj dokumenti në lidhje me çështjen.


Background


Më 25 mars 2008, Departamenti i Mbrojtjes e pezulloi AY “nga kontrata në të ardhmen me çdo agjenci në degën ekzekutive të qeverisë së SHBA.” Bazë për këtë pezullim ishte evidenca se nën një kontratë prej 298 milionë dollarësh me Forcat e Armatosura për të furnizuar me armë forcat e sigurisë në Afganistan, AEY bleu municion nga Shqipëria që ishte “prodhuar në Republikën Popullore të Kinës mes viteve 1962-‘74”
Ligji amerikan e ndalon përdorimin e municionit që është prodhuar në Kinë.
Departamenti i Mbrojtjes e bëri pezullimin të bazuar edhe në dëshmi se AEY bëri deklarata false lidhur me origjinën e municionit kinez. Më 25 nëntor 2007, presidenti i AEY, Efraim Diveroli, i paraqiti Departamentit një certifikatë që deklaronte se prodhuesi i këtij municioni ishte ‘MFS 2000’, një kompani hungareze.
Zoti Diveroli e dinte që kjo deklaratë ishte “false dhe keqinformuese”, sipas pezullimit nga Departamenti dhe zyrtarëve që e ndaluan.
Pezullimi i Departamentit të Mbrojtjes për AEY erdhi disa ditë para se një artikull i gjatë në “New York Times” zbuloi publikisht se AEY kishte transportuar në Afganistan “dhjetëra miliona pushkë dhe fishekë... të prodhuar në Kinë, duke e kthyer prokurimin e tyre në shkelje të ligjit amerikan.”
Dy muaj pas pezullimit të AEY, Forcat e Armatosura i dhanë fund kontratës së armëve, duke cituar dështimin e AEY për të ofruar municion në përputhje me kontratën dhe pranimin nga vetë AEY se një pjesë e mirë e municionit ishte prodhuar në Kinë. Në një letër për zotin Diveroli, që i jepte fund kontratës në 23 maj 2008, zyrtari kontraktues deklaronte se AEY ofroi municion “nga burime të ndaluara dhe e pranon se një pjesë e mirë e municionit ishte, në fakt, e prodhuar në fabrika të Republikës Popullore Kineze”.
Më 19 qershor 2008, AEY, zoti Diveroli dhe tre individë të tjerë të afërt me AEY u gjetën përgjegjës për mashtrim prokurimi federal, konspiracion dhe deklarime false në lidhje me prokurimin e municionit kinez nën këtë kontratë.
Municioni i blerë nga AEY u shit nga Ministria shqiptare e Mbrojtjes përmes kompanisë MEICO. Ministri shqiptar i Mbrojtjes në kohën e shitjes ishte Fatmir Mediu. Sipas “New York Times”, ka fakte se ministri Mediu ka marrë ryshfet si pjesë të kontratës së AEY për municion.
Ministri i Mbrojtjes, Mediu, dha dorëheqjen nga detyra më 17 mars 2008, një javë para pezullimit të AEY dhe artikullit të “New York Times” dhe dy ditë pas një shpërthimi të madh në një bazë ushtarake afër kryeqytetit shqiptar, Tiranë.
Prokurorja e Përgjithshme e ka akuzuar atë për “Abuzim të detyrës” dhe “Përfitime të paligjshme”, duke favorizuar padrejtësisht bashkëpunimin shqiptaro-amerikan për çmontimin e municionit.
Parlamenti shqiptar i ka hequr atij imunitetin.


