Igli Tare, 30 gola në Serie A

Admin Anëtarësuar : 06 Dec 2007 Mesazhe : 1804

Shkruar nga Leonard Karaj

Ndonëse me një ritëm të tillë golash i ngjan më tepër një fantazisti, se sa një sulmuesi, Igli Tare ka mundur të siglojë golin e 30-të në Serie A. Ai ndaj Palermos këtë të diel i dha jo vetëm barazimin skuadrës së Lacios, por në një farë mënyre prishi edhe “agjërimin” gati dy-vjeçar të tij me fanellën e kryeqytetasve. Ish-kapiteni i kombëtares shqiptare nuk shënonte në kampionatin italian të futbollit në një ndeshje zyrtare që prej 8 janarit të 2006 në ndeshjen Askoli-Lacio.
Prej asaj ndeshje Tare ka numëruar plot 704 ditë kalendarike para se të shënonte sërish një gol, por me goxha peshë për skuadrën e Lacios.
Goli i 30
Ndonëse ishte menduar se mund të luante edhe si titullar ndaj Palermos, për mungesë të Pandev dhe për një formë jo të mirë fizike të Rokit, përsëri trajneri Delio Rosi preferoi ta ulë në stol sulmuesin shqiptar. Vetëm në minutën e dhjetë të pjesës së dytë, biondi shqiptar mori vendin e afrikanit Makiva, i cili nuk po gjen veten ashtu sikundër tek Kievo. Në disfavor jo vetëm të dy golave, por edhe të një futbollisti më pak, për shkak të daljes me karton të kuq të Siviljas, Tare arriti t’i “falte” një pikë shumë të vlefshme skuadrës së tij dhe teknikut Delio Rosi. Sulmuesi shqiptar u vlerësua me notën 7.5 për këtë takim.
Karriera
Igli Tare erdhi tek Breshia gjatë merkatos së verës në vitin 2000. Tek kjo skuadër ai luajti për tre sezone përkrah legjendës italiane Roberto Baxhio dhe sulmuesit Luka Toni. Me Breshian Tare zhvilloi 75 ndeshje, duke sigluar edhe 15 gola. Në merkaton e 2003-it Igli Tare kaloi tek Bolonja me të cilën luajti 55 ndeshje, duke shënuar 11 gola. Pas rënies në Serie B, shtatlarti shqiptar nënshkroi në kontratë 3-vjeçare me Lacion. Ndonëse priste që në kryeqytet të luante më shumë, këtu erdhi pothuajse mbyllja e kapitullit të Serie A. Në 2 vjet e gjysmë Tare ka luajtur në vetëm 36 ndeshje, shpesh herë si zëvendësues, duke shënuar edhe 4 gola.
Kombëtarja
Mos aktivizimi me skuadrën e Lacios solli edhe largimin e bujshëm të tij nga kombëtarja shqiptare. U shkrua shumë për mos grumbullimin e Tares në ndeshjen me Slloveninë dhe Bullgarinë, por Bariç kishte një kartë të fortë në dorë; aktivizimin e sulmuesit në vetëm një ndeshje me skuadrën e Lacios, ndërkohë që Alban Bushi në Greqi kishte shënuar plot nëntë gola me Apollon Kallamaria. Sipas Tares, problemi më i madh i tij ka qenë me trajnerin Delio Rosi, i cili nuk e shikon si një futbollist të denjë për skuadrën e tij. Por nga ana tjetër ai nuk pranoi që Tare të largohej gjatë merkatos së janarit nga kryeqyteti në drejtim të një skuadre tjetër. Ende nuk është thënë fjala e fundit edhe nga ana e futbollistit, por sipas gjasave karriera e Tares do të përfundojë në qershor të këtij viti, atëherë kur mbaron edhe kontrata me Lacion.
.......
Bogdani: Mund të kthehem tek Kievo që në janar
Është bërë e zakonshme që për çdo sezon merkatoje emri i Erjon Bogdanit vihet në qendër të vëmendjes. Aktinizmi i tij i paktë në katër javët e fundit me Livornon ka bërë që sulmuesi shqiptar të shikojë alternativa të tjera që në merkaton e janarit. Në një intervistë të publikuar në gazetën kosovare “Ekspers” sulmuesi i kombëtares shqiptare ka theksuar se mund të largohet sërish për tek Kievo. “Nuk ka gjë të sigurt, por ekziston një mundësi e tillë që të shkoj tek Kievo që në merkaton e janarit. Tek Livorno jam mundur të luaj mirë, kam dhënë maksimumin tim, por më mungon goli, prandaj nuk kam qenë edhe titullar”, ka deklaruar Bogdani.