Scheffer: Vendimi politik për anëtarësimin në NATO

Scheffer: Vendimin politik për anëtarësimin në NATO do e marrin anëtarët

Nga Armand Maho

Shqipëria është në hapat e fundit të anëtarësimit në NATO, por gjithsesi ftesa në Samitin e Bukureshtit mbetet një vendim politik i vendeve anëtare të këtij organizmi. Kjo ka qenë deklarata që Sekretari i Përgjithshëm i NATO-s, Jaap de Hoop Scheffer, ka dhënë dje gjatë takimit me kryeministrin Berisha, i cili prej ditës së djeshme ndodhet në Bruksel në një vizitë zyrtare në selinë qendrore të NATO-s atje. Gjatë këtij takimi, Sekretari i Përgjithshëm i NATO-s, Scheffer, u shpreh se këto muaj janë shumë të rëndësishëm për Shqipërinë, e cila, sipas tij, ka bërë hapa të mëdha në drejtim të zbatimit të reformave me qëllim integrimin në NATO.


Ftesa


Scheffer u shpreh se një tregues i qartë i kësaj frymë bashkëpunimi me opozitën është dhe delegacioni multipartiak, që shoqëron kryeministrin Berisha në Bruksel, i cili është një shembull që dëshmon sesi ka ndryshuar kultura politike në Shqipëri, gjatë këtyre viteve. Më tej, Scheffer theksoi se do të vlerësohet pozitivisht, në vendimin për të integruar Shqipërinë në NATO, roli i Shqipërisë në stabilitetin e rajonit. “Roli i saj, ka qenë vendimtar për të ruajtur ekuilibrat në rajon, sidomos lidhur me çështjen e statusit të Kosovës”, - tha Sekretari i Përgjithshëm i NATO-s.
Në këtë kuadër, Scheffer vlerësoi klimën shumë të mirë të bashkëpunimit që Shqipëria ka ndërtuar me vendet e tjera të rajonit. “Tashmë, - u shpreh Scheffer, - kilometri i fundit drejt marrjes së ftesës në Samitin e Bukureshtit është afruar edhe më shumë dhe Shqipëria po ecën në rrugë të mbarë. Në këtë pikë, është domosdoshme që zbatimi i reformave të bëhet mbi baza të qëndrueshme dhe zhvillimi i tyre të jetë i pakthyeshëm”, - tha Scheffer. “Gjithsesi, vendimi për të marrë një ftesë për anëtarësim në NATO, - theksoi ai, - vazhdon të mbetet një vendim politik që duhet ta marrin vendet anëtare të saj”.


Berisha


Nga ana e tij, kryeministri Berisha u shpreh se është vendimtare për qeverinë shqiptare që procesi i zhvillimit të reformave të jetë i pakthyeshëm dhe shprehu bindjen e tij të plotë se ky proces është i tillë. Ndër të tjera, kryeministri shtoi se ka një klimë të re bashkëpunimi me forcat politike, në interes të kombit dhe të integrimit në NATO. Kryeministri theksoi se ekziston mbështetja e plotë e opozitës në zbatimin e reformave kryesore, të cilat kanë si objektiv integrimin e Shqipërisë në NATO dhe marrjen e ftesës në Samitin e Bukureshtit. “Këtë fakt, - vijoi kryeministri, - e dëshmon dhe rezoluta e iniciuar nga opozita dhe e votuar unanimisht në parlament për implementimin reformave”.