Takimi i nëntorit me ministrin shqiptar të Mbrojtjes


Më 9 qershor 2008, stafi i Komisionit mori në pyetje majorin Larry Harrison, zyrtar i Departamentit të Mbrojtjes, i cili punon në Shqipëri si shef i Zyrës për Bashkëpunim Ushtarak. Në këtë detyrë zoti Harrison është përgjegjës për ofrimin e “trajnimit dhe pajisjes me armatime për ndihmuar modernizimin e ushtrisë shqiptare, si dhe ofrimin e ndihmës njerëzore”.
Intervista me majorin Harrison zgjati rreth një orë, pastaj ai tregoi interes për të marrë ndihmë këshillimore dhe prokurori i Departamentit të Mbrojtjes që ishte i pranishëm e ndërpreu seancën. Më 12 qershor 2008, këshilluesi i zotit Harrison informoi se zotit Harrison do t’i duheshin të paktën dy javë për t’u përgatitur për vazhdimin e marrjes në pyetje.
Sipas zotit Harrison, ministri shqiptar i Mbrojtjes i telefonoi atij më 19 nëntor 2007 dhe i kërkoi një takim urgjent me ambasadorin e SHBA në Shqipëri, John L. Withers, II.
Gjatë marrjes në pyetje deklaroi se ministri shqiptar i Mbrojtjes ishte i shqetësuar se një gazetar i “New York Times” kishte planifikuar të inspektonte zonën pranë aeroportit të Rinasit, ku AEY bënte ripaketimin e municionit kinez, para sa të dërgohej në Afganistan, një proces që përfshinte heqjen e një pjese të municionit nga paketimi i tij kinez. Vizita e gazetarit, tha ai, ishte planifikuar për të nesërmen.
Sipas majorit Harrison, ministri shqiptar i Mbrojtjes ishte “shumë i shqetësuar dhe kërkoi nga unë që t’i përgatisja një takim me ambasadorin ose me zëvendësshefin e misionit në lidhje me gazetarin e “New York Times”.
Majori deklaroi se ministri i Mbrojtjes ishte i shqetësuar, se gazetari do të hidhte dyshime për korrupsion ndaj tij.
Sipas majorit Harrison: Shqetësimi kryesor i ministrit ishte se “New York Times” do të shkruante një artikull për korrupsionin shqiptar në Ministrinë e Mbrojtjes. Dhe shkaku për këtë shqetësim ishte... se çfarë do të bënte artikulli për reputacionin e tij personal dhe atë të Shqipërisë.
Majori Harrison deklaroi se në përgjigje të kërkesës së ministrit shqiptar të Mbrojtjes, ai kontaktoi zëvendësshefin e misionit, Stephen Cristina, i cili rregulloi një takim në banesën e tij private në Tiranë atë mbrëmje. Majori Harrison mori pjesë personalisht në atë takim, së bashku me ministrin shqiptar të Mbrojtjes, ambasadorin Withers, zëvendësshefin e misionit, Stephen Cristina dhe oficerin e ambasadës për Sigurinë Rajonale, Patrick Leonard.
Sipas majorit Harrison, takimi zgjati disa orë dhe mbaroi rreth mesnatës.
Majori Harrison i tha Komisionit se gjatë takimit, ministri shqiptar i Mbrojtjes kërkoi ndihmën e ambasadorit të SHBA. Sipas majorit Harrison, “ai komentoi disa herë, se ai kishte qenë mik i SHBA, kishte ndihmuar SHBA... Ai ndihej sikur SHBA i kishte borxh diçka.”
