Kostumet e banjës. Të ndara apo trupore?

Kostumet e banjës. Të ndara apo trupore?

Lamtumirë rrobave të banjës të shtrënguara, provokuese dhe lakuriqësisë së ekzagjeruar. Këtë verë, në paradën e plazhit kanë ndryshuar shumë gjëra. Mesa duket, pas dëshirës së madhe për t‘u zhveshur, stilistët kanë preferuar që gjërat të jenë komplet ndryshe. Kostumi i banjës trup është dizajnuar për të mbuluar një pjesë të mirë të "tipareve" femërore. Tashmë ka ardhur momenti i provës së vështirë në plazh. Kjo është tendenca e re për verën e nxehtë dhe ndoshta atë pasardhëse. Sipas opinioneve të stilistëve, por edhe të konsumatoreve, truporet janë zgjidhja e duhur për të mbuluar defektet e trupit, por edhe ndonjë kile të tepërt që është vënë gjatë stinës së dimrit. Megjithatë, jo të gjitha vajzat janë dakord me tendencën e re, ndaj është e vështirë të thuhet se kush do ta fitojë këtë "luftë", truporet apo bikinit. Për momentin, beteja mes dy tendencave duket se do të përfundojë me barazim. Gjithsesi, ata që mund t‘u vijnë në ndihmë vajzave janë stilistët. Padyshim që gjykimi i tyre vlen shumë, apo jo?

Ja çfarë propozon stilistja e rrobave të banjës, Laura Urbinati: "Kostumi më i mirë i banjës është ai me të cilin t‘i ndihesh më rehat. Nuk është dekolteja ajo që të zbukuron. Është më mirë të mbështeteni te perfeksioni i detajeve dhe përzierja e bukur e ngjyrave. Duhet të kemi parasysh që plazhi nuk është palestër".

Ndërsa një stiliste tjetër, Kristina Ti, propozon që vajzat ta sajojnë pamjen e tyre: "Kostumet e mia mund të përdoren edhe të ndara, kështu që secila mund të zgjedhë pjesën më të përshtatshme". Mes risive të vitit 2008, stilistja Kristina Ti tregon një palë bikini që ngjasojnë me ato të viteve ‘60, si ato që vishte dikur aktorja bukuroshe Brizhit Bardot. Pra, këtë verë ajo i këshillon vajzat të jenë pak më të mbuluara se vitet e tjera. Ndërsa, për sa u përket rroba të ndara të banjave, shumë të preferuara nga modelet e pasarelave, stilistët thonë: "Është e vërtetë që janë mjaft joshëse. Gjithsesi janë më të përshtatshme për një koreografi sfilatash, se sa për një ditë të zakonshme në plazh".



Eleganca është një copë e vetme


Zakonisht, në imagjinatën tonë truporet janë thuajse një veshje skene, të cilat jemi mësuar t‘ua shohim aktoreve të mëdha, si Grace Kelly në filmin "Në ndjekje të hajdutit", bukuroshes Ava Gardner dhe Rita Hayworth, ikonat absolute të feminilitetit. Gjithashtu edhe Doris Day, por edhe nënave e tezeve tona. Në ndryshim nga sot, ku rrobat e banjës trup vishen për të mbuluar ndonjë defekt të dukshëm, Esther Williams i përdorte si rroba pune, kur bënte stërvitje apo ushtrime noti.

Ajo që e lançoi e para kostumin e banjës trup ishte një atlete, notarja skandaloze australiane Annette Kellermann. Ishte viti 1906, kur Annette u paraqit në një garë noti në Shtetet e Bashkuara me një kostum banje, ku kofshët ishin tërësisht të zbuluara, në mënyrë që të rrëshqisnin më mirë në ujë. Për këtë arsye (që kishte dalë me kofshë të zbuluara), ajo u arrestua, u gjobit dhe u përjashtua nga gara.

Njëzet vjet më vonë, "Coco Chanel" prezantoi "modën e nxirjes", që deri në atë kohë ishte simbol i shoqërisë inferiore. Që zonjat shik të mund të merrnin më shumë rreze dielli dhe nxiheshin njëtrajtësisht më mirë, "Coco" dizajnoi një palë mbathje të shkurtra dhe një kanotiere pa mëngë, duke krijuar ato që sot quhen trupore. Prezantimi i këtij kostumi nga "Coco Chanel" ishte sërish një skandal. Në një gazetë franceze ishin shkruar tituj të tillë: "Kostumet e banjës po shkojnë drejt zeros. Po triumfon nudizmi. Çfarë do të ndodhë më 1933-shin?"

Kostumi i parë i banjës u prodhua në Shtetet e Bashkuara në 1920-ën nga Jantzen. Gjithsesi, duhej pritur mbarimi i Luftës së Dytë Botërore dhe lindja e rrobave të lehta, elastike, që vishen shpejt, për t‘iu afruar konceptit të truporeve sot.

Linjat e kësaj vere janë frymëzuar nga ato të viteve ‘60. Triumfojnë më shumë ngjyrat si e kuqja, bojëqielli, e verdha, portokallia, lejlaja, bluja, e zeza, e bardha. Truporet janë ndërthurur me elemente shumëngjyrëshe, me bazë blunë e detit, ku mbi to janë aplikuar forma lulesh me relieve që vihen re lehtësisht.

Edhe këtë verë e zeza konsiderohet si ngjyra më shik, por nuk duhet tepruar shumë me të. Me kostumet e banjës trup janë rikthyer edhe pantallonat e shkurtra, transparente, të lirshme dhe të gjata deri në fund të këmbëve, të cilat mund të vishen pa problem me një palë rroba banje trup. Këto janë të shoqëruara me këmisha të lirshme apo sarafane të hollë.



Trup seksi

Për ato që ende nuk kanë vendosur që të veshin rroba banje të ndara ose trupore, po ju tregojmë një model truporesh shumë joshëse. Ky është kombinimi më i mirë i kostumit që dëshironi



Të bardha

Një palë trupore në formë V-je, propozuar nga "Iceberg". Këto rroba banje të bardha janë prej mëndafshi dhe kushtojnë plot 500 euro


Petale lulesh

Trupore propozuar nga "Miss Sixty", me lule shumëngjyrëshe. Format në pjesën e përparme të kostumit të kujtojnë petalet e një luledeleje




Shik

Klasike, joshëse dhe të përshtatshme për një divë moderne. Këto trupore të zeza kanë një rrip poshtë gjoksit dhe një tjetër përreth qafës. Janë të këshillueshme për pushime të paharrueshme



Fantazi unike

Kostumi i propozuar nga "Argentovivo Scollo" është seksi dhe shumë i rafinuar. Reçipetat lidhen me një rrip të hollë në qafë. Kjo është veshja ideale për të shkuar në plazh


Me rrathë

Kombinimi i rrathëve të kuq dhe të zinj i jep edhe më shumë bukuri këtij kostumi, propozuar nga "Sisley". Truporet kanë dy rripa të hollë te shpatullat dhe një pjesë të hapur përpara
Shqip

Eshte çeshtje biznesi.

Ska rendesi, mjafton te me rrine mire.

Eeej paskan vendos kshtu me njerr gocat me çarçaf ne plazh?