Divorcet, katër çifte në ditë

Divorcet, katër çifte në ditë zgjidhin martesën

Nga Bledar Lumani

Tre deri në katër divorce në ditë. Kjo është shifra shokuese në Gjykatën e Tiranës, e cila në 20 ditët e para të janarit ka regjistruar 68 kërkesa për zgjidhje të kurorës. Ndërkaq, edhe më e rëndë shfaqet situata, pasi në këtë gjykatë janë pasuar nga vitit i shkuar 274 raste, duke e çuar në 342 çështje divorcesh, të cilat pritet të gjykohen brenda vitit 2008. Ndërkaq, 20 prej tyre pritet të marrin vendimin përfundimtar për çështje ditësh.

Divorcet

Burime të Gjykatës së Tiranës thanë për “TemA”-n se, afërsisht katër kërkesa në ditë regjistrohen duke kërkuar dhënien fund të martesës. Por, sipas të njëjtave burime, numri i kërkesave për divorce në gjykatat e rretheve të tjera, si ajo e Fierit, Shkodrës dhe Vlorës është më i ulët se në Gjykatën e Tiranës. Kështu, në këto gjykata, në 20 ditët e para të këtij viti kanë ardhur rreth 30 kërkesa për divorce, vetëm gjysma e kërkesave të ardhura në gjykatën e kryeqytetit. Ndërkohë, numri i proceseve që arrin të mbyllet brenda një vitit është i vogël.


Seanca e pajtimit

Fillimisht, pasi bëhet kërkesa për divorc, gjykata zhvillon një seancë paraprake pajtimi, ku përpiqet që të bindë bashkëshortët të mos shkojnë drejt këtij hapi. Megjithatë, pajtime të tilla ndodhin shumë rrallë, për të mos thënë asnjëherë. Kjo i referohet edhe shifrave të Gjykatës së Tiranës, ku gjatë këtij viti nuk ka pasur asnjë pajtim të bashkëshortëve gjatë seancës së pajtimit. Sipas ligjit, pajtimi është detyrë e gjykatës. Kështu, ajo e ka për detyrë funksionale që të realizojë një seancë paraprake, në mënyrë që të ndihmojë çiftin e bashkëshortëve që të mos heqin dorë dhe mos të ndërpresin lidhjen e tyre bashkëshortore. Ndërkaq, faktet e pranueshme nga gjykata për divorce janë “fyerjet e rënda, grindjet e vazhdueshme në çift, keqtrajtimet, sëmundjet e rënda mendore, shkeljet e besnikërisë, ndjekja penale për një kohë të gjatë e njërit prej bashkëshortëve, etj”.

Shkaqet e divorceve

Motivet e divorceve janë të shumëllojshme. Në vend të parë, për shumë kohë ka qenë gjendja e vështirë ekonomike që ka shtyrë bashkëshortët drejt ndarjes. Të lodhur nga varfëria dhe grindjet e shpeshta, si pasojë e gjendjes së vështirë ekonomike bashkëshortët në shumë raste vendosin që t’i japin fund martesës. Një numër i madh i divorceve ndodh edhe si pasojë e emigrimit. Kjo, për faktin se shumë çifte rrinë të ndarë për shumë vite me radhë larg njëri-tjetrit, duke qenë se shumica e meshkujve shqiptarë kanë emigruar jashtë shtetit. Sakaq, edhe tradhtia bashkëshortore përbën një motiv që në shumë raste bashkëshortët t’i japin fund martesës. Por, vitet e fundit, në shoqërinë shqiptare vihet re edhe emancipimi i shoqërisë dhe në momentin që mes një çifti janë ftohur marrëdhëniet, tashmë ata e kanë më të lehtë që t’i drejtohen gjykatës për t’u divorcuar. Ndërkohë, një faktor tjetër që ndikon në rritjen e numrit të divorceve është dhe rritja e nivelit arsimor dhe personalitetit të grave, si dhe pavarësia e tyre ekonomike.