Majori Harrison deklaroi se zyrtarët pastaj diskutuan si të manovronin me gazetarin e “New York Times”. Ai deklaroi se këshilla e tij ishte që gazetari të mos lejohej të vizitonte zonën ushtarake, por nuk u mor parasysh. Në vend të kësaj, ministri shqiptar i Mbrojtjes thirri gjeneralin e përgjithshëm të Forcave të Armatosura të Shqipërisë dhe e instruktoi të largonte të gjitha arkat e municionit kinez nga zona e kështu “nuk do të mbetej gjë për t’u parë nga gazetari”.
Sipas majorit Harrison “ambasadori ra dakord se kjo do të hiqte dyshimet për shkelje ligji, nëse zoti Wood (gazetari i NYT) nuk do të shikonte arkat e municionit kinez, kur të ishte në vend.”
Majori Harrison deklaroi gjatë marrjes në pyetje se ai “nuk ndihej rehat” me këto veprime, sepse për veprimtarinë e AEY në Shqipëri ishte në proces një hetim për veprimtari kriminale.
Gjatë marrjes në pyetje me Komisionin, majori Harrison dha këto përgjigje:
Pyetje: Pra, në atë takim mes ministrit të Mbrojtjes, ambasadorit dhe disa zyrtarëve të tjerë të Departamentit të Shtetit, ishte e qartë se po bisedonit për municion kinez? A është kjo e saktë?
Përgjigje: E saktë. E saktë.
Pyetje: Dhe ishte e qartë se AEY ishte kompania që e blinte municionin nën një kontratë të SHBA?
Përgjigje: E saktë...
Pyetje: Dhe ju thatë, atë kohë, se ishit informuar që ishte e paligjshme, sipas ligjit amerikan, që një kontraktor amerikan të blinte municion kinez? A është e saktë kjo?
Përgjigje: Po zotëri, e saktë...
Pyetje: Dhe ju thatë atë kohë se ishte e qartë që një hetim ishte në proces e sipër... A është e saktë?
Përgjigje: Po, zotëri, e saktë.
Kur u pyet, nëse të gjithë ranë dakord me veprimet e ndërmarra gjatë këtij takimi, Major Harrison u përgjigj: “Dhe njëherë dua të them se nuk ndihesha rehat në këtë takim. Dhe, kur thashë që të gjithë pranuan, personalisht nuk isha dakord me atë çka po ndodhte në atë takim, por nuk kisha të drejtën e fjalës në të.”
Sipas Major Harrison: “Ata kërkuan këshillën time se çfarë duhej bërë. Dua të jem i qartë, nuk ndjehesha mirë gjatë këtij takimi që po zhvillonim. Por thjesht bëra këtë koment: “Epo, është një ambient ushtarak. Ju nuk duhet ta lini të futet. Ju nuk duhet të lini një reporter aty brenda.”
Një ditë pas takimit mes ambasadorit amerikan dhe ministrit shqiptar të Mbrojtjes, Patrick Leonard, oficeri për Sigurinë Rajonale, i shkruante një asistenti në e-mail: “NY Times” mbërriti sot dhe ndoshta do të bëjë një shkrim për këtë dhe gjërat mund të shkojnë keq... Ambasadori është shumë i shqetësuar për këtë çështje.”
Kur shkrimi i “New York Times” u publikua më 27 mars 2008, ai u shpërnda në të gjithë ambasadën. Në orën 6.06, po atë mëngjes, zoti Leonard dërgoi një e mail te disa zyrtarë të ambasadës amerikane, duke theksuar se çështja e AEY “ishte kryeartikull te “New York Times”, shtatë faqe i gjatë. Nuk përmendet përfshirja e ambasadës - falë Zotit!”

