Presidenti francez Nicolas Sarkozy dhe gruaja e tij e re Carla Bruni e kanë kaluar natën e parë të martesës në një rezidencë pranë pallatit të Versajës. Martesa që për muaj të tërë mbajti në ankth qytetarët francezë por edhe të gjitha gazetat e botës u kurorëzua ditën e shtunë. Pas ceremonisë private ku Carla Bruni u bë edhe zonja e parë e Francës, çifti është parë të hyjë në rezidencën e vogël. Ata janë përgjuar tërë natën nga fotografët por askush prej tyre nuk ka mundur që të sigurojë një foto nga nata e parë e çiftit. Një fotograf i "Associated Press" ka arritur që fiksojë fotot e çiftit teksa shëtisnin dorë për dore në kopshtet e Versajës mëngjesin e djeshëm.

Reporterët e shumtë që ndoqën me detaje të gjithë historinë e çiftit VIP shpjeguan se pas martesës në pallatin presidencial Elysee, çifti ka darkuar në vilën La Lanterne, një nga ish- rezidencat e Versajës, vetëmpak kilometra larg Parisit. Tashmë kjo vilë është kthyer në një rezidencë presidenciale. Ndërkohë pasdite është parë një korrier që mbante në dorë një tufë të madhe me lule, të cilat presidenti francez i kishte porositur për zonjën e tij të parë. Askush nuk ka mundur që të mësojë Askush nuk ka mundur që të mësojë çmimin e kësaj buqete modeste me lule.

Afërsia e çiftit është vënë re gjatë të tre muajve që ata kanë dalë së bashku në publik por dje Bruni (ndoshta tashmë duhet quajtur Carla Sarkozy) dhe presidenti Nicolas Sarkozy kanë preferuar që të shijojnë kafenë e pasdites në një prej tarracave të kopshteve të Versajës. Ata janë shfaqur dorë për dore dhe teksa konsumonin kafe me qumësht, Bruni qëndronte e mbështetur në supin e të shoqit.

Por presidenti francez Nicolas Sarkozy nuk ka arritur që ti gëzohet të gjithë ditës së tij të parë të martesës. Ai është shfaqur i zënë me krizën e Çad, një ish- koloni franceze në Afrikën Qendrore. Teksa rebelët po hynin në kryeqytetin e Çadit, Sarkozy ka thërritur një mbledhje në pallatin Elysee dhe ka folur në telefon me presidentin e Çadit.

I ndjekur nga gazetarë e fotoreporterë të shumtë çifti Bruni Sarkozy ka arritur që të bëjë një martesë të fshehtë mbrëmjen e së shtunës në Pallatin Elysee. Në një deklaratë të shkurtër të sapomartuarit thanë se ishin martuar në një ceremoni të vogël ku ishin të pranishëm vetëm familjarët e tyre dhe askush tjetër. "Nusja kishte veshur një fustan të bardhë. Edhe dhëndri nuk ishte veshur keq. Unë i urova çiftit lumturi të pafund",- tha duke qeshur njeriu që celebroi martesën më të famshme të momentit në Francë, kryetari i minibashkisë numër 8 të Parisit, Francois Lebel. Sarkozi 53 vjeç dhe Bruni 40, u martuan në prezencën e rreth 20 personave dhe Lebel e quajti ceremoninë "një moment intimiteti familjar për të sapomartuarit, në thjeshtësi të plotë ku dhëndri dhe nusja treguan shumë dashuri mes tyre".

Sipas ligjit francez, çiftet duhet të thonë betimet e tyre përpara se kryetari i bashkisë të bëjë bashkimin zyrtar. Por Sarkozi nuk është presidenti i parë francez që është martuar në zyrat e tij. Në vitin 1931 Gaston Doumergue ka lidhur martesën në pallatin Elysee. Martesa e Sarkozi ka habitur pjesën më të madhe të opinionit francez, i cili ishte mësuar që presidentët e mbanin jetën e tyre dashurore shumë të fshehtë. Në një konferencë për shtyp në janar, ai deklaroi se lidhja që kishte ishte shumë serioze dhe kishin nisur planet e martesës por pa pranuar që të bëjë publike datën.

Vizita e parë publike e çiftit është kryer në Disneyland Paris dhe më pas u shfaqën në plazhet e Egjiptit në rroba banje. Kjo ishte martesa e tretë e presidentit francez Nicolas Sarkozy, i cili ka tre fëmijë. Për Carla Brinin kjo është martesa e parë pas një karriere të gjatë si modele dhe një jete dashurore të pasur. Bruni, tashmë është e shndërruar në këngëtare, ka pasur lidhje dashurore me këngëtarët e njohur si Mick Jagger dhe Eric Clapton, aktorin Vincent Perez. Ajo ka një djalë të vogël, Aurelien, i cili ka lindur gjatë lidhjes së saj me profesorin e filozofisë Raphael Enthoven.