Reagimi i ambasadës ndaj Komisionit


Në përpjekje për të marrë informacion në lidhje me takimin e nëntorit të vitit 2007 mes ministrit shqiptar të Mbrojtjes dhe ambasadorit amerikan, Komisioni për Mbikëqyrjen siguroi dokumente që përshkruanin sesi zyrtarët e ambasadës amerikane në Shqipëri fshinë përpjekjet e Majorit Harrison për të informuar Komisionin për këtë takim dhe fshirjen më pas të shenjave kineze nga armatimi.
Më 28 mars 2008, Komisioni për Mbikëqyrjen i dërgoi Departamentit të Shtetit një dokument që kërkonte “të gjitha komunikatat që lidhen me AEY, nënkontraktorët, partnerët, ndërmjetësit, sekserët, shitësit, ose kompanitë e transportit mes zyrtarëve të Departamentit të Shtetit, qeverisë shqiptare dhe qeverive të tjera të huaja.”
Përveç kësaj letre, më 4 prill 2008, stafi i Komisionit kërkoi dhe të tjera informacione specifike:
1. Informacione për ndërveprimet e ambasadës amerikane në Shqipëri me AEY ose përfaqësuesit e saj;
2. Informacione për ndërveprimet e ambasadës me qeverinë shqiptare (Ministrinë e Mbrojtjes, MEICO) për sa i përket kontratës së AEY dhe aktiviteteve të saj;
3. Informacione për ndonjë ndërhyrje në nëntor ose dhjetor të vitit 2007 nga zyrtarë amerikanë (Departamenti i Mbrojtjes ose i Shtetit) në operacionet e nënkontraktorit të AEY për paketimin e municioneve në aeroportin afër Tiranës, ndoshta përfshirjen në to, duke mbyllur operacionet e paketimit për shkak të dhunimit të ligjeve amerikane për sa i përket origjinës së armëve.
Departamenti i Shtetit iu përgjigj kësaj kërkese më 9 prill 2008. Në një e mail drejtuar stafit, oficeri i Çështjeve Ligjore i Departamentit të Shtetit i dërgoi përgjigjet që mori “nga ambasada sot në lidhje me komunikimin e personelit të postës me AEY, Departamentin e Mbrojtjes dhe qeverinë shqiptare”.
Në përgjigje të pyetjes së dytë, në lidhje me kontaktet mes zyrtarëve të ambasadës së SHBA me Ministrinë shqiptare të Mbrojtjes, ambasada bëri këtë deklaratë:
Në kontekst për të ndihmuar hetimin e Departamentit të Mbrojtjes në këtë çështje, përfaqësues të ambasadës u takuan të paktën tri herë me zyrtarë të qeverisë shqiptare, përfshi edhe zyrtarë të MEICO-s dhe Ministrisë së Mbrojtjes. Përfaqësuesit e ambasadës ishin aty në rolin e përkrahësit të hetuesit të Departamentit të Mbrojtjes.
Në përgjigje për pyetjen e tretë, në lidhje me ndonjë ndërhyrje të Departamentit të Shtetit që ndikon zonën ushtarake të ripaketimit të AEY, ambasada iu përgjigj: “As zyrtari i ambasadës dhe as hetuesi i Departamentit të Mbrojtjes refuzuan apo ndërhynë në veprimtarinë në zonën ushtarake.”
Përgjigjet e ambasadës nuk flasin për takimin e nëntorit 2007 mes zyrtarëve të ambasadës dhe ministrit shqiptar të Mbrojtjes. Në përgjigjen e saj ambasada deklaroi se ajo luajti një rol të vogël ose nuk luajti fare në lidhje me çështjen, duke deklaruar: “Ne arritëm në përfundimin se ambasada nuk kishte rol avokator të përshtatshëm në një mosmarrëveshje me standarde ekonomike mes një kontraktori dhe qeverisë vendase dhe mund të merrnim pjesë, vetëm nëse urdhëroheshim për këtë përmes një kanali kryesor me miratimin e Departamentit të Mbrojtjes.
Dokumentet që zotëron Komisioni tregojnë se majori Harrison i ka kërkuar zyrtarëve të ambasadës të informonin Komisionin për takimin e nëntorit 2007, por nuk u mor parasysh. Ndërsa zyrtarët e ambasadës përgatitën një përgjigje për Komisionin, ata qarkulluan një draft që nuk e përmendte takimin e nëntorit 2007. Majori Harrison qarkulloi një draft të ri, në të cilin ai përdori opsionin e Microsoft Word “ndiq informacionin” për të sugjeruar përfshirjen e takimit të nëntorit 2007. Drafti i majorit Harrison përfshinte këtë fjalë:
A do ta përmendim takimin në shtëpinë e Steve-it më 19 nëntor (i pranishëm ambasadori Withers, DCM Cristina, RSO Patrick, dhe ODC Harrison), ku ambasadori i rekomandoi ministrit të mos e lejonte gazetarin të mos e shikonte municionin pranë aeroportit të nesërmen dhe ministri thirri major gjeneralin Spahiu... 23.00 të largonte... të gjithë municionin nga aeroporti deri në orën 8 të mëngjesit?
Zyrtarët e ambasadës nuk e pranuan sugjerimin e majorit Harrison. Në përgjigjen e fundit, zyrtarët e ambasadës e hoqën tekstin sugjerues të majorit Harrison për takimin e nëntorit 2007 dhe hoqën çdo referencë në lidhje me rekomandimet që ambasadori amerikan i dha ministrit shqiptar të Mbrojtjes.
Megjithatë, varianti përfundimtar i përgjigjes së ambasadës tregon se e kishte e “Qartësuar” nga “L Harrison”. Majori Harrison në dukje kurrë nuk e aprovoi atë. Pak konsultimit të një prokurori ushtarak, më 16 prill, Majori Harrison shkroi një memorandum që memorizon përpjekjet e tij për t’i kërkuar ambasadës të informojë Komisionin për takimin e nëntorit 2007. Ky memorandum thotë: Lista e pyetjeve m’u dërgua me e mail për të dhënë informacion shtesë. Megjithatë, unë dhashë informacion për pyetjen e tretë, zyrtari i Çështjeve Politike dhe Ekonomike, zëvendësshefi i misionit dhe ambasadori nuk e pranoi informacionin tim. Përgjigjet iu dërguan Komisionit me emrin tim ashtu siç ishin në memo ose në fjalë të tjera, por duke ruajtur përmbajtjen. Unë nuk e miratova përmbajtjen e përgjigjeve dhe unë jam i shqetësuar se informacioni mund të jetë hequr në përshtatje me pyetjen.”

Kërkesë për intervista dhe dokumente


Informacioni i marrë nga Komisioni ngre çështje serioze. Nëse informacioni është i saktë, duket se zyrtarët e lartë të ambasadës amerikane në Shqipëri miratuan përpjekjet e ministrit shqiptar të Mbrojtjes për të fshehur dërgesat ilegale të municioneve kineze, të cilat janë tani subjekt i një hetimi penal. Gjithashtu, duket se informacioni për incidentin iu fsheh Komisionit. Është e vështirë të kuptohet se cila arsye mund t’i justifikojë këto veprime.
Për të ndihmuar hetimin e Komisionit në këto çështje, unë kërkoj intervista të transkriptuara me individët e mëposhtëm, jo më vonë se 11 korriku i 2008.
1. John L. Withers, II, ambasadori amerikan në Shqipëri;
2. Stephen Cristina, zëvendësshef i misionit të ambasadës amerikane, Shqipëri;
3. Patrick Leonard, zyrtar i sigurisë rajonale, ambasada amerikane, Shqipëri;
4. Robert Newsome, sektori ekonomik/tregtar, ambasada amerikane, Shqipëri;
5. Paula Thiede, shefe e sektorit politik dhe ekonomik, ambasada amerikane, Shqipëri dhe
6. Victor Myev, zyrtar politik, ambasada amerikane, Shqipëri.
Duke shtuar, unë kërkoj që Departamenti të sigurojë të gjitha dokumentet që kanë lidhje me AEY, kontratën e tij, ose pjesë të veprimtarisë që janë krijuar ose janë zotëruar nga ambasada amerikane në Shqipëri ose personeli i saj, duke përfshirë të gjitha dokumentet e çdo takimi të nëntorit 2007 mes ambasadës amerikane dhe ministrit shqiptar të Mbrojtjes. Komisioni për Mbikëqyrjen dhe Reformën Qeveritare është Komisioni kryesor i mbikëqyrjes në Dhomën e Përfaqësuesve (Kongres) dhe ka juridiksion të gjerë mbikëqyrës, siç është parashikuar në rregulloren e Dhomës. Dokumente bashkangjitur kësaj letre japin informacion shtesë në direktivat e Komisionit për intervistat e transkriptuara dhe për atë sesi t’i përgjigjesh dokumenteve të kërkuara nga Komisioni. Nëse ju keni ndonjë pyetje në lidhje me këto kërkesa, ju lutem kontaktoni Stacia Cardille ose Russell Anello me stafin e Komisionit në numrin (202) 225-5420.


Sinqerisht,
Henry A. Waxman

A do e thrrasi Ina Rama kte ambasadorin npytje?

Si u implikua ambasadori amerikan me Gërdecin?

Nga Mero Baze

Ministria e Mbrojtjes në Tiranë bëri dje një sqarim të pakërkuar nga askush për publikun lidhur me deponimet e biznesmenit amerikan, Diveroli, për origjinën e fishekëve të blerë nga Tirana zyrtare për llogari të ushtrisë afgane, financuar nga Pentagoni. Deklarata e zëdhënëses së zotit Oketa përpiqej të sqaronte po ashtu në mënyrë të paqartë, se zoti Diveroli e ka pas ditur se ç’fishekë po blinte, por ishte e paqartë se nga kush po i blinte. Në përpjekje për të folur për një kontratë me zotin Diveroli, zëdhënësja zyrtare e Ministrisë së Mbrojtjes fliste për një kompani qipriote, e futur si seksere mes MEICO dhe Diverolit, e cila ka prodhuar diferencën që ka shkuar në xhepat e autorëve të këtij skandali. Por problemi nuk është te detajet e këtij skandali, por te parimi, nga i cili është nisur Ministria e Mbrojtjes për të bërë gjyq publik ndaj fakteve që po zbulon drejtësia amerikane.
Së pari, është joetike që një institucion zyrtar shqiptar të bëjë diplomacinë e gramafonit dhe të polemizojë publikisht me drejtësinë amerikane për fakte që ajo i ka nën hetim. Nëse zoti Oketa ka fakte për të dëshmuar rreth këtij skandali, ai mund t’ia paraqesë ato drejtësisë shqiptare dhe asaj amerikane dhe jo të bëjë marrëdhënie publike me gjëra krejt të diskutueshme dhe kompromentuese për shtetin shqiptar.
Së dyti, pozicionimi i shtetit shqiptar në një çështje që po hetohet në dy vende, dëshmon një ngutje të dyshimtë, e cila vë në pozitë të vështirë shtetin shqiptar. Polemikat publike për faktet që rrjedhin në media nga hetimet, nuk janë serioze për shtetin. Shteti flet me letra dhe me fakte dhe jo me zëdhënës, kur vjen fjala për një hetim të tillë rrënjësor.
Së treti, meqë vetë shteti e hapi këtë temë, është e paqartë se ç’kërkon të sqarojë Ministria e Mbrojtjes për çështjen ‘Diveroli’, kur ajo me vetëdije e ka lidhur kontratën me një sekser fantazmë, që zyrat i kishte në Qipro, shtëpinë te serbët e Bosnjës dhe partnerin real në Gërdec. Formalisht, shteti ynë nuk i ka shitur fishekë amerikanëve, por një kompanie qipriote dhe kjo e fundit ua ka shitur amerikanëve. Kështu që formalisht shteti jonë nuk ka pse përfshihet në polemika për Diverolin, pasi nuk ka ndonjë kontratë direkt me të, edhe pse ka Pazar me të.
Ajo që duhet të hetojë shteti shqiptar, ose ajo pjesë që nuk e ka ditur skandalin, duke patur parasysh këtu Gazmend Oketën, është të hetojë se kush e solli firmën qipriote, pse ka shkuar disa herë në Bosnjë për udhëtime misterioze Mihal Delijorgji dhe si e implikoi qeveria shqiptare ambasadorin amerikan në këtë histori. Skandali që po hetohet në SHBA dhe që dëshmon dhe përfshirjen aksidentale të ambasadorit të SHBA në Tiranë, e ka burimin te skandali i Fatmir Mediut me gazetarin e “New York Times”, sekuestrimin prej tij të kasetës së intervistës, ku u pyet për këtë çështje dhe më pas vrapimin e pafajshëm të Fatmir Mediut në ambasadë për të shpjeguar situatën. Në këtë lojë hyri më pas dhe kryeministri shqiptar, i sikletosur nga përfshirja e njerëzve të vet në këtë histori dhe i premton presidentit afgan armë falas nga Shqipëria. E gjithë kjo është një histori banale shqiptare, që buron nga koncepti i shtetarëve tanë, se dhe Amerika është një fshat i madh si Shqipëria, ku punët zgjidhen me të njohur dhe ndere. Për amerikanët furnizimi me armë i ushtrisë afgane nuk ishte çështje lekësh, por çështje politike. Dhe qeveria shqiptare nuk po akuzohej se po shiste shtrenjtë, edhe pse atë e bëri përmes sekserëve të saj, por se po shiste kalbësira të rrezikshme që i kishte destinuar për demontim. Ndaj, implikimi i ambasadorit amerikan në këtë histori prej Berishës dhe Mediut është krejt përgjegjësi e këtyre të fundit, të cilët gazetën “New York Times” e dinë si ndonjë gazetë ndërtuesi në Tiranë, që po të flasin me të ose t’i japin reklamat e rrugëve, nuk e boton artikullin, kurse furnizimin me armë të ushtrisë afgane e dinë si tender të Pentagonit që e ka fituar ndonjë i afërt i të parit vendit dhe hajt t’i bëjnë nder t’ia japin falas. Historia se si u implikua ambasadori amerikan në Tiranë më historinë e Gërdecit, nuk ka të bëjë fare me mënyrën se si qeveria shqiptare është përpjekur ta mbajë të fshehur këtë skandal, për të cilin thotë se dëgjoi për herë të parë më 15 mars. E vërteta është se, megjithëse Berisha është përpjekur publikisht ta krahasojë këtë rast me atë të vitit 1995, kur i dha armë falas Izetbegoviçit kundër serbëve, nuk është e njëjta situatë. Izetbegoviçi ishte president i një kombi të vetmuar në luftë dhe duhej ndihmuar. Ai s’kishte pará, s’kishte tendera dhe s’kishte nevojë për ndërmjetës. Thjesht donte armë dhe atëherë Sali Berisha ia dha. Kjo është një gjë që i bën krenarë shqiptarët. Kurse historia e Afganistanit është krejt e ndryshme. Afganët nuk na kanë kërkuar armë, por amerikanët kanë kërkuar të blenë këtu për llogari të afganëve. Ne i kemi korruptuar ata dhe kemi fyer objektivin e qeverisë amerikane për atë vend. Me vetëdije kemi futur në mes sekserë dhe kemi implikuar në këtë histori Pentagonin, Uashingtonin, diplomatët dhe shtetin tonë. Ky është një skandal që nuk mund të sqarohet me zëdhënës dhe gramafonë publikë. Kjo është një çështje që e sqaron drejtësia dhe për fat ajo ka nisur të veprojë me standardet që po vendos në këtë hetim drejtësia amerikane dhe këmbëngulja e ambasadorit amerikan në Tiranë. Ky hetim po nis, për shkak të mungesës së respektit që është dëshmuar ndaj ushtrisë amerikane. Ne duhet të hetojmë shtetin tonë, për shkak të mungesës së respektit që dëshmoi ndaj jetës së qytetarëve të tij dhe parave të taksapaguesve tanë.

Mero Bazes i paska ardh keq qe ambasadori amerikan osht impliku ne kte çeshtje. Tamam gjykim katunari (meqe e kishte per katunar Mero). Ky ambasadori nuk ishte i vogel ene nuk e dite çpo bote, ene nuk i njifte ligjet e shtetit vet, ene nuk e dite pasojat, ene nuk e dite.....
Mirpo Mediu i ka thon; kom bo kaq per Ameriken sa tboje diçka ne Amerika per mu.
Teshina se çer ka desh me thon Mediu me ate llafe, e di Mediu ne ambasadori Amerikon qi ja ka mor Mediut kte llafe parasysh, ene ktu fillo ene "implikimi". E shef ene qorri o Mere se o njy gishti mir nmjalt...

Qe ambasadori amerikan eshte implikuar me vullnet te plote ne kete çeshtje, ska dyshim, ashtusikurse ambasadori amerikan eshte koka e turkut e rradhes. Po gjynahet e kujt synohet te mbuloje prerja e kokes te ambasadorit amerikan? Kjo eshte nje pyetje qe nuk dihet nese do marre pergjigje.

Withers fshehu trafikun e armëve”
A ishte Departamenti i Shtetit i përfshirë në një tregti potenciale ilegale municionesh, që çoi në arrestimin e një 22-vjeçari, tregtar armësh nga Majemi javën e kaluar?
Andrew Tilghman
Kjo është deklarata e përfaqësuesit të demokratëve, kongresmenit nga Kalifornia, Henry Waxman. Komiteti i Vëzhgimit të Dhomës së Përfaqësuese tha se, ka prova që ambasada amerikane në Shqipëri ka ndihmuar zyrtarët shqiptarë të mbajnë të fshehtë tregtinë ilegale të armëve kineze të prodhuara në Kinë për në Afganistan dhe më pas ka dështuar të demaskojnë këtë informacion kur Komiteti i Waxman i ka pyetur për të. Javën e kaluar ju kemi informuar mbi arrestimin e Efraim Diverolit dhe tre ortakëve të tij të biznesit me AEY Inc. Prokurorët federalë thanë se, ai ka shkelur Aktin e Kontrollit të Eksportit të Ushtrisë Amerikane, që ndalon blerjen dhe shitjen e armëve nga disa vende, përfshirë edhe Kinën. Municioni në fjalë është siguruar nga AEY tek një tregtar shqiptar armësh. Provat e reja dhe eksplozive të Waxman burojnë nga një intervistë e Komitetit të Vëzhgimit të Ushtrisë, Majori Larry Harrison, shefi i zyrës së bashkëpunimit të Mbrojtjes në ambasadën amerikane në Shqipëri. Harrison i tha komitetit për një takim të mëparshëm të papublikuar në nëntor, që përfshinte zyrtarët shqiptarë dhe ambasadorin amerikan John Withers dhe të tjerë nga ambasada amerikane në Tiranë. Waxman e përshkruan tregimin e Harrison në këtë takim në një letër dërguar sekretares së Shtetit, Kondoliza Rajs:
Sipas Major Harrison, ministri shqiptar i Mbrojtjes, Fatmir Mediu, i ka telefonuar atij më 19 nëntor 2007 për t’i kërkuar një takim urgjent me ambasadorin amerikan në Shqipëri, John L. Withers, II. Major Harrison citoi gjatë intervistës së tij se ministri shqiptar i Mbrojtjes ishte i shqetësuar nga fakti se një reporter i “New York Times” planifikonte të hetonte mbi dërgesat në aeroportin e Rinasit në Tiranë, ku AEY po ndërmerrte operacionin e tij të ripaketimit të municionit kinez përpara se ta dërgonte atë në Afganistan, një proces që përfshinte heqjen e municionit nga paketimi i tij origjinal kinez…
Si rezultat i diskutimeve që vazhduan deri natën vonë, ministri shqiptar i Mbrojtjes ka urdhëruar një nga gjeneralët e tij të lartë të zhdukë të gjitha provat e paketimit kinez përpara se të inspektohej vendi ditën tjetër. Major Harrison tha për komitetin: “Ambasadori ka rënë dakord se kjo do të lehtësonte dyshimet e keqbërjes”. Në prill, pas një historie të faqes së parë për rreth 20-tregtarë armësh në “New York Times”, Waxman pyeti nëse Departamenti i Shtetit kishte ndonjë informacion për këtë çështje. Zyrtarët e shtetit u përgjigjën me një memorandum, ku përshkruheshin vetëm pak takime të sipërfaqshme për këtë çështje. Por Waxman më vonë siguroi një draft të memorandumit të Departamentit të Shtetit mbi të cilin Harrison kishte përdorur funksionin e “ndryshimit të gjurmëve” në Microsoft Word për të sugjeruar se referenca për takimin e nëntorit 2007 ishte e përfshirë. Drafti i Harrison përfshinte gjuhën e mëposhtme:
“A e kemi përmendur në takimin në shtëpinë e Steve më 19 nëntor (i pranishëm ishte ambasador Withers, DCM Christina, RSO Patrick dhe shefi i ODC, Harrison) ku ambasadori i rekomandonte ministrit të parandalonte që reporterët të shikonin municionet në aeroport ditën pasardhëse dhe ministri i telefonoi MG Spahiu rreth orës 23:00, që të hiqte të gjithë municionin nga aeroporti deri në 08:00 të mëngjesit”. “Steve” është një referencë për Stephen Cristina, zv/shefi i misionit në ambasadën amerikane në Shqipëri. Ndryshimet e sugjeruara nga Harrison nuk ishin të përfshira në draftin final të memorandumit të Departamentit të Shtetit dërguar komitetit të Waxman, më 9 prill.
Waxman shkruan në letrën e tij dërguar Rajs:
“Informacioni i siguruar nga Komiteti ngre çështje serioze. Nëse informacioni është i saktë, duket se zyrtarët e lartë të ambasadës amerikane në Shqipëri i kanë aprovuar përpjekjet e ministrit shqiptar të Mbrojtjes për të zhdukur provat e dërgesave ilegale të municionit kinez, që tashmë janë subjekt i një çështjeje kriminale. Duket gjithashtu se informacioni për incidentin i është fshehur Komitetit. Është e vështirë për të kuptuar çfarë racionaliteti do të justifikonte këto veprime.
Waxman i kërkoi Rajs të dërgojë disa zyrtarë nga Departamenti i Shtetit që të dilnin para komitetit për “intervista të transkriptuara”.

Spahiu: S’kam pasur asnjë telefonatë nga ministri
TIRANE - Shpëtim Spahiu, gjenerali i shkarkuar pak kohë më parë nga detyra me dekret të presidentit, mohoi dje në mënyrë kategorike të ketë pasur ndonjë telefonatë nga ministri i Mbrojtjes, për të hequr municione nga aeroporti i Rinasit. I pyetur nga gazeta “Panorama” lidhur me një telefonatë të pretenduar nga shtypi amerikan, të bërë nga Mediu në adresë të Shpëtim Spahiut, ky i fundit ka mohuar kategorikisht. Mediat amerikane dhe kongresmenët demokratë akuzuan dje se ish-ministri i Mbrojtjes, Mediu, në një takim me ambasadorin amerikan në Tiranë Withers, kishte telefonuar Komandantin e Komandës së Bashkuar, Gjeneralin Shpëtim Spahiu, duke i kërkuar të hiqte fishekët kinezë nga aeroporti i Rinasit. Një fakt i tillë është hedhur poshtë në mënyrë kategorike nga Gjenerali Shpëtim Spahiu. “Në mënyrë kategorike nuk është e vërtetë të kem pasur një telefonatë të tillë nga ministri i Mbrojtjes”, është shprehur Gjeneral Spahiu dje në mbrëmje. Ai ka kryer detyrën e Komandantit të Komandës Logjistike në Shtabin e Përgjithshëm deri pak kohë më parë kur me një dekret të presidentit dhe me propozim nga ministri i Mbrojtjes, Gazmend Oketa, Spahiu u shkarkua nga detyra pa asnjë lajmërim apo analizë të mëparshme rreth punës dhe rezultateve të arritura nga sektori i drejtuar prej tij në Shtabin e Përgjithshëm. t.s

Ina Rama, Prokurorisë së SHBA: Pyesni Diverolin për Shqipërinë
TIRANE - Prokuroria shqiptare i kërkon zyrtarisht palës amerikane të marrë në pyetje Efraim Diverolin, lidhur me tregtinë e municioneve të shitura nga ndërmarrja MEICO në shkelje të ligjeve të SHBA, që ndalojnë përdorimin e armatimit kinez. Kërkesa e Prokurorisë së Përgjithshme në Tiranë është nisur dje në adresë të Prokurorisë amerikane dhe autoriteteve të tjera të hetimit. Ndërkaq grupi hetimor shqiptar i ngritur për trafikun e armëve, pritet të administrojë gjatë ditës së sotme deklarimet që Diveroli do të japë në daljen e tij para Kongresit për të dëshmuar lidhur me skandalin e tregtimit të fishekëve kinezë nga Shqipëria në Kabul, në emër të Pentagonit. Një gjë e tillë ndalohet nga ligjet amerikane, për shkeljen e të cilave Efraim Diveroli u arrestua javën që shkoi. Akuza shqiptare i ka kërkuar Prokurorisë amerikane të pyesë pronarin e kompanisë AEY, lidhur me veprat penale që janë kryer në territorin e Shqipërisë, gjatë shitjes së municioneve të vjetëruara të prodhimit kinez. Nëse 22-vjeçari Efraim Diveroli tregon episode apo rrethana të tjera të vlefshme për këtë çështje, deklarimet e tij pritet të dërgohen nga SHBA në Tiranë me letërporosi dhe të përdoren si prova ndaj të dyshuarve për abuzimin me tregtinë e fishekëve shqiptarë të prodhimit kinez. Prokuroria e Përgjithshme në Tiranë, për herë të parë dje, ka konfirmuar se po heton mundësinë e trafikimit të armëve nga Shqipëria në drejtim të Kabulit, përmes shitjeve të ndërmarrjes MEICO për kompaninë AEY të Efraim Diverolit. “Ajo që dihet deri tani është se ka pasur një proces të shitjes së municioneve. Hetimet janë përqendruar në zbulimin e elementëve abuzivë të kësaj veprimtarie, si fshehja e burimit apo destinacionit të municioneve, mashtrimi në dokumentacion apo në çmimin e tyre, si dhe kryerja e veprimeve të padeklaruara që mund të bien ndesh me ligjet e vendit tonë, ose të shtetit blerës të municionit”, janë shprehur burimet e Prokurorisë së Përgjithshme. Sipas tyre, në kërkesën e akuzës shqiptare dërguar Prokurorisë amerikane thuhet se, “Prokuroria ka filluar kryesisht hetimet lidhur me trafikun e dyshuar të armëve që i janë shitur kompanisë së shtetasit Efraim Doveroli. Për nevoja të këtij procedimi penal kërkojmë të njihemi me deklarimet e personit të arrestuar rreth abuzimeve, apo veprimeve të paligjshme që ai apo partnerët e tij në këtë aktivitet, mund të kenë kryer në territorin shqiptar”. t.s